ଲକ୍ଷ୍ନୌ: ଆଇପିଏଲ-୨୦୨୪ରେ ଶନିବାର ସଂଧ୍ୟାରେ ଖେଳିଯିବ ୪୪ତମ ମୁକାବିଲା । ଲକ୍ଷ୍ନୌର ଏକାନ୍ନା ଷ୍ଟାଡିୟମରେ ମୁହାଁମୁହିଁ ହେବେ ଲକ୍ଷ୍ନୌ ସୁପରଜାଏଣ୍ଟ୍ସ ଓ ରାଜସ୍ଥାନ ରୟାଲ୍ସ । ଏହି ମ୍ୟାଚକୁ ଜିତି ରାଜସ୍ଥାନ ପ୍ଲେ-ଅଫ୍ରେ ପହଞ୍ଚିବାକୁ ଯୋଜନା କରୁଛି । ସେହିପରି ଘରୋଇ ଏଲଏସଜି ପୂର୍ବ ପରାଜୟର ପ୍ରତିଶୋଧ ନେବା ଲକ୍ଷ୍ୟରେ ରହିଛନ୍ତି ।
ଉଭୟ ଦଳର ପ୍ରଦର୍ଶନରେ ଅନେକ ସାମଞ୍ଜସ୍ୟ ରହିଛି । ଦୁଇ ଟିମର ଉପରକ୍ରମର ବ୍ୟାଟରମାନେ ଚମତ୍କାର ଫର୍ମରେ ରହିଛନ୍ତି ଓ ଦଳକୁ ଜିତାଇବାରେ ପ୍ରମୁଖ ଭୂମିକା ନିର୍ବାହ କରୁଛନ୍ତି । ତେଣୁ ନିମ୍ନ କ୍ରମ ବ୍ୟାଟରମାନଙ୍କୁ ପରିଶ୍ରମ କରିବାକୁ ପଡ଼ୁନାହିଁ । ଠିକ୍ ସେହିପରି ଉଭୟ ଦଳର ବୋଲିଂ ବିଭାଗ ଶକ୍ତିଶାଳୀ ଓ ଯଥେଷ୍ଟ ବିଭିନ୍ନତା ରହିଛି । ଉଭୟ ଦଳ ମାର୍ଚ୍ଚ ୨୪ ତାରିଖରେ ପରସ୍ପରକୁ ଭେଟିଥିଲେ । ରାଜସ୍ଥାନ ରୟାଲ୍ସ ଉକ୍ତ ମ୍ୟାଚ୍କୁ ୨୦ ରନ୍ରେ ଜିତିଥିଲା । ଉଭୟ ଦଳର ଏହା ପ୍ରଥମ ମ୍ୟାଚ୍ ରହିଥିଲା । ବର୍ତ୍ତମାନ ସମୟ ବଦଳିଛି । ସୁପରଜାଏଣ୍ଟ୍ସ ଚମତ୍କାର ଫର୍ମରେ ରହିଛି । ରୟାଲ୍ସ ଦଳ ଟେବୁଲ୍ ଟପ୍ରେ ରହିଥିବାରୁ ଆସନ୍ତା କାଲିର ମ୍ୟାଚ୍ ସଂଘର୍ଷପୂର୍ଣ୍ଣ ହେବା ଆଶା କରାଯାଉଛି ।
ଆଜିର ପ୍ରଦର୍ଶନ ଅପେକ୍ଷା ରଣନୀତି ବେଶ୍ ଗୁରୁତ୍ୱପୂର୍ଣ୍ଣ ହେବ । ପେସ୍ ବୋଲିଂ ବିସ୍ମୟ ମୟଙ୍କ ଯାଦବ ପ୍ରତ୍ୟାବର୍ତ୍ତନ କରିବା ସମ୍ଭାବନା ରହିଛି । ସେ ଫିଟ୍ ଘୋଷିତ ହେଲେ ୟଶ ଠାକୁର ଏକାଦଶରୁ ବାଦ ପଡ଼ିବେ । ସେହିପରି ରାଜସ୍ଥାନ ରୟାଲ୍ସ ଦଳ ଅପରିବର୍ତ୍ତିତ ରଖିବ । ସୱାଇ ମାନସିଂ ଷ୍ଟାଡ଼ିୟମ୍ ତୁଳନାରେ ଏକାନ୍ନା ପିଚ୍ ସାମାନ୍ୟ ମନ୍ଥର । ନାଲି ମାଟିରେ ପ୍ରସ୍ତୁତ ପିଚ୍ରେ ଖେଳ ହୋଇପାରେ । ସୁପରଜାଏଣ୍ଟ୍ସ ଘରୋଇ ଗ୍ରାଉଣ୍ଡ୍ରେ ୩ଟି ମ୍ୟାଚ୍ ଖେଳିଛି ଓ ଏଥିରୁ କଳା ମାଟିରେ ପ୍ରସ୍ତୁତ ପିଚ୍ରେ ୨ଟି ମ୍ୟାଚ୍ ଖେଳି ବିଜୟ ହାସଲ କରିଛି । ଏହି ପିଚ୍ ସ୍ପିନରଙ୍କୁ ସହାୟତା କରିବ ।