ଦଶହରା ପୂର୍ବରୁ ଗ୍ରାହକଙ୍କୁ ଝଟକା, ମହଙ୍ଗା ହେଲା ଏଲପିଜି ସିଲିଣ୍ଡର  

ନୂଆଦିଲ୍ଲୀ ୦୧।୧୦:  ଜିଏସଟିରେ ରିହାତି ପରେ ଲୋକଙ୍କୁ ଲାଗିଛି ମହଙ୍ଗା ଝଟକା । ଦଶହରା ପୂର୍ବରୁ ବଢିଲା ଏଲପିଜି ସିଲିଣ୍ଡର ଦାମ୍‌ । ଏହି ନୂଆ ଦାମ୍‌ ୧ ଅକ୍ଟୋବର ୨୦୨୫ ରୁ ଲାଗୁ ହୋଇଛି । ୧୯ କିଲୋଗ୍ରାମର କମର୍ସିଆଲ୍ ଏଲପିଜି ସିଲିଣ୍ଡର ଆଜିଠାରୁ ମହଙ୍ଗା ହୋଇଛି । ତୈଳ ବିପଣନ କମ୍ପାନୀଗୁଡ଼ିକ କମର୍ସିଆଲ୍ ଏଲପିଜି ସିଲିଣ୍ଡରର ମୂଲ୍ୟ ୧୫.୫୦ ଟଙ୍କା ବୃଦ୍ଧି କରିଛନ୍ତି । ଯାହା ଫଳରେ ଦିଲ୍ଲୀରେ ୧୯ କିଲୋଗ୍ରାମର ସିଲିଣ୍ଡରର ଦାମ୍‌ ୧୫୯୫.୫୦ ଟଙ୍କା ହୋଇଛି।

ଚଳିତ ଆର୍ଥିକ ବର୍ଷରେ ପ୍ରଥମ ଥର ପାଇଁ କମର୍ସିଆଲ୍‌ ଏଲପିଜି ସିଲିଣ୍ଡରର ମୂଲ୍ୟ ବୃଦ୍ଧି କରାଯାଇଛି । ଏହି ସିଲିଣ୍ଡରଗୁଡ଼ିକ ରେଷ୍ଟୁରାଣ୍ଟ, ହୋଟେଲ ଏବଂ ବିବାହ ପାର୍ଟିରେ ବ୍ୟବହୃତ ହୁଏ । ନୂଆ ମୂଲ୍ୟ ବୁଧବାର ଠାରୁ ଲାଗୁ ହୋଇଛି । ତଥାପି ୧୪.୨ କିଲୋଗ୍ରାମର ଘରୋଇ ସିଲିଣ୍ଡରର ମୂଲ୍ୟରେ କୌଣସି ପରିବର୍ତ୍ତନ ହୋଇନାହିଁ। ଦିଲ୍ଲୀରେ ଘରୋଇ ସିଲିଣ୍ଡରର ଦାମ୍‌ ୮୫୩ ଟଙ୍କା ରହିଛି ।

ଦିଲ୍ଲୀରେ ଅକ୍ଟୋବର ୧ରୁ ଗ୍ରାହକମାନଙ୍କୁ ୧୯ କିଲୋଗ୍ରାମ ଏଲପିଜି ସିଲିଣ୍ଡର ୧୫୯୫.୫୦ ଟଙ୍କାରେ ମିଳୁଛି । ପୂର୍ବରୁ ଏହା ୧୫୮୦ ଟଙ୍କାରେ ଉପଲବ୍ଧ ଥିଲା।  କୋଲକାତାରେ ବର୍ତ୍ତମାନ ସମାନ ସିଲିଣ୍ଡରର ମୂଲ୍ୟ ୧୭୦୦ ଟଙ୍କା। ସେପ୍ଟେମ୍ବରରେ ଏହା ୧୬୮୪ ଟଙ୍କାରେ ଉପଲବ୍ଧ ଥିଲା। ଏହା ୧୬ ଟଙ୍କା ବୃଦ୍ଧି ହୋଇଛି ।

ମୁମ୍ବାଇରେ ଏକ କମର୍ସିଆଲ୍‌ ସିଲିଣ୍ଡର ୧୫୩୧.୫୦ ଟଙ୍କାରୁ ୧୫୪୭ ଟଙ୍କାରେ ମିଳିବ । ମୁମ୍ବାଇରେ ଏହି ଏଲପିଜି ସିଲିଣ୍ଡରର ମୂଲ୍ୟ ୧୫.୫୦ ଟଙ୍କା ବୃଦ୍ଧି ପାଇଛି । ଚେନ୍ନାଇରେ ବର୍ତ୍ତମାନ ସମାନ ସିଲିଣ୍ଡର ୧୭୫୪ ଟଙ୍କାରେ ଉପଲବ୍ଧ ହେବ । ସେପ୍ଟେମ୍ବରରେ ଏହା ୧୭୩୮ ଟଙ୍କାରେ ଉପଲବ୍ଧ ଥିଲା। ୧୬ ଟଙ୍କା ମଧ୍ୟ ବୃଦ୍ଧି ପରିଲକ୍ଷିତ ହୋଇଛି।

ତେବେ ୮ ଏପ୍ରିଲ, ୨୦୨୫ରେ ଘରୋଇ ଏଲପିଜି ସିଲିଣ୍ଡରର ମୂଲ୍ୟ ପରିବର୍ତ୍ତନ ହୋଇଥିଲା। ସେତେବେଳେ ୫୦ ଟଙ୍କା ହୋଇଥିଲା ବୃଦ୍ଧି । ସେବେଠାରୁ ଗ୍ରାହକମାନଙ୍କୁ ସମାନ ହାରରେ ମିଳିଛି ଘରୋଇ ସିଲିଣ୍ଡର । ପୂର୍ବରୁ ୩୦ ଅଗଷ୍ଟ ୨୦୨୩ରେ କେନ୍ଦ୍ର ସରକାର ଘରୋଇ ସିଲିଣ୍ଡରର ମୂଲ୍ୟ ୨୦୦ ଟଙ୍କା ହ୍ରାସ କରିଥିଲେ । ଯାହା ଜନସାଧାରଣଙ୍କୁ ବହୁତ ଆଶ୍ୱସ୍ତି ଦେଇଥିଲା।