ନୂଆଦିଲ୍ଲୀ: ଭାରତ ଓ ପାକିସ୍ତାନ ମଧ୍ୟରେ ଅଘୋଷିତ ଯୁଦ୍ଧ । ଦୁଇ ଦେଶ ମଧ୍ୟରେ ଉତ୍ତେଜନା ଚରମସୀମାରେ ପହଞ୍ଚିଛି । ଗତକାଲି ରାତିରେ ପାକିସ୍ତାନ ଆକ୍ରମଣର ଦୃଢ଼ ଜବାବ ଦେଇଛି ଭାରତୀୟ ସେନା । ପାଲଟା ଆକ୍ରମଣରେ ଭାରତର ଏୟାର ଡିଫେନ୍ସ ସିଷ୍ଟମ ପାକ୍ ସେନାର ସବୁ ପ୍ଲାନକୁ ବିଫଳ କରି ଦେଇଛି । S-400 ବାୟୁ ପ୍ରତିରକ୍ଷା ପ୍ରଣାଳୀ ପଡ଼ୋଶୀ ଦେଶରେ ସମସ୍ତ ଡ୍ରୋନ୍ ଓ ମିସାଇକୁ ନଷ୍ଟ କରିଦେଇଛି ।
ସୂଚନା ଅନୁଯାୟୀ, ଭାରତୀୟ ସେନା ମେ’ ୭ ତାରିଖରେ ଆତଙ୍କବାଦୀଙ୍କ ଶିବିରରେ ପ୍ରଚଣ୍ଡ ପ୍ରହାର କରିଥିଲା । ଏଥିରେ ପିଓକେ ଓ ପାକିସ୍ତାନ ମୁଖ୍ୟ ଭୂମିରେ ଥିବା ୯ଟି ଆତଙ୍କବାଦୀ ଶିବିର ଧ୍ବସ୍ତ ହୋଇଛି । ପ୍ରାୟ ୭୦ରୁ ଅଧିକ ଆତଙ୍କୀ ସଫା ହୋଇଥିବା ସୂଚନା ରହିଛି । ଏଥିରେ ଜୈଶ-ଇ-ମହମ୍ମଦର ମୁଖ୍ୟ ମସୁଦ ଆଝହରର ପରିବାରରୁ ୧୪ଜଣ ପ୍ରାଣ ହରାଇଥିବା କୁହାଯାଉଛି । ଶହବାଜ ସରିଫ୍ ସରକାର ଆତଙ୍କବାଦୀଙ୍କ ବିରୋଧ କାର୍ଯ୍ୟାନୁଷ୍ଠାନ କରିବା ବଦଳରେ ସେମାନଙ୍କୁ ସମର୍ଥନ କରିଛି । ମେ’ ୮ରୁ ୯ ତାରିଖ ରାତିରେ ଭାରତୀୟ ସୀମାକୁ ଲାଗିଥିବା ଗାଁ ଗୁଡ଼ିକ ଟାର୍ଗେଟ୍ କରିଛି ପାକ୍ ସେନା । ଅସ୍ତ୍ରବିରତି ନିୟମକୁ ଉଲ୍ଲଙ୍ଘନ ବିଶେଷ କରି ଜମ୍ମୁ, ଶ୍ରୀନଗର, ଅବନ୍ତିପୁରା, ପଠାନକୋଟ୍, ଅମୃତସର, କପୁରଥାଲା, ଉଦମପୁର, ଲୁଧିଆନା, ଭଟିଣ୍ଡା, ଜଲନ୍ଦର, ଚଣ୍ଡିଗଡ଼, ଭୁଜ୍, ଜୈସଲମେର ଆଦି ଅଞ୍ଚଳରୁ ଟାର୍ଗେଟ୍ କରିଥିଲା ।
ଭାରତୀୟ ଏୟାର ଡିଫେନ୍ସ ସିଷ୍ଟମକୁ ଜାମ୍ କରିବା ପାଇଁ ଆତଙ୍କବାଦୀ ସଂଗଠନ ହମାସ ପ୍ରଣାଳୀକୁ ଆପଣାଇଥିଲା । ପ୍ରଥମରେ ଡ୍ରୋନ୍ ମାଧ୍ୟମରେ ଆକ୍ରମଣ କରିଥିଲା ପରେ ମିସାଇଲ୍ ମାଡ଼ କରିଥିଲା ପାକିସ୍ତାନ । ଏହି ସବୁ ଡ୍ରୋନ ଓ କ୍ଷେପଣାସ୍ତ୍ର ଗୁଡ଼ିକ ଭାରତର ଜନବସତି ଅଞ୍ଚଳକୁ ଟାର୍ଗେଟ୍ କରାଯାଇଥିଲା । ହେଲେ S-400, L-70 guns, Zu-23mm ଆଦି ବାୟୁ ପ୍ରତିରକ୍ଷା ପ୍ରଣାଳୀ ଦ୍ବାରା ଏହି ସବୁ ମାରଣାସ୍ତ୍ରକୁ ଆକାଶମାର୍ଗରେ ନଷ୍ଟ କରିଦିଆଯାଇଥିଲା । ତେବେ ଆସନ୍ତୁ ଜାଣିବା ଭାରତ ନିକଟରେ ଥିବା ଏୟାର ଡିଫେନ୍ସ ସିଷ୍ଟମ ବାବଦରେ ।
S-400 ସୁଦର୍ଶନ ଚକ୍ର:
ରୁଷରୁ କିଣିଥିବା ଅତ୍ୟାଧୁନିକ ଏସ୍-୪୦୦ ବାୟୁ ପ୍ରତିରକ୍ଷା ପ୍ରଣାଳୀ ଭାରତ ନିଜ ସୀମାରେ ମୁତୟନ କରିଛି । ପାକିସ୍ତାନ ପଟୁ ଆକ୍ରମଣ ହେବା କ୍ଷଣି, ଭାରତ ଏସ୍-୪୦୦ ମିସାଇଲକୁ ଆକ୍ଟିଭ କରିଛି । ଏହା ଜରିଆରେ ଶତ୍ରୁର ମିସାଇଲକୁ ଆକାଶରେ ଧ୍ୱଂସ କରାଯାଇଛି । ଭାରତ ଏହି ସିଷ୍ଟମକୁ ସୁଦର୍ଶନ ଚକ୍ର ନାଁ ଦେଇଛି । ଏସ୍-୪୦୦ ଏକ ଅତ୍ୟାଧୁନିକ ଏୟାର ଡିଫେନ୍ସ ସିଷ୍ଟମ । ଏହାକୁ ରୁଷର ଏଲମାଜ ସେଣ୍ଟ୍ରାଲ୍ ଡିଜାଇନ୍ ବ୍ୟୁରୋ ନିର୍ମାଣ କରିଛି । ଏହି ପ୍ରତିରକ୍ଷା ପ୍ରଣାଳୀ ୪୦୦ କିଲୋମିଟର ଦୂରରୁ ହିଁ ଶତ୍ରୁ ଗତିବିଧିକୁ ଚିହ୍ନଟ କରିପାରିବ । ଏହାସହ ଶତ୍ରୁର ଆକ୍ରଣମକୁ ବିଫଳ କରିବ । ଏହି ସିଷ୍ଟମ ମିସାଇଲ୍, ଡ୍ରୋନ, ଫାଇଟର୍ ଜେଟ୍ସ ଓ ରକେଟ୍ ଲଞ୍ଚର ପରି ଏୟାର ଷ୍ଟ୍ରାଇକକୁ ରୋକିବାରେ ସକ୍ଷମ । ଏହି ସିଷ୍ଟମ ୪୦୦ କିମି ଯାଏ ଟାର୍ଗେଟକୁ ଟିହ୍ନଟ କରି ଧ୍ୱଂସ କରିପାରିବ । 92N6E ନାମକ ରାଡାର ଏଥିରେ ଲାଗିଛି । ଯାହା ୬୦୦ କି.ମି ଦୂର ଯାଏ ମଲ୍ଟିପଲ୍ ଟାର୍ଗେଟକୁ ଟିହ୍ନଟ କରିପାରିବ । ଏକାସଙ୍ଗରେ ୧୬୦ ଟାର୍ଗେଟକୁ ଟିଡେକ୍ଟ କରିପାରିବ । ଏପରିକି ଗୋଟିଏ ଟାର୍ଗେଟ୍ ଉପରେ ଦୁଇଟି ମିସାଇଲ୍ ମାଡ଼ କରିପାରିବ । ଏହା ୩୦ କିଲୋମିଟର ଉଚ୍ଚ ଉଡ଼ୁଥିବା ଶତ୍ରୁର ଟାର୍ଗେଟକୁ ଆକାଶରେ ଧ୍ୱଂସ କରିପାରିବ ।
L-70 ଗନ୍ସ କ’ଣ?
ଶତ୍ରୁ ଦେଶର ଡ୍ରୋନ୍, ମିସାଇଲ୍ ଓ କମ୍ ଉଚ୍ଚରେ ଉଡ଼ୁଥିବା ଏୟାରକ୍ରାଫ୍ଟକୁ ଆକାଶରେ ପ୍ରତିହତ କରିବାକୁ L-70 ଗନ୍ସକୁ ଡିଜାଇନ କରାଯାଇଛି । ଏହା ଏକ ପୁରୁଣା ଓ ଆଧୁନିକ ଅସ୍ତ୍ରଶସ୍ତ୍ର ପ୍ରଣାଳୀର ମିଶ୍ରଣ । L-70 ବନ୍ଧୁକରେ 40mm ଆଣ୍ଟି-ଏୟାରକ୍ରାଫ୍ଟ ତୋପ ଖଞ୍ଜା ଯାଇଛି । ଯାହା ବିଶେଷ ଭାବେ ବୋଫର୍ସ ଦ୍ୱାରା ବିକଶିତ । ଏହି ଏୟାର ଡିଫେନ୍ସ ସିଷ୍ଟମରେ କମ୍ ଉଚ୍ଚତାରେ ଉଡ଼ୁଥିବା ଡ୍ରୋନ୍, ମିସାଇଲ୍ ଓ ଏୟାରକ୍ରାଷ୍ଟକୁ ଟାର୍ଗେଟ୍ କରିବାର କ୍ଷମତା ରହିଛି । ସଠିକ୍ ଓ ସ୍ୱୟଂ ଚାଳିତ ବ୍ୟବସ୍ଥା ଏଥିରେ ରହିଛି । L-70 ଗନ୍ସରେ ଅତ୍ୟାଧୁନିକ ଇଲେକ୍ଟ୍ରୋ-ଅପ୍ଟିକାଲ୍ ଅଗ୍ନି ନିୟନ୍ତ୍ରଣ ପ୍ରଣାଳୀକୁ ବିକଶିତ କରାଯାଇଛି ।
Zu-23mm ବାୟୁ ପ୍ରଣାଳୀ:
Zu-23mm ବାୟୁ ପ୍ରଣାଳୀ ହେଉଛି ଯୁଗ୍ମ-ବ୍ୟାରେଲ୍ । ସୋଭିଏତ୍ ଋଷ୍ ସମୟର ଆଣ୍ଟି-ଏୟାରକ୍ରାଫ୍ଟ ବନ୍ଧୁକ ସରଳତା ଓ ପ୍ରଭାବଶାଳୀ ପାଇଁ ଏପର୍ଯ୍ୟନ୍ତ ସେବାରେ ରହିଛି । Zu-23 ବାୟୁ ପ୍ରଣାଳୀ ବନ୍ଧୁକ ଏକ ସାଙ୍ଗରେ ସର୍ବାଧିକ ଥର ଫାୟାର କରିବା କ୍ଷମତା ରଖୁଛି । କମ୍ ଉଚ୍ଚରେ ଉଡ଼ୁଥିବା ଏୟାରକ୍ରାଫ୍ଟକୁ ମାରି ଖସାଇବା ପାଇଁ ଏଥିରେ ଡିଫେଣ୍ଡ ଷ୍ଟାଟିକ୍ ସିଷ୍ଟମ ଖଞ୍ଜା ଯାଇଛି । ସେହିପରି Zu-23mm ବନ୍ଧୁକରେ ରାଡାର ଓ ଅପ୍ଟିକାଲ୍ ଟାର୍ଗେଟିଂ ସିଷ୍ଟମ ଅପଗ୍ରେଡ୍ କରାଯାଇ ଯୋଡା ଯାଇଛି ।
ସିଲିକା ସିଷ୍ଟମ ZSU-23-4:
ସିଲିକା ଏୟାର ଡିଫେନ୍ସ ସିଷ୍ଟମ ZSU-23-4 ଭାବେ ଜଣାଶୁଣା । ଶତ୍ରୁ ଦେଶର ଡ୍ରୋନ, ମିସାଇଲ୍ ଓ ଯୁଦ୍ଧବିମାନକୁ ଅତ୍ୟାଧୁନିକ ପ୍ରତିହତ କରିବାକୁ ଏଥିରେ ଅତ୍ୟାଧୁନିକ ବ୍ୟବସ୍ଥା ରହିଛି । ଏହି ଏୟାର ଡିଫେନ୍ସ ସିଷ୍ଟମ ସ୍ବଂୟ ଚାଳିତ । ଆକାଶରେ ଶତ୍ରୁ ଦେଶର ଯୁଦ୍ଧବିମାନକୁ ଚିହ୍ନଟ କରି ମାରି ଖସାଇବାକୁ ଆଧୁନିକ ରାଡାର ଲାଗିଛି । ସିଲିକା ଅଣ୍ଟି ଏୟାରକ୍ରାଫ୍ଟ ବନ୍ଧୁକରେ ୨୩ଏମଏମର ଅଟୋ କ୍ୟାନନ ରହିଛି । ଯାହା ରିୟଲ୍ ଟାଇମ୍ ଯୁଦ୍ଧବିମାନ, ଡ୍ରୋନ୍ ଓ ଯୁଦ୍ଧବିମାନକୁ ଆକାଶ ମାର୍ଗରେ ମାରି ଖସାଇ ପାରିବ ।
