ନୂଆଦିଲ୍ଲୀ : ଜଷ୍ଟିସ୍ ବିଆର୍ ଗବାଇ ହେବେ ଦେଶରେ ପରବର୍ତ୍ତୀ ପ୍ରଧାନ ବିଚାରପତି । ନ ସିଜେଆଇ ସଞ୍ଜୀବ ଖନ୍ନାଙ୍କ ଦ୍ୱାରା ଜଷ୍ଟିସ୍ ଗବାଇଙ୍କ ନାଁ ସୁପାରିଶ କରାଯିବା ପରେ ବିଧିବଦ୍ଧ ପ୍ରକାଶ ପାଇଛି ବିଜ୍ଞପ୍ତି । ରାଷ୍ଟ୍ରପତି ଦ୍ରୌପଦୀ ମୁର୍ମୁ ଜଷ୍ଟିସ ଗବାଇଙ୍କୁ ଶପଥ ପାଠ କରାଇବେ । ଆସନ୍ତା ମେ ୧୪ ତାରିଖରେ ଦେଶର ୫୨ତମ ପ୍ରଧାନ ବିଚାରପତି ଭାବେ ସେ ଶପଥ ନେବେ । ତାଙ୍କ କାର୍ଯ୍ୟକାଳ ୨୦୨୫ ନଭେମ୍ୱର ୨୩ ଯାଏଁ ରହିବ । ଏହି ଅବସରରେ ଆସନ୍ତୁ ଜାଣିବା ଜଷ୍ଟିସ୍ ବିଆର୍ ଗବାଇଙ୍କ ବିଷୟରେ।

ଜଷ୍ଟିସ ଗବାଇଙ୍କ ପୂରା ନାମ ଭୂଷଣ ରାମକୃଷ୍ଣ ଗବାଇ । ୧୯୬୦ ନଭେମ୍ବର ୨୪ରେ ମହାରାଷ୍ଟ୍ରର ଅମରାବତୀରେ ତାଙ୍କ ଜନ୍ମ । ୧୯୮୫ ମସିହାରେ ସେ ନିଜର ଆଇନଗତ ବୃତ୍ତି ଆରମ୍ଭ କରିଥିଲେ । କ୍ୟାରିୟର ଆରମ୍ଭରେ ସେ ଜଣାଶୁଣା ଆଇନଜୀବୀ ତଥା ତତ୍କାଳୀନ ଏଜି ସ୍ୱର୍ଗତ ରାଜା ଏସ୍. ଭୋନଲେଙ୍କ ପାଖରେ ଲ’ ପ୍ରାକ୍ଟିସ୍ କରିଥିଲେ । ଏହାପରେ ୧୯୮୭ ରୁ ୧୯୯୦ ପର୍ଯ୍ୟନ୍ତ ସେ ବମ୍ୱେ ହାଇକୋର୍ଟରେ ଓକିଲାତି ଆରମ୍ଭ କରିଥିଲେ । ଜଷ୍ଟିସ୍ ଗବାଇ ଫୋକସ୍ ସାମ୍ୱିଧାନିକ ଓ ପ୍ରଶାସନିକ ଆଇନ ଉପରେ ଅଧିକ ରହିଛି । ୧୯୯୨ ଅଗଷ୍ଟରେ ବମ୍ୱେ ହାଇକୋର୍ଟଙ୍କ ନାଗପୁର ବେଞ୍ଚରେ ଅତିରିକ୍ତ ସରକାରୀ ଓକିଲ ଭାବେ ନିଯୁକ୍ତି ପାଇଥିଲେ । ପରେ ୨୦୦୦ ମସିହାରେ ନାଗପୁର ବେଞ୍ଚରେ ହିଁ ପବ୍ଲିକ୍ ପ୍ରୋସିକ୍ୟୁଟର ହୋଇଥିଲେ । ୨୦୦୩ ନଭେମ୍ୱର ୧୪ରେ ବମ୍ୱେ ହାଇକୋର୍ଟର ଅତିରିକ୍ତ ଜଜ୍ ଭାବେ ନିଯୁକ୍ତି ପାଇଥିଲେ । ଏହାପରେ ୨୦୦୫, ନଭେମ୍ବର ୧୨ରେ ସେ ହାଇକୋର୍ଟର ସ୍ଥାୟୀ ବିଚାରପତି ହୋଇଥିଲେ । ୨୦୧୯ ମେ ୨୪ ତାରିଖରେ ତାଙ୍କୁ ସୁପ୍ରିମକୋର୍ଟକୁ ପଦୋନ୍ନତି କରାଯାଇଥିଲା । ସେବେଠାରୁ ସୁପ୍ରିମକୋର୍ଟର ଅନେକ ସାମ୍ବିଧାନିକ ଖଣ୍ଡପୀଠର ସେ ଅଂଶ ରହିଛନ୍ତି। ଆଉ ଅନେକ ଐତିହାସିକ ରାୟ ଦେଇଛନ୍ତି । ଆସନ୍ତୁ ନଜର ପକାଇବା ତାଙ୍କର କିଛି ରାୟ ବିଷୟରେ... 

-ଜମ୍ମୁ-କଶ୍ମୀରରୁ ଧାରା ୩୭୦କୁ ଉଚ୍ଛେଦ କରିବା ପାଇଁ କେନ୍ଦ୍ରର ନିଷ୍ପତ୍ତିକୁ ସର୍ବସମ୍ମତିକ୍ରମେ ସମର୍ଥନ କରିଥିବା ପାଞ୍ଚ ଜଣିଆ ଖଣ୍ଡପୀଠର ସଦସ୍ୟ ଥିଲେ ଜଷ୍ଟିସ ଗବାଇ । 

-ରାଜନୈତିକ ଦଳକୁ ମିଳୁଥିବା ଇଲେକ୍ଟୋରାଲ୍ ବଣ୍ଡ ଯୋଜନାର ବୈଧତା ଉପରେ ଶୁଣାଣି ହୋଇଥିଲା। ଯେଉଁ ଖଣ୍ଡପୀଠର ସଦସ୍ୟ ଥିଲେ ଗବାଇ । 

- ଜଷ୍ଟିସ୍ ଗଭାଇ ସେହି ପାଞ୍ଚ ଜଣିଆ ସମ୍ବିଧାନ ଖଣ୍ଡପୀଠର ମଧ୍ୟ ଅଂଶ ଥିଲେ, ଯେଉଁମାନେ ୪:୧ ବହୁମତରେ କେନ୍ଦ୍ର ସରକାରଙ୍କ ୨୦୧୬ରେ ୧୦୦୦ ଏବଂ ୫୦୦ ଟଙ୍କା ନୋଟ୍ ଅଚଳ କରିବାର ନିଷ୍ପତ୍ତିକୁ ଅନୁମୋଦନ କରାଯାଇଥିଲା।

- ଜଷ୍ଟିସ୍ ଗଭାଇ ସାତ ଜଣିଆ ସମ୍ବିଧାନ ଖଣ୍ଡପୀଠର ଅଂଶ ଥିଲେ, ଯେଉଁମାନେ୬:୧ବହୁମତରେ ନିଷ୍ପତ୍ତି ନେଇଥିଲେ ଯେ ରାଜ୍ୟଗୁଡ଼ିକର ଅନୁସୂଚିତ ଜାତି ମଧ୍ୟରେ ଉପ-ବର୍ଗୀକରଣ କରିବାର ସାମ୍ବିଧାନିକ ଅଧିକାର ଅଛି। ଯାହା ଦ୍ଵାରା ସାମାଜିକ ଏବଂ ଶିକ୍ଷାଗତ ଭାବରେ ଅଧିକ ପଛୁଆ ଥିବା ଜାତିଗୁଡ଼ିକର ଉନ୍ନତି ପାଇଁ ସଂରକ୍ଷଣ ଦିଆଯାଇପାରିବ।

-ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତିରେ, ଜଷ୍ଟିସ୍ ଗବାଇଙ୍କ ନେତୃତ୍ୱାଧୀନ ଖଣ୍ଡପୀଠ ସର୍ବଭାରତୀୟ ନିର୍ଦ୍ଦେଶାବଳୀ ଜାରି କରିଥିଲେ। ଯେଉଁଥିରେ ସେ କହିଥିଲେ 'କାରଣ ଦର୍ଶାଅ' ନୋଟିସ୍ ପ୍ରଦାନ ନକରି କୌଣସି ସମ୍ପତ୍ତିକୁ କେହି ଭାଙ୍ଗି ପାରିବେ ନାହିଁ। ଏହା ସହ  ପ୍ରଭାବିତ ଲୋକଙ୍କ ଜବାବ ପାଇଁ ୧୫ ଦିନ ସମୟ ଦିଆଯିବା ଦରକାର।

- ଜଷ୍ଟିସ୍ ଗବାଇ ଜଙ୍ଗଲ, ବନ୍ୟପ୍ରାଣୀ ଏବଂ ଗଛ ସଂରକ୍ଷଣ ସହିତ ଜଡିତ ମାମଲାର ଶୁଣାଣି କରିଥିବା ଖଣ୍ଡପୀଠର ମଧ୍ୟ ନେତୃତ୍ୱ ନେଉଛନ୍ତି।

-ବଡ଼ କଥା ହେଉଛି ଦେଶର ୫୨ତମ CJI ହେବାକୁ ଯାଉଥିବା ଜଷ୍ଟିସ୍ ଗବାଇ ଅନୁସୂଚିତ ଜାତିରେ ଦ୍ୱିତୀୟ ପ୍ରଧାନ ବିଚାରପତି ହେବେ।  ତାଙ୍କ ପୂର୍ବରୁ ଜଷ୍ଟିସ୍ ବାଲ କୃଷ୍ଣ ୨୦୦୭ରେ ସୁପ୍ରିମକୋର୍ଟର ଚିଫ୍ ଜଷ୍ଟିସ୍ ହୋଇଥିଲେ।