ୟୁଏସଏସ୍ ଆବ୍ରାହମ ଲିଙ୍କନ ଉପରେ କ୍ଷେପଣାସ୍ତ୍ର ମାଡ଼ କଲା ଇରାନ୍‌, ଚିନ୍ତାରେ ଆମେରିକା !

ନୂଆଦିଲ୍ଲୀ: ଆମେରିକା ଏବଂ ଇସ୍ରାଏଲ ସହିତ ସାମରିକ ସଂଘର୍ଷ ବୃଦ୍ଧି ପାଇବା ମଧ୍ୟରେ ଇରାନ ଏକ ବଡ଼ ଦାବି କରିଛି। ଇରାନର ରିଭୋଲ୍ୟୁସନାରୀ ଗାର୍ଡ ବା IRGC କହିଛି ଯେ, ଏହା ଆମେରିକୀୟ ନୌସେନା ବିମାନ ବାହକ USS ଆବ୍ରାହମ ଲିଙ୍କନକୁ ଟାର୍ଗେଟ କରି ଚାରୋଟି ବାଲିଷ୍ଟିକ୍ କ୍ଷେପଣାସ୍ତ୍ର ମାଡ଼ କରିଛି। କିନ୍ତୁ ଜଣେ ଆମେରିକୀୟ ଅଧିକାରୀ କହିଛନ୍ତି ଯେ, ୟୁଏସଏସ୍ ଆବ୍ରାହମ ଲିଙ୍କନ ଉପରେ ଇରାନର କ୍ଷେପଣାସ୍ତ୍ର ଆକ୍ରମଣ ଦ୍ୱାରା ବିମାନ ବାହକ ପ୍ରଭାବିତ ହୋଇନାହିଁ ।

IRGC ଏକ ସରକାରୀ ବିବୃତ୍ତିରେ କହିଛି ଯେ, ଅପରେସନ୍ ଟ୍ରୁ ପ୍ରମିଜ୍-୪ର ଅଂଶ ଭାବରେ ଆମେରିକା ଏବଂ ଇସ୍ରାଏଲ ସାମରିକ ଘାଟି ଉପରେ ଆକ୍ରମଣ ଜାରି ରହିଛି। ଏହି ଅପରେସନ୍ ସମୟରେ, ଆମେରିକାର ବିମାନ ବାହକ ଆବ୍ରାହମ ଲିଙ୍କନ୍ ଉପରେ ଚାରୋଟି ବାଲିଷ୍ଟିକ୍ କ୍ଷେପଣାସ୍ତ୍ର ନିକ୍ଷେପ କରାଯାଇଛି । ଏହି ବିବୃତ୍ତି ଇରାନୀ ସମାଚାର ଏଜେନ୍ସି ଦ୍ୱାରା ଜାରି କରାଯାଇଛି। ସେପଟେ ଇରାନ୍ର ଦାବି ଉପରେ ଆମେରିକା ପକ୍ଷରୁ କୌଣସି ସୂଚନା ମିଳିପାରି ନାହିଁ ।

ଇରାନ ସଶସ୍ତ୍ର ବାହିନୀର ଅଭିଯାନ ଏବେ ଏକ ନୂତନ ପର୍ଯ୍ୟାୟରେ ପ୍ରବେଶ କରିଛି ବୋଲି ଆଇଆରଜିସି କହିଛି । ଆକ୍ରମଣ ଏବେ ସ୍ଥଳ ଏବଂ ସମୁଦ୍ର ଉଭୟ କ୍ଷେତ୍ରରେ ତୀବ୍ରତର କରାଯିବ। ବିବୃତ୍ତିରେ ଆହୁରି କୁହାଯାଇଛି ଯେ, ଆମେରିକା ଏବଂ ଇସ୍ରାଏଲ ବିରୁଦ୍ଧରେ ଅଭିଯାନ ନିରନ୍ତର ଜାରି ରହିବ ଏବଂ ଏହି ଅଞ୍ଚଳରେ ସାମରିକ ଚାପ ବୃଦ୍ଧି କରାଯିବ।

ବିଶେଷଜ୍ଞମାନଙ୍କ ଅନୁସାରେ, ଯଦି ସମୁଦ୍ରରେ ମୁତୟନ ହୋଇଥିବା ଆମେରିକୀୟ ଯୁଦ୍ଧଜାହାଜକୁ ଟାର୍ଗେଟ କରାଯାଏ, ତେବେ ସଂଘର୍ଷ ଆହୁରି ବଢ଼ିପାରେ। ବିମାନ ବାହକ ଜାହାଜଗୁଡ଼ିକୁ ଯେକୌଣସି ଦେଶର ସବୁଠାରୁ ଶକ୍ତିଶାଳୀ ସାମରିକ ଶକ୍ତି ଭାବରେ ବିବେଚନା କରାଯାଏ। ତେଣୁ, ଏପରି ଦାବିକୁ ପଶ୍ଚିମ ଏସିଆରେ ଯୁଦ୍ଧର ପରିସର ବୃଦ୍ଧି ପାଇବାର ଏକ ସଙ୍କେତ ଭାବରେ ଦେଖାଯାଉଛି।