ନୂଆପଡ଼ାରେ ନୂଆ ଡ୍ରାମା, ବିଜେପିରେ ସାମିଲ ହୋଇପାରନ୍ତି ଜୟ ଢୋଲକିଆ

ଭୁବନେଶ୍ୱର ୧୧।୧୦: ନୂଆପଡ଼ାରେ ନୂଆଡ୍ରାମା। ଗୋଟିଏ ପଟେ କଂଗ୍ରେସ ନିଜର ପ୍ରାର୍ଥୀ ଘୋଷଣା କରିଥିବା ବେଳେ ଦୁଇ ଦଳ ବିଜେଡି-ବିଜେପି ଏବେ ଯାଏଁ ନିଜର ପ୍ରାର୍ଥୀ ଘୋଷଣା କରିନାହାନ୍ତି । ଉଭୟ ଦଳ ମଧ୍ୟରେ ପ୍ରାର୍ଥୀ ଘୋଷଣା ପାଇଁ ଚାଲିଛି ଛକାପଞ୍ଝା । ଘନ ଘନ ବୈଠକ ବସୁଛି, ହେଲେ ପ୍ରାର୍ଥୀଙ୍କ ନାଁରେ ବାଜିପାରୁନି ମୋହର । ଏବେ ନୂଆପଡ଼ା ରାଜନୀତିରେ ଆସୁଛି ନୂଆ ଟ୍ୱିଷ୍ଟ । ବିଜେପିରେ ସାମିଲ ହୋଇପାରନ୍ତି ରାଜେନ୍ଦ୍ର ଢୋଲକିଆଙ୍କ ପୁଅ ଜୟ ଢୋଲକିଆ ।

ନୂଆପଡ଼ା ଉପନିର୍ବାଚନ ଲାଗି ବିଜେପି ପ୍ରାର୍ଥୀ କିଏ ହେବ , ସେନେଇ ଚର୍ଚ୍ଚା ଆଲୋଚନା ଚାଲିଛି । ଏସବୁ ଭିତରେ ଜୟ ଢୋଲକିଆ ବିଜେପିରେ ସାମିଲ ହେବା ନେଇ ଖବର ଆସୁଛି । ଶନିବାର ଦିନ ରାଜ୍ୟ ବିଜେପି କାର୍ଯ୍ୟାଳୟରେ ରାଜ୍ୟ ବିଜେପି ସଭାପତିଙ୍କ ଉପସ୍ଥିତିରେ ସାମିଲ ହୋଇପାରନ୍ତି । ନୂଆପଡାର ପୂର୍ବତନ ବିଧାୟକ ସ୍ବର୍ଗତ ରାଜେନ୍ଦ୍ର ଢୋଲକିଆଙ୍କ ଦେହାନ୍ତ ପରେ ନୂଆପଡାରେ ଉପ ନିର୍ବାଚନ ହେବାକୁ ଯାଉଛି । ସ୍ବର୍ଗତ ରାଜେନ୍ଦ୍ର ଢୋଲକିଆ ବିଜେଡ଼ିରୁ ବିଧାୟକ ଥିବାବେଳେ ତାଙ୍କ ପୁଅ ବିଜେଡ଼ି ଟିକେଟରୁ ଲଢ଼ିବା ନେଇ ଚର୍ଚ୍ଚା ହେଉଥିଲା । ସବୁ କଳ୍ପନା ଜଳ୍ପନାର ଅନ୍ତ ଘଟାଇ ଜୟ ଢୋଲକିଆ ବିଜେପିରେ ଯୋଗଦାନ କରିବା ନେଇ ସୂଚନା ରହିଛି । ଅନ୍ୟପଟେ କଂଗ୍ରେସ ନିଜର ପ୍ରାର୍ଥୀ  ଘୋଷଣା କରିସାରିଛି । ଜୟ ଢୋଲକିଆ ବିଜେପିରେ ମିଶିବା ପରେ ଜୟ ହିଁ ବିଜେପି ପ୍ରାର୍ଥୀ ହୋଇପାରନ୍ତି।