ନୂଆଦିଲ୍ଲୀ: କର୍ଣ୍ଣାଟକରେ ବେସରକାରୀ ଚାକିରିରେ ସଂରକ୍ଷଣ ପ୍ରସଙ୍ଗକୁ ନେଇ ଉଠିଥିବା ବିବାଦ ଏବେବି ଥମିନାହିଁ। ହେଲେ ଏହାରି ମଧ୍ୟରେ ଉଠିଛି ଆଉ ଏକ ବିବାଦ। ଆଇଟି କମ୍ପାନିମାନେ କର୍ମଚାରୀଙ୍କ କାମ କରିବା ସମୟକୁ ୧୦ ଘଣ୍ଟାରୁ ୧୪ ଘଣ୍ଟାକୁ ବଢ଼ାଇବାକୁ ଏକ ପ୍ରସ୍ତାବ ରଖିଛନ୍ତି। ଆଉ ଏହି ପ୍ରସ୍ତାବ ଉପରେ ରାଜ୍ୟ ସରକାର ବିଚାର କରୁଥିବା ନେଇ ଜଣାପଡ଼ିଛି।
ସେପଟେ ଏହି ପ୍ରସ୍ତାବକୁ ଆଇଟି କର୍ମଚାରୀ ୟୁନିୟନ କଡ଼ା ଆପତ୍ତି ଦର୍ଶାଇଛି। ସଂଗଠନ କର୍ଣ୍ଣାଟକ ସରକାରଙ୍କୁ ଏହି ପ୍ରସ୍ତାବ ଉପରେ ଠିକ୍ ଭାବରେ ବିଚାର କରିବାକୁ କହିଛନ୍ତି। ୟୁନିୟନ ଏହାକୁ କମ୍ପାନିଙ୍କ ଷଡ଼ଯନ୍ତ୍ର ବୋଲି କହିବା ସହ କର୍ମଚାରୀଙ୍କୁ ଗୁଲାମ କରାଇବାକୁ ମଧ୍ୟ ଷଡ଼ଯନ୍ତ୍ର କରାଯାଉଛି ବୋଲି କହିଚି। ଏହା ଦ୍ବାରା ଅଧିକ ସଂଖ୍ୟାରେ ଲୋକଙ୍କ ଚାକିରି ମଧ୍ୟ ଯାଇପାରେ। ଏହା ସହ ଏତେ ଘଣ୍ଟା ଧରି କାମ କରିବା ଫଳରେ ଅଧିକାଂଶ ଲୋକଙ୍କ ସ୍ବାସ୍ଥ୍ୟାବସ୍ଥା ଖରାପ ହୋଇପାରେ ବୋଲି ମଧ୍ୟ କହିଛି ସଂଗଠନ।
ରିପୋର୍ଟ ଅନୁଯାୟୀ, କର୍ଣ୍ଣାଟକ ସରକାର ‘କର୍ଣ୍ଣାଟକ ସପ୍ସ ଆଣ୍ଡ୍ କମର୍ସିଆଲ ଏଷ୍ଟାବ୍ଲିଶ୍ମେଶ୍ଟ ଆକ୍ଟ ୧୯୬୧’ରେ ସଂଶୋଧନ ଉପରେ ବିଚାର କରୁଛନ୍ତି। ଆଇଟି କମ୍ପାନିମାନେ ଚାହୁଛନ୍ତି ଯେ, ଏହି ପ୍ରସ୍ତାକୁ ସଂଶୋଧନରେ ସାମିଲ କରାଯାଉ। ଏହା ଦ୍ବାରା କାମ କରିବା ସମୟ ଆଇନତଃ ବଢ଼ି ୧୪ ଘଣ୍ଟା ହୋଇଯିବ।
ତେବେ କର୍ଣ୍ଣାଟକ ଆଇଟି ୟୁନିୟନ (KITU) କହିଛି ବର୍ତ୍ତମାନ ସର୍ବାଧିକ ୧୨ ଘଣ୍ଟା କାମ କରିବା ପାଇଁ ନିୟମ ଅଛି। ହେଲେ ଏବେ ସରକାର ଓ୍ବାର୍କିଂ ଆଓ୍ବାରକୁ ବଢ଼ାଇ ୧୪ ଘଣ୍ଟା କରିପାରନ୍ତି। କର୍ମଚାରୀ ୟୁନିୟନ କହିଛି ଯଦି ସରକାର ଏହି ନିୟମ ଲାଗୁ କରିଦେବେ ତେବେ କମ୍ପାନିଙ୍କୁ ତିନି ସିଫ୍ଟ ବଦଳରେ ଦୁଇ ଶିଫ୍ଟ ସିଷ୍ଟମ ଲାଗୁ କରିବାକୁ ସୁଯୋଗ ମିଳିଯିବ। ଏହାଦ୍ବାରା କମ୍ପାନିମାନେ ଏକ-ତୃତୀୟାଂଶ ଓ୍ବାର୍କଫୋର୍ସକୁ ହଟାଇବାକୁ ଚେଷ୍ଟା କରିବେ।
ସେହିଭଳି ସ୍ବାସ୍ଥ୍ୟାବସ୍ଥାକୁ ନେଇ ସଂଗଠନ କହିଛି ଯେ, ବଢ଼ିଥିବା କାମ ସମୟରେ ଫଳରେ କର୍ମଚାରୀଙ୍କ ଠାରେ ରୋଗ ଆଶଙ୍କା ବଢ଼ିଯିବ। ଆଇଟି ସେକ୍ଟରରେ ୪୫ ପ୍ରତିଶତ କର୍ମଚାରୀ ଏମିତିରେ ବି, ମାନସିକ ସ୍ବାସ୍ଥ୍ୟ ସମ୍ବନ୍ଧୀୟ ଅସୁବିଧା ଏବଂ ଅବସାଦର ସାମ୍ନା କରୁଛନ୍ତି । ୫୫ ପ୍ରତିଶତ କର୍ମଚାରୀଙ୍କୁ ସ୍ବାସ୍ଥ୍ୟ ସମ୍ବନ୍ଧୀୟ ଅସୁବିଧା ରହିଛି। କାମ ସମୟ ବଢ଼ାଇବା ଦ୍ବାରା ସ୍ଥିତି ଆହୁରି ଗମ୍ଭୀର ହୋଇଯିବ। ସଂଗଠନ କହିଛି କର୍ଣ୍ଣାଟକ ସରକାରଙ୍କୁ ଆଇନରେ ସଂଶୋଧନ ପୂର୍ବରୁ ବିଚାର କରିବା ଦରକାର। ଯଦି ପ୍ରସ୍ତାବିତ ସଂଶୋଧନ କରାଯାଉଛି ଯେତେ ଆଇଟି ସେକ୍ଟରରେ ୨୦ ଲକ୍ଷ କର୍ମଚାରୀଙ୍କ ଉପରେ ଏହାର ପରିଣାମ ଭୋଗିବାକୁ ପଡ଼ିବ।
ସଂଗଠନ ଆହୁରି କହିଛନ୍ତି କର୍ମଚାରୀଙ୍କ ଉପରେ ଅମାନବୀୟ ଗୁଲାମୀ କରିବାକୁ ଚେଷ୍ଟା କରାଯାଉଛି। ସୂଚନାଥାଉକି, ଏହି ପ୍ରସ୍ତାବରେ କୁହାଯାଇଛି ଯେ, IT/ITes/BPO ସେକ୍ଟରରେ ଦିନରେ ୧୨ ଘଣ୍ଟାରୁ ଅଧିକ କାମ କରିବାର ଆବଶ୍ୟକତା ରହିଛି। ଅବଶ୍ୟ ଲଗାତାର ତିନି ମାସରେ କାମ କରିବାର ଘଣ୍ଟା ୧୨୫ ଘଣ୍ଟାରୁ ଅଧିକ ହୋଇପାରିବନି। ଏହି ପ୍ରସ୍ତାବର ବିରୋଧ କରିବା ପରେ ଶ୍ରମ ମନ୍ତ୍ରୀ କୌଣସି ନିଷ୍ପତ୍ତି ପୂର୍ବରୁ ଚର୍ଚ୍ଚା କରିବା କଥା କହିଛନ୍ତି।
