ନୂଆଦିଲ୍ଲୀ: ସୁନା ଦରର ଅହେତୁକ ବୃଦ୍ଧି ଯୋଗୁ ଭାରତରେ ସୁନା ଚାହିଦା ତୀବ୍ର ହ୍ରାସ ପାଇଛି। ୨୦୨୫ରେ ଭାରତରେ ସୁନା କ୍ରୟ ୫ ବର୍ଷର ସର୍ବନିମ୍ନ ସ୍ତରକୁ ଖସି ଆସିବ ବୋଲି ଗୁରୁବାର ବିଶ୍ୱ ସୁନା ପରିଷଦ ସୂଚନା ଦେଇଛି। ବିଶ୍ୱ ସୁନା ପରିଷଦ(ଡବ୍ଲୁଜିସି) ଗୁରୁବାର ଦିନ କହିଛି ଯେ ୨୦୨୫ ମସିହାରେ ଭାରତର ସୁନା ବ୍ୟବହାର ପାଞ୍ଚ ବର୍ଷର ସର୍ବନିମ୍ନ ସ୍ତରକୁ ଖସିଯିବ। କାରଣ ଦରରେ ରେକର୍ଡ ବୃଦ୍ଧି ଅଳଙ୍କାର କ୍ରୟକୁ ପ୍ରଭାବିତ କରୁଛି। ଯାହା ନିବେଶ ଚାହିଦାରେ ସାମାନ୍ୟ ବୃଦ୍ଧିକୁ ପ୍ରଭାବିତ କରୁଛି ବୋଲି ଡବ୍ଲୁଜିସି କହିଛି।
ଏନେଇ ଡବ୍ଲୁଜିସିର ଭାରତୀୟ ଅପରେସନ ସିଇଓ ସଚିନ ଜୈନ ରଏଟର୍ସ ପ୍ରତିକ୍ରିୟା ଦେଇ କହିଛନ୍ତି,ଭାରତ ବିଶ୍ୱର ଦ୍ୱିତୀୟ ବୃହତ୍ତମ ସୁନା ଉପଭୋକ୍ତା ଦେଶର। ଏଠାରେ ସୁନା ଚାହିଦା ୨୦୨୫ରେ ୬୦୦ ମେଟ୍ରିକ୍ ଟନରୁ ୭୦୦ ମେଟ୍ରିକ୍ ଟନ୍ ମଧ୍ୟରେ ରହିପାରେ। ଯାହା ୨୦୨୦ ପରଠାରୁ ସର୍ବନିମ୍ନ ହୋଇଥିବା ବେଳେ ଗତ ବର୍ଷର ହୋଇଥିବା ୮୦୨.୮ ଟନ୍ କ୍ରୟ ତୁଳନାରେ କମ୍ ହେବ।
ଯଦି ସୁନା ମୂଲ୍ୟ ସ୍ଥିର ରହିଲା ତେବେ ଏହା ୭୦୦ ଟନ୍ ପର୍ଯ୍ୟନ୍ତ ପହଞ୍ଚିପାରେ। କିନ୍ତୁ ଭୂରାଜନୈତିକ କାରଣ ଯୋଗୁ ଯଦି ଏଥିରେ ୧୦ରୁ ୧୫ ପ୍ରତିଶତ ବୃଦ୍ଧି ହେଲା ତେବେ କ୍ରୟ ଆକଳନ ଠାରୁ ବି ତଳକୁ ଖସିପାରେ ବୋଲି ଡବ୍ଲୁଜିସିର ଭାରତୀୟ ଅପରେସନ ସିଇଓ କହିଛନ୍ତି।
ଜୁନ୍ ମାସରେ ସ୍ଥାନୀୟ ସୁନା ମୂଲ୍ୟ ପ୍ରତି ୧୦ ଗ୍ରାମ ୧୦୧,୦୭୮ ଟଙ୍କାର ରେକର୍ଡ ଉଚ୍ଚତାରେ ପହଞ୍ଚିଛି। ୨୦୨୫ରେ ଏପର୍ଯ୍ୟନ୍ତ ସୁନା ମୂଲ୍ୟ ୨୮ ପ୍ରତିଶତ ବୃଦ୍ଧି ପାଇଲାଣି। ଯାହା ୨୦୨୪ରେ ୨୧ ପ୍ରତିଶତ ଥିଲା। WGC କହିଛି ଯେ ଏପ୍ରିଲରୁ ଜୁନ୍ ତ୍ରୈମାସିକରେ ଭାରତର ସୁନା ବ୍ୟବହାର ଗତ ବର୍ଷ ତୁଳନାରେ ୧୦% ହ୍ରାସ ପାଇ ୧୩୪.୯ ଟନ୍ ହୋଇଛି। କାରଣ ଅଳଙ୍କାର ଚାହିଦା ୧୭% ହ୍ରାସ ପାଇଛି ଏବଂ ନିବେଶ ଚାହିଦା ୭% ବୃଦ୍ଧି ପାଇଛି।
ଜୈନ କହିଛନ୍ତି ଯେ, ସେପ୍ଟେମ୍ବର ତ୍ରୈମାସିକରେ ଚାହିଦା ଗତ ବର୍ଷର ୨୪୮.୩ ଟନ୍ ତୁଳନାରେ କମ୍ ରହିବ ବୋଲି ଆଶା କରାଯାଉଛି। ସୁନା ଅନ୍ୟ ସମ୍ପତ୍ତି ଶ୍ରେଣୀଗୁଡ଼ିକୁ ପଛରେ ପକାଇ ଦେଇଥିବାରୁ ନିବେଶକମାନେ ଫିଜିକାଲ ଗୋଲ୍ଡ ଏବଂ ଗୋଲ୍ଡ ଏକ୍ସଚେଞ୍ଜ ଟ୍ରେଡେଡ୍ ପାଣ୍ଠିକୁ ପସନ୍ଦ କରୁଛନ୍ତି। ଜୈନ କହିଚନ୍ତି "ଭାରତରେ ସୁନା ETF(ଏକ୍ସଚେଞ୍ଜ ଟ୍ରେଡ୍ ଫଣ୍ଡ) ଅଭିବୃଦ୍ଧି ପାଇଁ ଏକ ଗୁରୁତ୍ୱପୂର୍ଣ୍ଣ ସୋପାନରେ ଅଛି। ଏବଂ ଭାରତ ଅଧିକ ଡିଜିଟାଇଜେଡ୍ ହେବା ଯୋଗୁ ଏଗୁଡ଼ିକ ଅଧିକ ଲୋକପ୍ରିୟ ଓ ପ୍ରମୁଖରେ ରହୁଛନ୍ତି।"
ଏହି ମାସର ପ୍ରାରମ୍ଭରେ ଭାରତୀୟ ମ୍ୟୁଚୁଆଲ୍ ଫଣ୍ଡ ଆସୋସିଏସନ ତଥ୍ୟ କହୁଛି ଜୁନ୍ ମାସରେ ଭାରତରେ ସୁନା ଇଟିଏଫ୍ ଗୁଡ଼ିକର ପ୍ରବାହ ମାସିକ ଦଶ ଗୁଣ ବୃଦ୍ଧି ପାଇ ୨୦.୮୧ ବିଲିୟନ ଟଙ୍କା ($୨୩୭.୫ ବିଲିଅନ) ହୋଇଛି। ଯାହା ପାଞ୍ଚ ମାସର ସର୍ବୋଚ୍ଚ ସ୍ତରରେ ପହଞ୍ଚିଛି।
