ଶାନ୍ତି ପ୍ରସ୍ତାବରେ ଅରାଜି ନେତାନ୍ୟାହୁ ! ଗାଜାରେ IDFର ଗୁଳିବର୍ଷା, ୭ ମୃତ

ନୂଆଦିଲ୍ଲୀ: ଇସ୍ରାଏଲକୁ ଗାଜା ଉପରେ ବୋମାମାଡ଼ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ହମାସ ଶାନ୍ତି ପାଇଁ ପ୍ରସ୍ତୁତ। ଯୁଦ୍ଧ ଶେଷ କରିବା ପାଇଁ ଆମେରିକା ଯୋଜନାର କିଛି ଅନ୍ୟ ସର୍ତ୍ତ ଗ୍ରହଣ କରିବାକୁ ରାଜି ହୋଇଥିଲେ ପିଏମ୍‌ ନେତାନ୍ୟାହୁ। ତଥାପି ଏହି ନିର୍ଦ୍ଦେଶ ସତ୍ତ୍ୱେ ଇସ୍ରାଏଲ ନିଜ ଜିଦରେ ଅଟଳ। ପୁଣି ଗାଜାରେ ଗୁଳିବର୍ଷା କରିଛି ଆଇଡିଏଫ। ଗାଜା ଅଧିକାରୀମାନେ ରିପୋର୍ଟ କରିଛନ୍ତି ଯେ ଇସ୍ରାଏଲ ଶନିବାର ଗାଜା ଉପରେ ଆକ୍ରମଣ କରିଛି। ଇସ୍ରାଏଲୀ ଗୁଳିମାଡ଼ ଯୋଗୁଁ ଗାଜା ଷ୍ଟ୍ରିପରେ ୭ ଜଣ ପ୍ରାଣ ହରାଇଛନ୍ତି। ଗାଜା ସହରର ଚାରି ଜଣ ପ୍ରାଣ ହରାଇଥିଲେ, ଦକ୍ଷିଣର ଖାନ ୟୁନିସରେ ଅନ୍ୟ ଦୁଇଜଣ ପ୍ରାଣ ହରାଇଥିଲେ।

ରାଷ୍ଟ୍ରପତି ଟ୍ରମ୍ପ କିଛି ଦିନ ପୂର୍ବରୁ ତାଙ୍କର 20-ସୂତ୍ରୀ ଗାଜା ଶାନ୍ତି ଯୋଜନା ଉପସ୍ଥାପନ କରିଥିଲେ। ଅକ୍ଟୋବର 5 ସୁଦ୍ଧା ଏହାକୁ ଗ୍ରହଣ କରିବାକୁ ନଚେତ୍ ଗମ୍ଭୀର ପରିଣାମର ସମ୍ମୁଖୀନ ହେବାକୁ ଚେତାବନୀ ଦେଇଥିଲେ। ଟ୍ରମ୍ପ ଦାବି କରିଛନ୍ତି ଯେ ଏହି ଯୋଜନା ବନ୍ଧକମାନଙ୍କୁ ମୁକ୍ତ କରିବା ଏବଂ ଯୁଦ୍ଧର ଅନ୍ତ ପାଇଁ ଏକ ବ୍ୟବହାରିକ ପଥ ଖୋଲିପାରେ।

ଟ୍ରମ୍ପ ତାଙ୍କ ଟ୍ରୁଥ୍ ସୋସିଆଲରେ ଲେଖିଛନ୍ତି ଯେ ଇସ୍ରାଏଲକୁ ତୁରନ୍ତ ଗାଜା ଉପରେ ବୋମାମାଡ଼ ବନ୍ଦ କରିବାକୁ ପଡିବ ଯାହା ଦ୍ଵାରା ଆମେ ସୁରକ୍ଷିତ ଏବଂ ଶୀଘ୍ର ବନ୍ଧକମାନଙ୍କୁ ବାହାର କରିପାରିବା। ଏହା କେବଳ ଗାଜା ବିଷୟରେ ନୁହେଁ। ଏହା ମଧ୍ୟପ୍ରାଚ୍ୟରେ ଦୀର୍ଘଦିନ ଧରି ଆକାଂକ୍ଷିତ ଏବଂ ସ୍ଥାୟୀ ଶାନ୍ତି ବିଷୟରେ। ଗାଜାରେ ଶାନ୍ତି ଆଣିବା ପାଇଁ ସେ ସକ୍ଷମ ବୋଲି ଟ୍ରମ୍ପ କହିଛନ୍ତି। ସେ ଦୁଇ ବର୍ଷ ଧରି ଚାଲିଥିବା ଯୁଦ୍ଧର ଅନ୍ତ ପାଇଁ ତାଙ୍କର ରାଜନୈତିକ ପୁଞ୍ଜି ବିନିଯୋଗ କରୁଛନ୍ତି।

ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ କାର୍ଯ୍ୟାଳୟ ଘୋଷଣା କରିଛି ଯେ ସରକାର ଟ୍ରମ୍ପଙ୍କ ଗାଜା ଯୋଜନାର ପ୍ରଥମ ପର୍ଯ୍ୟାୟକୁ ତୁରନ୍ତ କାର୍ଯ୍ୟକାରୀ କରିବାକୁ ପ୍ରସ୍ତୁତ ହେଉଛି। ଇସ୍ରାଏଲୀ ଗଣମାଧ୍ୟମ ରିପୋର୍ଟ ଅନୁଯାୟୀ, ଦେଶର ରାଜନୈତିକ ନେତୃତ୍ୱ ଗାଜାରେ ଆକ୍ରମଣାତ୍ମକ କାର୍ଯ୍ୟକଳାପ ହ୍ରାସ କରିବାକୁ ସେନାକୁ ନିର୍ଦ୍ଦେଶ ଦେଇଛନ୍ତି। ଇସ୍ରାଏଲର ସାମରିକ ମୁଖ୍ୟ ମଧ୍ୟ କହିଛନ୍ତି ଯେ ସେନାକୁ ପ୍ରଥମ ପର୍ଯ୍ୟାୟ କାର୍ଯ୍ୟକାରୀ କରିବାକୁ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦିଆଯାଇଛି, ଯଦିଓ ଏହା ଏକ ଯୁଦ୍ଧବିରତି ଆଡକୁ ଏକ ପଦକ୍ଷେପ ସୂଚାଉଛି କି ସେ ସ୍ପଷ୍ଟ କରିନାହାଁନ୍ତି।