ନୂଆଦିଲ୍ଲୀ: ସମ୍ଭାବ୍ୟ ଯୁଦ୍ଧ ପରିସ୍ଥିତି ନେଇ ଉଭୟ ଭାରତ ଓ ପାକିସ୍ତାନ ପ୍ରସ୍ତୁତି ଚଳାଇଛନ୍ତି। ଏଥିପାଇଁ ବିଭିନ୍ନ ରାଜ୍ୟକୁ ଯୁଦ୍ଧ ପାଇଁ ମକ୍ଡ୍ରିଲର ଅଭ୍ୟାସ୍ କରିବାକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି। ଆସନ୍ତାକାଲି( ୭ ମେ) ଦେଶବ୍ୟାପୀ ୨୫୯ଟି ସ୍ଥାନରେ ଏହି ମକ୍ ଡ୍ରିଲ୍ ବା ସୁରକ୍ଷା ପ୍ରସ୍ତୁତି ଅଭ୍ୟାସ କରାଯିବ। ଏହି ଅଭ୍ୟାସରେ ମୁଖ୍ୟତଃ ବିମାନ ଆକ୍ରମଣ ସାଇରନ୍ ଏବଂ ବ୍ଲାକଆଉଟ୍ ଭଳି ପରିସ୍ଥିତିର ପ୍ରଥମ ସତର୍କତା କେମିତି ଅବଲମ୍ବନ କରାଯିବ ସେ ନେଇ ଅଭ୍ୟାସ ଏବଂ ତାଲିମ ଉପରେ ଧ୍ୟାନ ଦିଆଯିବ।
ଏନେଇ ମଙ୍ଗଳବାର, ଗୃହ ସଚିବ ଗୋବିନ୍ଦ ମୋହନଙ୍କ ଅଧ୍ୟକ୍ଷତାରେ ଏକ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା। ଏଥିରେ ନାଗରିକ ପ୍ରତିରକ୍ଷା ପ୍ରସ୍ତୁତିର ମୂଲ୍ୟାଙ୍କନ ଏବଂ ସମନ୍ୱୟ ବିଶେଷରେ ଆଲୋଚନା କରାଯାଇଥିଲା। ବୈଠକରେ ବିଭିନ୍ନ ରାଜ୍ୟର ମୁଖ୍ୟ ସଚିବ ଏବଂ ନାଗରିକ ପ୍ରତିରକ୍ଷା ମୁଖ୍ୟମାନେ ସାମିଲ ହୋଇଛନ୍ତି। ବିଶେଷ କରି ୨୦୧୦ରେ ଅଧିସୂଚିତ ହୋଇଥିବା ୨୪୪ ନାଗରିକ ପ୍ରତିରକ୍ଷା ଜିଲ୍ଲା(ସିଭିଲ ଡିଫେନ୍ସ ଡିଷ୍ଟ୍ରିକ୍ଟ) ଉପରେ ଏହି ବୈଠକର ଅଧିକ ଧ୍ୟାନ ଦିଆଯାଇଛି। ରାଜସ୍ଥାନ, ପଞ୍ଜାବ, ଜମ୍ମୁ ଏବଂ କାଶ୍ମୀର, ପଶ୍ଚିମବଙ୍ଗ ଏବଂ ଉତ୍ତର-ପୂର୍ବ ଭଳି ସୀମାନ୍ତ ରାଜ୍ୟଗୁଡ଼ିକରେ ଅବସ୍ଥିତ ଏହି ଜିଲ୍ଲାଗୁଡ଼ିକୁ ବହୁ-ବିପଦ ପରିସ୍ଥିତିରେ ଥିବା ଆକଳନ କରି ଡ୍ରିଲ୍ କରିବାକୁ ନିର୍ଦ୍ଦେଶ ଦିଆଯାଇଛି।
ବୈଠକରେ ଅନେକ ଗୁରୁତ୍ୱପୂର୍ଣ୍ଣ ବିଷୟ ଉପରେ ଆଲୋଚନା କରାଯାଇଥିଲା। ସ୍ୱରାଷ୍ଟ୍ର ମନ୍ତ୍ରଣାଳୟରେ ଚାଲିଥିବା ଏହି ବୈଠକରେ ଦେଶବ୍ୟାପୀ ୨୪୪ ଟି ନାଗରିକ ପ୍ରତିରକ୍ଷା ପ୍ରତିଷ୍ଠାନର ସ୍ଥିତି ସମୀକ୍ଷା କରାଯାଉଛି ବୋଲି ସୂତ୍ରରୁ ଜଣାପଡିଛି। ଏହି ସ୍ଥାନଗୁଡ଼ିକର ଥିବା ନାନା ଉପକରଣଗୁଡ଼ିକ କାର୍ଯ୍ୟକ୍ଷମ ଅଛି କି ନାହିଁ କିମ୍ବା ମରାମତି ଆବଶ୍ୟକ ଏନେ ଆକଳନ କରାଯାଇଛି।
ଜରୁରୀକାଳୀନ ପରିସ୍ଥିତି ପାଇଁ ସାଧାରଣ ନାଗରିକଙ୍କୁ କିପରି ତାଲିମ ଦିଆଯିବ ତାହା ମଧ୍ୟ ବୈଠକରେ ଆଲୋଚନା କରାଯାଇଛି। ମୁଖ୍ୟ ଅଞ୍ଚଳଗୁଡ଼ିକ ମଧ୍ୟରେ ବିମାନ ଆକ୍ରମଣ ସାଇରନ ପ୍ରତି ସାଧାରଣ ପ୍ରତିକ୍ରିୟା, ବିଦ୍ୟୁତ୍ କାଟ ସମୟରେ ଗ୍ରହଣୀୟ ପଦକ୍ଷେପ ଏବଂ ଅତ୍ୟାବଶ୍ୟକୀୟ ସାମଗ୍ରୀର ପ୍ରସ୍ତୁତି ନେଇ ଆଲୋଚନା ହୋଇଛି।
କୌଣସି ପରିସ୍ଥିତିରେ ଯଦି ଇଲେକ୍ଟ୍ରିକ୍ ସେବା ବାଧାପ୍ରାପ୍ତ ହୁଏ ତେବେ ଏଥିପାଇଁ ପ୍ରସ୍ତୁତ ରହିବାକୁ ଲୋକଙ୍କୁ ମେଡିକାଲ୍ କିଟ୍, ଟର୍ଚ୍ଚ, ମହମବତୀ ଏବଂ ନଗଦ(ନଗଦ ଟଙ୍କା) ରଖିବାର ଆବଶ୍ୟକତା ଉପରେ ଅଧିକାରୀମାନେ ଗୁରୁତ୍ୱାରୋପ କରିଥିବା ଜଣାପଡ଼ିଛି। ଉଲ୍ଲେଖଯୋଗ୍ୟ, ୨୪୪ ସ୍ଥାନ ମଧ୍ୟରୁ ୧୦୦ ରୁ ଅଧିକ ସ୍ଥାନକୁ ଅତ୍ୟନ୍ତ ସମ୍ବେଦନଶୀଳ ଭାବରେ ଚିହ୍ନଟ କରାଯାଇଛି।
ପାକିସ୍ତାନ ସହିତ ବଢ଼ୁଥିବା ଉତ୍ତେଜନା ମଧ୍ୟରେ କେନ୍ଦ୍ର ଗୃହ ମନ୍ତ୍ରଣାଳୟ ମେ ୫ ତାରିଖରେ ରାଜ୍ୟଗୁଡ଼ିକୁ ମକ୍ ଡ୍ରିଲ୍ କରିବାକୁ ନିର୍ଦ୍ଦେଶ ଜାରି କରିଥିଲା। ଏନେଇ ଆସନ୍ତାକାଲି ଦେଶର ୨୫୯ଟି ସ୍ଥାନରେ ଏହି ମକ୍ ଡ୍ରିଲ୍ ବା ସୁରକ୍ଷା ପ୍ରସ୍ତୁତି ଅଭ୍ୟାସ କରାଯିବ। ଏଥିରେ ଓଡ଼ିଶାରେ କ୍ୟାଟେଗୋରୀ ୧: ତାଳଚେର୍, କ୍ୟାଟେଗୋରୀ ୨: ବାଲେଶ୍ୱର, କୋରାପୁଟ, ଭୁବନେଶ୍ୱର, ଗୋପାଳପୁର, ହିରାକୁଦ, ପାରାଦୀପ, ରାଉରକେଲା ଓ କ୍ୟାଟେଗୋରୀ ୩: ଭଦ୍ରକ, ଢେଙ୍କାନାଳ, ଜଗତସିଂହପୁର, କେନ୍ଦ୍ରାପଡ଼ାରେ ମକ୍ଡ୍ରିଲ୍ ହେବ।
