ନୂଆଦିଲ୍ଲୀ: କଂଗ୍ରେସ ନେତା ରାହୁଲ ଗାନ୍ଧୀଙ୍କ ଭୋଟ୍ ଚୋରି ବୟାନ ଉପରେ ନିର୍ବାଚନ ଆୟୋଗ କଡ଼ା ପ୍ରତିକ୍ରିୟା ଦେଇଛନ୍ତି । କମିଶନ ସମସ୍ତ ନିର୍ବାଚନ ଅଧିକାରୀଙ୍କୁ ଏପରି ଦାୟିତ୍ୱହୀନ ଓ ଭିତ୍ତିହୀନ ବୟାନ ଉପରେ ଧ୍ୟାନ ନଦେବା ପାଇଁ କହିଛନ୍ତି । ଏହା ସହ ପୂରା ନିରପେକ୍ଷ ଓ ପାରଦର୍ଶିତା ସହ ନିଜ କାମ କରିବାକୁ କହିଛନ୍ତି । ନିର୍ବାଚନ ଆୟୋଗ କହିଛନ୍ତି ଯେ ଏପରି ଅଭିଯୋଗ ଆଜିକାଲି ପ୍ରତିଦିନ ଲଗାଯାଉଛି ଓ ଏହାର କୌଣସି ଠୋସ୍ ଆଧାର ନାହିଁ । ତେଣୁ ଅଧିକାରୀମାନେ ଏହି ବୟାନରେ ପ୍ରଭାବ ନହୋଇ ଦାୟିତ୍ୱର ସହ ନିର୍ବାଚନ ପ୍ରକ୍ରିୟାକୁ ସମ୍ପାଦନ କରନ୍ତୁ ।
ନିର୍ବାଚନ ଆୟୋଗ ଏହା ବି କହିଛନ୍ତି ଯେ ନିର୍ବାଚନ ପ୍ରକ୍ରିୟାକୁ ପାରଦର୍ଶି ଓ ବିଶ୍ୱାସଯୋଗ୍ୟ କରିବା ଲାଗି ଲଗାତାର ଆବଶ୍ୟକୀୟ ପଦକ୍ଷେପ ନେଉଛନ୍ତି । ଉଲ୍ଲେଖଯୋଗ୍ୟ ଯେ ନିକଟରେ ରାହୁଲ ଗାନ୍ଧୀ ଅଭିଯୋଗ କରିଥିଲେ ଯେ, ଭାରତରେ ଭୋଟ ଚୋରି ହେଉଛି ଓ ନିର୍ବାଚନ ପ୍ରକ୍ରିୟା ଉପରେ ଲୋକଙ୍କ ବିଶ୍ୱାସ କମ ହୋଇଛି । ଏହାର ଜବାବରେ ନିର୍ବାଚନ ଆୟୋଗ ଏହି ବୟାନ ଜାରି କରିଛନ୍ତି ।
କଂଗ୍ରେସ ସାଂସଦ ରାହୁଲ ଗାନ୍ଧୀ ଶୁକ୍ରବାର ଅଭିଯୋଗ କରିଥିଲେ ଯେ ବିଜେପି ସହ ମିଶି ନିର୍ବାଚନ ଆୟୋଗ ଭୋଟ୍ ଚୋରି କରୁଛନ୍ତି । ସେ କହିଥିଲେ ଯେ ନିର୍ବାଚନ ଆୟୋଗ ବିହାରରେ ଏସ୍ଆଇଆର୍ ଜରିଆରେ ଭୋଟ୍ ଚୋରି କରୁଛନ୍ତି । ଫଳରେ ଶାସକ ବିଜେପିକୁ ଲାଭ ମିଳିପାରିବ । ବିରୋଧୀଙ୍କ ପାଖରେ ଏହାର ସବୁ ପ୍ରମାଣ ଥିବା ସେ ଦାବି କରିଥିଲେ ।
ଏହା ପୂର୍ବରୁ ରାହୁଲ ଗାନ୍ଧୀ ଜୁଲାଇ ୨୪ରେ ବି ସମାନ ଅଭିଯୋଗ କରିଥିଲେ । ସେ ଦାବି କରିଥିଲେ ଯେ ତାଙ୍କ ଦଳ କର୍ଣ୍ଣାଟକର ଏକ ଲୋକସଭା ଆସନ ଉପରେ ଗଭୀର ଅଧ୍ୟୟନ କରିଛି । ଯେଉଁଥିରେ ଭୋଟ ଚୋରିର ପୂରା ପ୍ରକ୍ରିୟା ଜଣାପଡ଼ିଛି । ସେ କହିଥିଲେ, 'କର୍ଣ୍ଣାଟକରେ ଆମେ ଗୋଟିଏ ଆସନକୁ ବାଛିଥିଲୁ ଓ ତାର ଭୋଟର ଲିଷ୍ଟକୁ ଡିଜିଟାଲ୍ ଫର୍ମାରେ କନଭର୍ଟ କରିଥିଲୁ । ଏହି ପ୍ରକ୍ରିୟାରେ ଛଅ ମାସ ଲାଗିଲା । ଏହାପରେ ଭୋଟ୍ କିପରି ଚୋରି ହେଉଛି, କିଏ କରୁଛି ଓ ନୂଆ ଭୋଟର୍ସ କେଉଁଠୁ ଆସନ୍ତି, ତାହା ଆମେ ଜାଣିବାକୁ ପାଇଥିଲୁ ।' ରାହୁଲ ଗାନ୍ଧୀ କହିଥିଲେ ଯେ ଏହାର ପ୍ରମାଣ ମିଳିସାରିଛି ଓ ଏହାକୁ ଜନତା ଏବଂ ନିର୍ବାଚନ ଆୟୋଗଙ୍କ ସାମନାରେ ରଖିବୁ ।
