ବର୍ଷେ ବି ତିଷ୍ଠିଲାନି ବିବାହ, ସାମାନ୍ୟ ବିବାଦରୁ ଜୀବନ ହାରିଦେଲେ ନବବଧୂ

ଆଠମଲ୍ଲିକ ୧୯।୧୧ :  ମନରେ ଆଶା ଓ ଭରସା ନେଇ ଝିଅଟି ବିବାହ କରିଥିଲା । ଭାବିଥିଲା ସୁଖର ସଂସାର ଗଢିବି । ଆଉ ଖୁସିର ବାକି ଜୀବନ ବିତାଇବି । ହେଲେ କିଏ ଜାଣିଥିଲା ତାର ଏହି ଖୁସିରେ ଲାଗିଯିବ ଗ୍ରହଣ । ବର୍ଷେ ବି ତିଷ୍ଠିବନି ବୈବାହିକ ଜୀବନ । ଯେଉଁ ପୁରୁଷର ହାତ ଧରି ସେ ସାତ ଜନମକୁ ସାଥୀ ହେବ ବୋଲି ହୋମ ନିଆଁରେ କଥା ଦେଇଥିଲେ । ଆଜି ସେହି ପୁରୁଷ ସହିତ ବାଦ ବିବାଦରୁ ଆତ୍ମହତ୍ୟାର ରାସ୍ତା ବାଛି ଦେଇଛି ନବବଧୂ । ଅନୁଗୋଳ ଜିଲ୍ଲା ଆଠମଲ୍ଲିକ ପତକା ଗାଁରୁ ଆସିଛି ଏମିତି ଏକ ଦୁଃଖଭରା ଘଟଣା ।

ଆଠମଲ୍ଲିକ ଥାନା ପତକା ଗାଁର ଧରମୁ ପ୍ରଧାନଙ୍କ ପୁଅ ୬ ମାସ ତଳେ ବୌଦ୍ଧ ଜିଲ୍ଲା ଶ୍ରୀରାମପୁର ଗାଁର ଜଣେ ଯୁବତୀଙ୍କୁ ବିବାହ କରିଥିଲେ । ପୁଅ ଆନ୍ଧ୍ରରେ ରହି କାମ କରନ୍ତି । ଗତ ଚାରି ଦିନ ତଳେ ଯୁବକ ଜଣଙ୍କ ଘରକୁ ଆସିଥିଲେ । ଗୁରୁବାର ଦିନ ପୁଣି ଥରେ ଆନ୍ଧ୍ରପ୍ରଦେଶ ଯିବାର ଥିଲା । କିନ୍ତୁ ଏମିତି କିଛି ଘଟିଲା ଅଘଟଣ । ଯାହାକି ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଆଣିଥିଲା ଝଡ଼ । କୌଣସି କାରଣକୁ ନେଇ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ପାଟିତୁଣ୍ଡ ଓ ବିବାଦ ହୋଇଥିଲା । ଦେଖୁ ଦେଖୁ ବିବାଦ ବଢିଥିଲା । ଶେଷରେ ସ୍ତ୍ରୀ ବେକରେ ରଶି ଲଗାଇ ଆତ୍ମହତ୍ୟା କରିଦେଇଛନ୍ତି ।

ସେପଟେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଛି । ଶାଶୁ ଘରଲୋକଙ୍କ ମତରେ ବୋହୂ ଆତ୍ମହତ୍ୟା କରିଛନ୍ତି । ହେଲେ ମୃତ ନବବଧୂଙ୍କ ବାପା ଘର କହୁଛନ୍ତି କି, ତାଙ୍କ ଝିଅଙ୍କୁ ଶାଶୁ ଘର ମାରିଦେଇଛନ୍ତି । ଅଭିଯୋଗ ପରେ ଆଠମଲ୍ଲିକ ପୋଲିସ ମୃତ ସ୍ତ୍ରୀଙ୍କ ସ୍ୱାମୀକୁ ଥାନାରେ ଅଟକ ରଖି ଜେରା କରୁଛି ।