ଆତଙ୍କୀ ହମଲା ପରେ ଭୟଭୀତ ଶ୍ରୀଲଙ୍କା ଟିମ୍, ରଦ୍ଦ ହୋଇପାରେ ପାକିସ୍ତାନ ବିପକ୍ଷ ଦ୍ଵିତୀୟ ଦିନିକିଆ

ନୂଆଦିଲ୍ଲୀ: ପାକିସ୍ତାନର ରାଜଧାନୀ ଇସଲାମାବାଦରେ ହୋଇଥିବା ଆତ୍ମଘାତୀ ବିସ୍ଫୋରଣରେ ଭୟଭୀତ ଶ୍ରୀଲଙ୍କା ଖେଳାଳି। ଏହି ହମଲାରେ ୧୨ ଜଣଙ୍କ ମୃତ୍ୟୁ ଘଟିଛି। ଏହି ଘଟଣା ପରେ ଶ୍ରୀଲଙ୍କା ଖେଳାଳି ସୁରକ୍ଷାକୁ ଚିନ୍ତା ବ୍ୟକ୍ତ କରିଛନ୍ତି। ଏପରିକି ଗୁରୁବାର ସ୍ଵଦେଶ ଫେରିବାକୁ ପ୍ରସ୍ତୁତି କଲେଣି। ଏହାର ଅର୍ଥ ଗୁରୁବାର ରାଓ୍ଵଲପିଣ୍ଡିରେ ପାକିସ୍ତାନ ଓ ଶ୍ରୀଲଙ୍କା ମଧ୍ୟରେ ୨ୟ ଦିନିକିଆ ହୋଇ ପାରିବ ନାହିଁ।

ରିପୋର୍ଟ ଅନୁଯାୟୀ, ଶ୍ରୀଲଙ୍କା ଖେଳାଳିମାନେ ସୁରକ୍ଷା ପରିସ୍ଥିତି ଉପରେ ଗଭୀର ଚିନ୍ତା ପ୍ରକାଶ କରିଛନ୍ତି ଏବଂ ସିରିଜ୍ ଜାରି ରଖିବାକୁ ଚାହୁ ନାହାନ୍ତି। ଶ୍ରୀଲଙ୍କା କ୍ରିକେଟ୍ (SLC) ପରିଚାଳନା ଖେଳାଳିମାନଙ୍କୁ ପାକିସ୍ତାନ କ୍ରିକେଟ୍ ବୋର୍ଡ (PCB) ଏବଂ ସ୍ଥାନୀୟ କର୍ତ୍ତୃପକ୍ଷଙ୍କ ସହିତ ଆଲୋଚନା ଜାରି ରହିଥିବା ବେଳେ ବାକି ମ୍ୟାଚ୍ ଖେଳିବାକୁ କହିଛି।

ପିସିବି ଅଧିକାରୀମାନେ ଶ୍ରୀଲଙ୍କା କ୍ରିକେଟକୁ ଆଶ୍ୱାସନା ଦେଇଛନ୍ତି ଯେ ଶ୍ରୀଲଙ୍କା ଦଳ ପାଇଁ ସର୍ବୋଚ୍ଚ ସୁରକ୍ଷା ବ୍ୟବସ୍ଥା କାର୍ଯ୍ୟକାରୀ କରାଯାଉଛି। ତଥାପି, ଖେଳାଳିମାନେ ପରିସ୍ଥିତି ବିଷୟରେ ଚିନ୍ତିତ ଥିବା ଜଣାପଡ଼ିଛି। ଶ୍ରୀଲଙ୍କା ଆସନ୍ତାକାଲି ଦ୍ୱିତୀୟ ଦିନିକିଆ ଖେଳିବାକୁ ଯାଉଛି। ଖେଳାଳି, ଶ୍ରୀଲଙ୍କା କ୍ରିକେଟ୍ ବୋ ଏବଂ ପାକିସ୍ତାନୀ ସୁରକ୍ଷା ଅଧିକାରୀଙ୍କ ମଧ୍ୟରେ ଅଧିକ ଆଲୋଚନା ହୋଇଥିଲେ ମଧ୍ୟ ମ୍ୟାଚ୍ ନେଇ ସଂଶୟ ଲାଗି ରହିଛି।

ପାକିସ୍ତାନ ଏବଂ ଶ୍ରୀଲଙ୍କା ମଧ୍ୟରେ ଦ୍ୱିତୀୟ ଦିନିକିଆ ଆସନ୍ତାକାଲି (୧୩ ନଭେମ୍ବର) ରାୱଲପିଣ୍ଡି କ୍ରିକେଟ ଷ୍ଟାଡିୟମରେ ଖେଳାଯିବ। ପ୍ରଥମ ଦିନିକିଆରେ ଶ୍ରୀଲଙ୍କାକୁ ୬ ରନରେ ପରାସ୍ତ କରି ଆୟୋଜକ ଦଳ ୧-୦ରେ ଆଗୁଆ ଅଛି। ପ୍ରଥମ ଦିନିକିଆ ମଧ୍ୟ ରାୱଲପିଣ୍ଡିରେ ଖେଳାଯାଇଥିଲା, ଦୁର୍ଘଟଣାସ୍ଥଳଠୁ ୧୭ କିଲୋମିଟର ଦୂର।

ପାକିସ୍ତାନର ରାଜଧାନୀ ଇସଲାମାବାଦର ଏକ କୋର୍ଟ ସମ୍ମୁଖରେ ଏକ ଆତ୍ମଘାତୀ ଆକ୍ରମଣ ହୋଇଥିଲା। କୋର୍ଟ ବାହାରେ ଛିଡା ହୋଇଥିବା ଏକ କାର ବିସ୍ଫୋରଣ ହୋଇଥିଲା, ଯେଉଁଥିରେ ୧୨ ଜଣଙ୍କର ମୃତ୍ୟୁ ହୋଇଥିଲା ଏବଂ ଅନେକ ଆହତ ହୋଇଥିଲେ। ଉଲ୍ଲେଖଯୋଗ୍ୟ ଯେ ୨୦୦୯ ମସିହାରେ ଗଦ୍ଦାଫି ଷ୍ଟାଡିୟମ ନିକଟରେ ଆତଙ୍କବାଦୀମାନେ ଶ୍ରୀଲଙ୍କା ଦଳର ବସ୍ ଉପରେ ଆକ୍ରମଣ କରିଥିଲେ, ଯାହା ପରେ ୧୦ ବର୍ଷ ପର୍ଯ୍ୟନ୍ତ ପାକିସ୍ତାନରେ ଅନ୍ତର୍ଜାତୀୟ କ୍ରିକେଟ୍ ଖେଳାଯାଇ ନଥିଲା।