ନୂଆଦିଲ୍ଲୀ: ଅଫଜଲ ଗୁରୁକୁ ଫାଶୀ ଦେବା ଘଟଣାରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ମନ୍ତବ୍ୟକୁ ସମାଲୋଚନା କରିଛନ୍ତି ବରିଷ୍ଠ କଂଗ୍ରେସ ନେତା ପି. ଚିଦାମ୍ବରମ। ଶାହଙ୍କ ଅଭିଯୋଗ ସମ୍ପୂର୍ଣ୍ଣ ମିଛ ଓ ମନଗଢ଼ା ବୋଲି ସେ କହିଛନ୍ତି। ଘଟଣାକୁ ମୋଡ଼ମକଚି କୁହାଯାଉଛି ବୋଲି ସେ ଅଭିଯୋଗ କରିଛନ୍ତି।
ଏକ୍ସରେ ପୋଷ୍ଟ କରି ସେ ଲେଖିଛନ୍ତି ଯେ ସଂସଦ ଉପରେ ହୋଇଥିବା ଆକ୍ରମଣ ଘଟଣାର ମାଷ୍ଟର ମାଇଣ୍ଡ୍ ଅଫଜଲ ଗୁରୁର ଫାଶୀ ସମ୍ପର୍କିତ ଶୁଣାଣି ସମୟରେ ସେ ଭାରତର ଗୃହମନ୍ତ୍ରୀ ନଥିଲେ। ହେଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ରାଜ୍ୟସଭାରେ ଏକ ବିବୃତ୍ତି ଦେଇ କହିଛନ୍ତି 'ପି ଚିଦାମ୍ବରମ ଗୃହମନ୍ତ୍ରୀ ଥିବା ପର୍ଯ୍ୟନ୍ତ ଅଫଜଲ ଗୁରୁଙ୍କୁ ଫାଶୀ ଦିଆଯାଇପାରିବ ନାହିଁ। ଯାହା ସମ୍ପୂର୍ଣ୍ଣ ମନଗଢ଼ା
ଘଟଣା ଘଟିବାର ସମୟ ବିଷୟରେ କହି ଚିଦାମ୍ବରମ କହିଛନ୍ତି “କୋର୍ଟ ଦ୍ୱାରା ଦୋଷୀ ସାବ୍ୟସ୍ତ ଏବଂ ଦଣ୍ଡାଦେଶ ପରେ, ଅଫଜଲ ଗୁରୁର ପତ୍ନୀ ସ୍ୱାମୀ ପକ୍ଷରୁ ଅକ୍ଟୋବର ୨୦୦୬ ରେ ଭାରତର ରାଷ୍ଟ୍ରପତିଙ୍କ ନିକଟରେ ଏକ ଦୟା ଆବେଦନ ଦାଖଲ କରିଥିଲେ। ରାଷ୍ଟ୍ରପତି ୩-୨-୨୦୧୩ ରେ ଦୟା ଆବେଦନକୁ ଖାରଜ କରିଥିଲେ। ୯-୨-୨୦୧୩ରେ ଅଫଜଲ ଗୁରୁଙ୍କୁ ୬ ଦିନ ପରେ ଫାଶୀ ଦିଆଯାଇଥିଲା। ମୁଁ ୧-୧୨-୨୦୦୮ ଏବଂ ୩୧-୭-୨୦୧୨ ସମୟରେ ଗୃହମନ୍ତ୍ରୀ ଥିଲି। ଏହ ପୂରା ସମୟ ମଧ୍ୟରେ ଦୟା ଆବେଦନ ରାଷ୍ଟ୍ରପତିଙ୍କ ନିକଟରେ ବିଚାରାଧୀନ ଥିଲା। ଆଇନ ଅନୁଯାୟୀ ଦୟା ଆବେଦନର ସମାଧାନ ନହେବା ପର୍ଯ୍ୟନ୍ତ ମୃତ୍ୟୁଦଣ୍ଡ କାର୍ଯ୍ୟକାରୀ କରାଯାଇପାରିବ ନାହିଁ।”
ଗତକାଲି ରାଜ୍ୟସଭାରେ ଅପରେସନ ସିନ୍ଦୂର ବିଷୟରେ ବିରୋଧୀ ଦଳ ପ୍ରମାଣ ମାଗିଥିଲେ। ଆତଙ୍କବାଦୀମାନେ ସତରେ ପାକିସ୍ତାନରୁ ଆସିଥିଲେ ନା ନିଜ ଦେଶର ଥିଲେ ବୋଲି ବିରୋଧୀ ପ୍ରଶ୍ନ କରିଥିଲେ। ଏହା ଉପରେ କେନ୍ଦ୍ରମନ୍ତ୍ରୀ ଅମିତ ଶାହ ପୂର୍ବତନ ଗୃହମନ୍ତ୍ରୀଙ୍କ ଚିଦାମ୍ବରମଙ୍କ ଉପରେ ଆଙ୍ଗୁଳି ଉଠାଇଥିଲେ। ଏବଂ କହିଥିଲେ " ଯେ ପର୍ଯ୍ୟନ୍ତ ସେ(ଚିଦାମ୍ବରମ) ଗୃହମନ୍ତ୍ରୀ ଥିଲେ ସେ ପର୍ଯ୍ୟନ୍ତ ଅଫଜଲ ଗୁରୁଙ୍କୁ ଫାଶୀ ଦିଆଯାଇ ନଥିଲା"
