ବିଦ୍ରୋହ ଷଡ଼ଯନ୍ତ୍ର ଅଭିଯୋଗରେ ବ୍ରାଜିଲର ପୂର୍ବତନ ରାଷ୍ଟ୍ରପତି ଦୋଷୀ, ୨୭ ବର୍ଷ ୩ ମାସ ଜେଲ ଦଣ୍ଡାଦେଶ

ନୂଆଦିଲ୍ଲୀ ୧୨/୦୯: ବ୍ରାଜିଲ ପୂର୍ବତନ ରାଷ୍ଟ୍ରପତି ଜାଇର ବୋଲସୋନାରୋ ଦୋଷୀ ସାବ୍ୟସ୍ତ । ବିଦ୍ରୋହ ଷଡ଼ଯନ୍ତ୍ର ଅଭିଯୋଗରେ ସେ ଦୋଷୀ ସାବ୍ୟସ୍ତ ହୋଇଛନ୍ତି । ଏହାସହ ଗଣତନ୍ତ୍ର ଉପରେ ଆକ୍ରମଣ କରିବା ଅଭିଯୋଗରେ ଦୋଷୀ ସାବ୍ୟସ୍ତ ହୋଇଛନ୍ତି । ସୁପ୍ରିମକୋର୍ଟଙ୍କ ନିଷ୍ପତ୍ତ କ୍ରମେ ଭିନ୍ନ ଭିନ୍ନ ଅପରାଧରେ ଦୋଷୀ ସାବ୍ୟସ୍ତ କରି ୨୭ ବର୍ଷ ତିନି ମାସ ଜେଲଦଣ୍ଡରେ ଦଣ୍ଡିତ କରିଛନ୍ତି । ତେବେ ଜଣେ ପୂର୍ବତନ ରାଷ୍ଟ୍ରପତିଙ୍କୁ ଦୋଷୀ ସାବ୍ୟସ୍ତ କରାଯିବା ଘଟଣା ପ୍ରଥମ ଥର।

ବ୍ରାଜିଲର ସୁପ୍ରିମକୋର୍ଟର ୫ ଜଣିଆ ବିଚାରପତିଙ୍କ ଏକ ପ୍ୟାନେଲ ପୂର୍ବତନ ରାଷ୍ଟ୍ରପତିଙ୍କୁ ଦଣ୍ଡ ଶୁଣାଇଛନ୍ତି । ଦୋଷୀ ସାବ୍ୟସ୍ତ ହେବା ପରେ, ପୂର୍ବତନ ରାଷ୍ଟ୍ରପତି ବୋଲସୋନାରୋ ୨୦୬୦ ପର୍ଯ୍ୟନ୍ତ ଅଯୋଗ୍ୟ ହୋଇଛନ୍ତି । ୨୦୨୨ ନିର୍ବାଚନରେ ​​ହାରିବା ପରେ ବୋଲସୋନାରୋଙ୍କୁ ଅବୈଧ ଭାବରେ କ୍ଷମତାରେ ରହିବା ପାଇଁ ବିପ୍ଳବ ଷଡଯନ୍ତ୍ର କରିବାର ଅଭିଯୋଗ ଆସିଥିଲା । ଏହି ନିଷ୍ପତ୍ତି ତାଙ୍କ ଦ୍ୱାରା ପ୍ରତିଷ୍ଠିତ ଦକ୍ଷିଣପନ୍ଥୀ ଲୋକପ୍ରିୟ ଆନ୍ଦୋଳନକୁ ଏକ ଶକ୍ତ ଧକ୍କା । ସେପଟେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ନିଷ୍ପତ୍ତିକୁ କଡ଼ା ନିନ୍ଦା କରିଛନ୍ତି।

ବିଚାରପତି କାର୍ମେନ୍ ଲୁସିଆ ତାଙ୍କ ନିଷ୍ପତ୍ତି ପୂର୍ବରୁ କହିଥିଲେ ଯେ ଏହି ଅପରାଧିକ ମାମଲା ବ୍ରାଜିଲର ଅତୀତ, ବର୍ତ୍ତମାନ ଏବଂ ଭବିଷ୍ୟତ ମଧ୍ୟରେ ଏକ ମାଇଲଖୁଣ୍ଟ । ସେ ଏହା ମଧ୍ୟ କହିଛନ୍ତି ଯେ ବୋଲସୋନାରୋ ଗଣତନ୍ତ୍ର ଓ ସାମ୍ବିଧାନିକ ପ୍ରତିଷ୍ଠାନଗୁଡ଼ିକୁ ଦୁର୍ବଳ କରିବା ଉଦ୍ଦେଶ୍ୟରେ ଏହି ଷଡଯନ୍ତ୍ର ରଚିଥିଲେ । 

୫ ଜଣ ବିଚାରପତିଙ୍କ ମଧ୍ୟରୁ ୪ ଜଣ ବୋଲସୋନାରୋଙ୍କୁ ୫ଟି ଅପରାଧରେ ଦୋଷୀ ସାବ୍ୟସ୍ତ କରିଛନ୍ତି । ଏଥିରେ ଏକ ସଶସ୍ତ୍ର ଅପରାଧ ସଂଗଠନର ଅଂଶ ହେବା, ହିଂସାତ୍ମକ ଉପାୟରେ ଗଣତନ୍ତ୍ରକୁ ସମାପ୍ତ କରିବାକୁ ଚେଷ୍ଟା କରିବା, ଏକ ବିପ୍ଳବ ଷଡଯନ୍ତ୍ର କରିବା, ସରକାରୀ ସମ୍ପତ୍ତି ଓ ସାଂସ୍କୃତିକ ଐତିହ୍ୟକୁ କ୍ଷତି ପହଞ୍ଚାଇବା ଅନ୍ତର୍ଭୁକ୍ତ। କେବଳ ଜଣେ ବିଚାରପତି ତାଙ୍କୁ ଦୋଷମୁକ୍ତ କରିବାକୁ ନିଷ୍ପତ୍ତି ନେଇଥିଲେ। 

ପ୍ୟାନେଲର ଅଂଶ ଥିବା ବିଚାରପତି ଆଲେକଜାଣ୍ଡାର ଡି ମୋରେସ୍ ବୋଲସୋନାରୋଙ୍କୁ ମୋଟ ୨୭ ବର୍ଷ ୩ ମାସ ଦଣ୍ଡାଦେଶ ଦେଇଛନ୍ତି । ଯେଉଁଥିରେ ୨୪ ବର୍ଷ ୯ ମାସ ଜେଲଦଣ୍ଡ ଏବଂ ୨ ବର୍ଷ ୬ ମାସ ଗୃହବନ୍ଦୀ ଅନ୍ତର୍ଭୁକ୍ତ। ଏହା ବ୍ୟତୀତ ଜରିମାନାର ବ୍ୟବସ୍ଥା ମଧ୍ୟ କରାଯାଇଥିଲା।