ଚେନ୍ନାଇ ଥର୍ମାଲ ପାୱାର ଷ୍ଟେସନରେ ବଡ଼ ଅଘଟଣ, ୩୦ ଫୁଟ୍ ଉଚ୍ଚରୁ ଖସିଲା ଆର୍ଚ; ୯ ଶ୍ରମିକ ମୃତ

ନୂଆଦିଲ୍ଲୀ: ତାମିଲନାଡ଼ୁର ରାଜଧାନୀ ଚେନ୍ନାଇରେ ମଙ୍ଗଳବାର ସଂଧ୍ୟାରେ ଏକ ବଡ଼ ଅଘଟଣ ଘଟିଛି । ଏନ୍ନୋର ଥର୍ମାଲ ପାୱାର ପ୍ଲାଣ୍ଟର ନୂଆ ସାଇଟ୍‌ରେ ନିର୍ମାଣ କାର୍ଯ୍ୟବେଳେ ଆର୍ଚ ଭୁଶୁଡ଼ି ପଡ଼ିଛି । ଏହି ସମୟରେ ସେଠାରେ କାର୍ଯ୍ୟ କରୁଥିବା ଅନେକ ଶ୍ରମିକ ଫସି ରହିଛନ୍ତି । ଦୁର୍ଘଟଣା ଖବର ସାମନାକୁ ଆସିବା ପରେ ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରାଯାଇଛି । ପ୍ରାଥମିକ ସୂଚନା ଅନୁସାରେ ବର୍ତ୍ତମାନ ସୁଦ୍ଧା 9 ଜଣଙ୍କ ମୃତ୍ୟୁ ହୋଇସାରିଛି । ଅନେକ ଶ୍ରମିକ ଗୁରୁତର ଭାବେ ଆହତ ହୋଇଛନ୍ତି । ସମସ୍ତଙ୍କୁ ହସ୍ପିଟାଲରେ ଭର୍ତ୍ତି କରାଯାଥିବା ବେଳେ ଅଞ୍ଚଳରେ ଶୋକର ଛାୟା ଖେଳିଯାଇଛି ।

ଚେନ୍ନାଇରେ ଅବସ୍ଥିତ ଏନୋର ଥର୍ମାଲ୍ ପାୱାର ପ୍ଲାଣ୍ଟ ୧୯୭୦ ମସିହାରେ ପ୍ରତିଷ୍ଠିତ ହୋଇଥିଲା । ଏହାର କ୍ଷମତା ୪୫୦ MW । ଏହା TANGEDCO ଅଧୀନରେ ରାଜ୍ୟକୁ ଏକ ଗୁରୁତ୍ୱପୂର୍ଣ୍ଣ ବିଦ୍ୟୁତ୍ ଯୋଗାଣକାରୀ ହୋଇଛି । ଏନୋର ସ୍ପେଶାଲ୍ ଇକୋନୋମିକ୍ ଜୋନ୍ ସୁପରକ୍ରିଟିକାଲ୍ ଥର୍ମାଲ୍ ପାୱାର ପ୍ଲାଣ୍ଟ ପରି ସମ୍ପ୍ରସାରଣ ପ୍ରକଳ୍ପ ବର୍ତ୍ତମାନ ନିର୍ମାଣାଧୀନ ଅଛି । ସେପ୍ଟେମ୍ବର ୨୦୨୬ ମଧ୍ୟରେ ଧାର୍ଯ୍ୟକ୍ଷମ ପାଇଁ ଲକ୍ଷ୍ୟ କରାଯାଇଛି ।

୩୦ ଫୁଟ୍ ଉପରୁ ଖସି ପଡ଼ିଲେ ଶ୍ରମିକ

ମଙ୍ଗଳବାର ସନ୍ଧ୍ୟାରେ ଏହି ତାପଜ ବିଦ୍ୟୁତ୍ କେନ୍ଦ୍ରରେ ଦୁର୍ଘଟଣା ଘଟିଛି । ବିଦ୍ୟୁତ୍ କେନ୍ଦ୍ରର ନୂତନ ସ୍ଥାନରେ ନିର୍ମାଣ କାର୍ଯ୍ୟ ଚାଲିଥିଲା । ଶ୍ରମିକମାନେ ଭାରା ଉପରେ କାମ କରୁଥିଲେ, ତେବେ ହଠାତ୍ ତାହା ଭୁଶୁଡ଼ି ପଡ଼ିଥିଲା । ଶ୍ରମିକମାନେ ପ୍ରାୟ ୩୦ ଫୁଟ୍ ତଳକୁ ଖସି ପଡ଼ିଥିଲେ ଓ ଏକ ଜୋରଦାର ଶବ୍ଦ ଶୁଣିବାକୁ ମିଳିଥିଲା ।  ଶବ୍ଦ ଶୁଣି, ସେଠାରେ କାମ କରୁଥିବା ଅନ୍ୟ ଶ୍ରମିକମାନେ ଘଟଣାସ୍ଥଳକୁ ଧାଇଁ ଆସିଥିଲେ । ସେମାନେ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରିବା ସହ ଅଧିକାରୀଙ୍କୁ ଖବର ଦେଇଥିଲେ ।

​​​​​​​ସୂଚନା ପାଇବା ମାତ୍ରେ ତାପଜ ବିଦ୍ୟୁତ୍ କେନ୍ଦ୍ର ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ । ଜିଲ୍ଲା ପୋଲିସ ଏବଂ ପ୍ରଶାସନ ଘଟଣାସ୍ଥଳରେ ପହଞ୍ଚିଛନ୍ତି । ଆଭାଡି ପୋଲିସ କମିଶନର କହିଛନ୍ତି ଯେ ତାପଜ ବିଦ୍ୟୁତ୍ କେନ୍ଦ୍ରରେ ଆର୍ଚ ଭୁଶୁଡ଼ିବାର ସଠିକ୍ କାରଣ ଏପର୍ଯ୍ୟନ୍ତ ଜଣାପଡିନାହିଁ। ଘଟଣାସ୍ଥଳରେ ଉଦ୍ଧାର ଏବଂ ରିଲିଫ୍ କାର୍ଯ୍ୟ ଚାଲିଛି । ଦୁର୍ଘଟଣାର ତଦନ୍ତ କରାଯାଉଛି ।