ୱାଶିଂଟନ,୨୮/୪: ଆମେରିକା ବିଶ୍ବବିଦ୍ୟାଳୟଗୁଡ଼ିକରେ ତେଜୁଛି ଇସ୍ରାଏଲ ବିରୋଧୀ ଆନ୍ଦୋଳନ । ଛାତ୍ରଛାତ୍ରୀମାନେ ରାସ୍ତାକୁ ଓହ୍ଲାଇ ବିକ୍ଷୋଭ ପ୍ରଦର୍ଶନ କରିବା ସହ ଇସ୍ରାଏଲକୁ ସମର୍ଥନ ନ କରିବାକୁ ଆମେରିକା ସରକାରଙ୍କୁ ଆହ୍ୱାନ ଦେଇଛନ୍ତି । ଆନ୍ଦୋଳନ ଅଧିକ ବ୍ୟାପକ ହେବାରୁ ଏ ପର୍ଯ୍ୟନ୍ତ ୫୫୦ରୁ ଅଧିକ ଛାତ୍ରଛାତ୍ରୀଙ୍କୁ ଗିରଫ କରାଯାଇଛି । ଆନ୍ଦୋଳନରତ ଛାତ୍ରଛାତ୍ରୀଙ୍କୁ ନିୟନ୍ତ୍ରଣ କରିବା ପାଇଁ ପୋଲିସ ଟେଜର୍ ଗନ୍ ଏବଂ ରାସାୟନିକ ପଦାର୍ଥ ବ୍ୟବହାର କରୁଥିବା ଜଣାପଡ଼ିଛି ।
କଲମ୍ବିଆ ୟୁନିଭର୍ସିଟିକୁ ଇସ୍ରାଏଲ୍ ବିରୋଧୀ ଆନ୍ଦୋଳନର କେନ୍ଦ୍ରସ୍ଥଳ ବିବେଚନା କରାଯାଉଛି । ଏଠାରୁ ଶତାଧିକ ଛାତ୍ରଛାତ୍ରୀଙ୍କୁ ଗିରଫ କରାଗଲାଣି । ତଥାପି ଆନ୍ଦୋଳନ ଥମିବା ନାଁ ଧରୁନାହିଁ । ଏହାପରେ କଲମ୍ବିଆ ୟୁନିଭର୍ସିଟି ସଭାପତି ନେମତ୍ ମିନୋଶେ ଶାଫିକ୍ ବିକ୍ଷୋଭକାରୀ ଛାତ୍ରଛାତ୍ରୀଙ୍କୁ ଆନ୍ଦୋଳନରୁ ଓହରିବା ପାଇଁ ନିର୍ଦ୍ଦିଷ୍ଟ ସମୟସୀମା ଦେଇଛନ୍ତି । ବିଶ୍ୱବିଦ୍ୟାଳୟ ପରିସରରେ ଲାଗିଥିବା ଟେଣ୍ଟଗୁଡ଼ିକୁ ତୁରନ୍ତ ହଟାଇବା ନିମନ୍ତେ ନିର୍ଦ୍ଦେଶ ଦିଆଯାଇଛି । ଏହି ଟେଣ୍ଟଗୁଡ଼ିକରେ ଏବେ ୨୦୦ରୁ ଅଧିକ ଛାତ୍ରଛାତ୍ରୀ ଥିବା କୁହାଯାଉଛି ।
ଆମେରିକାରେ ଆନ୍ଦୋଳନ ଜାରି ରହିଥିବା ବେଳେ କଲମ୍ବିଆ ୟୁନିଭର୍ସିଟିରର ଛାତ୍ର ନେତା ଖ୍ୟମାନି ଜେମ୍ସଙ୍କୁ ବହିଷ୍କାର କରାଯାଇଛି । ଚଳିତବର୍ଷ ଜାନୁଆରୀରେ ହୋଇଥିବା ଏକ ବିକ୍ଷୋଭ ବେଳେ ସେ କହିଥିଲେ କି ଜାୟୋନିଷ୍ଟମାନଙ୍କୁ ବଞ୍ଚିବାର ଅଧିକାର ନାହିଁ । ସେମାନଙ୍କୁ ମାରିଦେବା ଆବଶ୍ୟକ । ଜାୟୋନିଷ୍ଟ ସେହିମାନଙ୍କୁ କୁହାଯାଉଛି, ଯେଉଁମାନେ ପାଲେଷ୍ଟାଇନ୍ରେ ଇସ୍ରାଏଲ୍ର ପ୍ରଭୁତ୍ୱ ବଢ଼ାଇବା ପାଇଁ ଅଭିଯାନ ଆରମ୍ଭ କରିଥିଲେ । ଏଥିସହ ଜାୟୋନିଷ୍ଟମାନଙ୍କ ବିଶ୍ୱାସ ଯେ ପାଲେଷ୍ଟାଇନ୍ ଉପରେ ଇହୁଦୀମାନଙ୍କର ଅଧିକାର ରହିଛି ।
ଜାନୁଆରୀରେ ପ୍ରସ୍ତୁତ ହୋଇଥିବା ଖ୍ୟମାନିଙ୍କ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଇତିମଧ୍ୟରେ ୟୁନିଭର୍ସିଟି ପକ୍ଷରୁ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି । ବିଶ୍ୱବିଦ୍ୟାଳୟରେ ଏକ ଶୁଣାଣି ପରେ ଖ୍ୟମାନିଙ୍କୁ ବରିଷ୍କାର ନିମନ୍ତେ ନିଷ୍ପତ୍ତି ହୋଇଥିଲା ।
