ନୂଆଦିଲ୍ଲୀ ୩୧।୭: ଗ୍ରୀଷ୍ମ ଋତୁରେ ଭାରତ-ଦୁବାଇ ରୁଟରେ ବିମାନ ଭଡ଼ା ଏବେ ଆକାଶ ଛୁଉଁଛି, ଏଥିରେ ଏୟାର ଇଣ୍ଡିଆ ଓ ଏୟାର ଇଣ୍ଡିଆ ଏକ୍ସପ୍ରେସ୍ ଟିକେଟ୍ ୫୦% ଶସ୍ତା ହୋଇଥିଲେ ବି ବିମାନରେ ଯାତ୍ରୀ ହେଉ ନାହାନ୍ତି। ଶସ୍ତା ଟିକେଟ୍ ସତ୍ତ୍ୱେ ବ୍ରାଣ୍ଡ ଉପରେ ସୁରକ୍ଷା ସନ୍ଦେହ ଏପରି ପରିସ୍ଥିତି ସୃଷ୍ଟି କରୁଥିବା ଅନୁମାନ କରାଯାଉଛି। ୧୨ ଜୁନ ୨୦୨୫ରେ ଅହମଦାବାଦ-ଲଣ୍ଡନ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣା ପରେ ଏୟାର ଇଣ୍ଡିଆ ବୁକିଂ ପାଖାପାଖି ୨୦% ହ୍ରାସ ହୋଇଛି।
ଏହି ଦୁର୍ଘଟଣା ଐତିହାସିକ ରୂପେ ବୋଇଂ ୭୮୭ ସମ୍ପର୍କିତ ପ୍ରଥମ ଘାତକ ଦୁର୍ଘଟଣା ଥିଲା। ଯାହା ଏହି ମଡେଲ ପାଇଁ ମଧ୍ୟ ପ୍ରଥମ ଏପରି ଘଟଣା ଥିଲା। ଦୁର୍ଘଟଣା ପରେ ଏୟାର ଇଣ୍ଡିଆ ବୁକିଂ ହ୍ରାସ ହୋଇଥିବା ବେଳେ ଅନ୍ତର୍ଜାତୀୟ ରୁଟରେ ଭଡ଼ା ମଧ୍ୟ ୮ରୁ ୧୫% ଶସ୍ତା କରି ଦିଆ ଯାଇଛି। କେବଳ ଅନ୍ତର୍ଜାତୀୟ ନୁହେଁ ଘରୋଇ ରୁଟରେ ମଧ୍ୟ କମ୍ପାନୀ ଟିକେଟ ଉପରେ ୧୦ରୁ ୧୨% ରିହାତି ଦେଉଛି।
ଏୟାର ଇଣ୍ଡିଆରେ ଏବେ ବୈଷୟିକ ତ୍ରୁଟି ମଧ୍ୟ ବଢିବାରେ ଲାଗିଛି। ବିଶେଷ କରି ଏୟାର କଣ୍ଡିସନିଂ ଓ ବୈଷୟିକ ତ୍ରୁଟି ଅଭିଯୋଗ ହେଉଛି। ଯାତ୍ରା ଏଜେନ୍ସୀ ରିପୋର୍ଟ ଅନୁସାରେ ଅହମଦାବାଦର ଗ୍ରାହକମାନେ ୫୦% ଏୟାର ଇଣ୍ଡିଆ ଟିକେଟ୍ କ୍ୟାନସଲ କରିଦେଇଛନ୍ତି ଅଥବା ଅନ୍ୟ ଏୟାର ଲାଇନ ବିକଳ୍ପ ବାଛିଛନ୍ତି। ଏଥିରେ ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (ଡିଜିସିଏ) ଏୟାର ଇଣ୍ଡିଆରେ ୫୧ଟି ସୁରକ୍ଷା ଅବ୍ୟବସ୍ଥା ଚିହ୍ନଟ କରିଛନ୍ତି।
ଏଥିରେ ଟ୍ରେନିଂ ଗ୍ୟାପସ୍, ଅନ ଆପୃଭଡ ସିମୁଲେଟର୍ସ ଓ କ୍ରିଉ ରୋଷ୍ଟରିଂ ସିଷ୍ଟମରେ ତ୍ରୁଟି ରହିଛି। ସେହିପରି ୭ ଗୁରୁତ୍ୱପୂର୍ଣ୍ଣ ଉଲ୍ଲଂଘନ ନିମନ୍ତେ ତୁରନ୍ତ ସୁଧାରର ଚେତାବନୀ ଜାରି କରାଯାଇଛି। ଏୟାର ଲାଇନ୍ସ ଉପରେ ଓଭର ଡ୍ୟୁଟି ଟାଇମ, ଜରୁରିକାଳୀନ ଉପକରଣ ଯାଞ୍ଚରେ ତ୍ରୁଟି ଓ କ୍ୟାବିନ କ୍ରିଉ ଅଭାବ ଭଳି ଆରୋପ ଲାଗିଛି।
