ଠିକାସଂସ୍ଥାର ମନମାନି ନେଇ ତାତିଲେ ମହିଳା : ରାସ୍ତା ଉପରେ ରାଇ ଦାମୋଦର ପୂଜା, ୩ ଘଣ୍ଟା ରାସ୍ତା ଜାମ୍

ଢେଙ୍କାନାଳ ୧୧।୧୦: ଠିକାସଂସ୍ଥାର ମନମାନି । ମନ୍ଦିରକୁ ଯିବାଆସିବା କରି ପାରୁନାହାନ୍ତି ମହିଳା । ଯାହାକୁ ନେଇ ଢେଙ୍କାନାଳ ଜିଲ୍ଲା ପୁରୁଷୋତ୍ତମପୁର ନିକଟରେ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି । ପ୍ରତିବାଦରେ ଅଞ୍ଚଳର ଶତାଧିକ ହାବିଷ୍ୟାଳୀ ଢେଙ୍କାନାଳ-ଭୁବନ ମୁଖ୍ୟରାସ୍ତା ଉପରେ ରାଇଦାମୋଦର ପୂଜା କରୁଛନ୍ତି । ଫଳରେ ଭୁବନ-ଢେଙ୍କାନାଳ ମଧ୍ୟରେ ଯୋଗଯୋଗ ସମ୍ପୂର୍ଣ୍ଣ ଠପ୍ ହୋଇଯିବାରୁ ପୋଲିସକୁ ନାକେଦମ୍ ହେବାକୁ ପଡିଛି ।

ରାସ୍ତା ଉପରେ ଚାଲିଛି  ପୂଜାର୍ଚ୍ଚନା ।  ରାଇ ଦାମୋଦର ଘଟ ସ୍ଥାପନା କରି ଘେରି ରହିଛନ୍ତି ଶତାଧିକ ମହିଳା ।  ହାବିଷ୍ୟାଳୀ ପୂଜାରେ ବସି ରହିଥିବାରୁ ଭୁବନ-ଢେଙ୍କାନାଳ ମୁଖ୍ୟ ରାସ୍ତାରେ ଯାତାୟାତ ଏକଦମ୍ ଠପ୍ ହୋଇଛି ।  ରାସ୍ତାର ଉଭୟ ପାର୍ଶ୍ଵରେ ଶହ ଶହ ସଂଖ୍ୟାରେ ଗାଡ଼ି ମଟର ଅଟକି ରହିଛି । କହିବାକୁ ଗଲେ ରାସ୍ତାରେ ଗାଡ଼ି ଚଳାଚଳ ସାଙ୍ଗକୁ ସାଧାରଣ ଯାତାୟତ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଯାଇଛି । ପୋଲିସ ଉପସ୍ଥିତ ଥାଇ  ମଧ୍ୟ ଏପରି ସ୍ଥିତିରେ କେବଳ ନୀରବଦ୍ରଷ୍ଟା ସାଜିବା ଏକପ୍ରକାର ବାଧ୍ୟ ହୋଇଛି ।

ଢେଙ୍କାନାଳ ଜିଲ୍ଲା ଭୁବନ ଥାନା ଅନ୍ତର୍ଗତ ପୁରୁଷୋତ୍ତମପୁର ଗ୍ରାମ ନିକଟରେ ଶନିବାର ଭୋର ସମୟରୁ ଏପରି ଅଭାବନୀୟ ଦୃଶ୍ୟ ଦେଖିବାକୁ ମିଳିଥିଲା । ସ୍ଥାନୀୟ ଲୋକଙ୍କ ଅଭିଯୋଗ ମୁତାବକ, ପୂଜାର୍ଚ୍ଚନା ପାଇଁ ବ୍ରାହ୍ମଣୀ ନଦୀ ପଠାରେ ଥିବା ମନ୍ଦିରକୁ ଯାଇଥାନ୍ତି । ମାତ୍ର ଗ୍ରାମ ନିକଟରେ ଏକ ମେଗା ଜଳ ବିଶୋଧନ ପ୍ରକଳ୍ପ କାର୍ଯ୍ୟ କରୁଥିବା ଠିକା ସଂସ୍ଥାର ଭାରିଯାନ ଯିବାଆସିବା କରି ମନ୍ଦିରକୁ ଯାଇଥିବା ରାସ୍ତାକୁ ସମ୍ପୂର୍ଣ୍ଣ ନଷ୍ଟ କରିଦେଇଛି ।  ଫଳରେ ଦୀର୍ଘ ଦୁଇ ମାସ ହେଲା ପୁରୁଷୋତ୍ତମପୁର ଓ ଆଖପାଖ ଗ୍ରାମର ଲୋକମାନେ ଉକ୍ତ ମନ୍ଦିରକୁ ପୂଜା କରିବା ପାଇଁ ଯିବାଆସିବା କରିପାରୁନାହାନ୍ତି । କାର୍ତ୍ତିକ ମାସ ହବିଷ ପୂଜା ଥିବାରୁ ଆଜକୁ ଦୁଇ ମାସ ହେବ ବାରମ୍ବାର ଅନୁରୋଧ କରିଥିଲେ ମଧ୍ୟ ରାସ୍ତା ମରାମତି କରୁନାହିଁ ଠିକାସଂସ୍ଥା । ଯାହା ଫଳରେ ଆଉ ବିକଳ୍ପ ନପାଇ ସ୍ଥାନୀୟ ଲୋକେ ଏପରି ଅଭିନବ ଢଙ୍ଗରେ ଆନ୍ଦୋଳନ ପାଇଁ ରାସ୍ତାକୁ ଓହ୍ଲାଇଥିବା ପ୍ରକାଶ କରିଛନ୍ତି ।

ଏପରି ଆନ୍ଦୋଳନ ଫଳରେ ଶନିବାର ଭୋର ସମୟରୁ ଦୀର୍ଘ ୩ ଘଣ୍ଟା ଧରି ମୁଖ୍ୟରାସ୍ତା ଅବରୋଧ ରହିଥିଲା । ଫଳରେ ସଧାରଣ ଯାତାୟତ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଥିଲା । ଯାତ୍ରୀ ମାନେ ନାନା ହଇରାଣ ହେବାରୁ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା । ଖବର ପାଇ କାମାକ୍ଷାନଗର ବିଧାୟକ ପହଞ୍ଚି ଫୋନ୍ ଯୋଗେ ଉକ୍ତ ଠିକାସଂସ୍ଥାକୁ ତାଗିଦ କରି ତୁରନ୍ତ ରାସ୍ତା ମରାମତି ପାଇଁ ନିର୍ଦ୍ଦେଶ ଦେଇଥିବା ଜଣାପଡିଛି ।