ୟୁକ୍ରେନ ବର୍ଡରରେ ସନ୍ଦେହଜନକ ଡ୍ରୋନ ଆଲର୍ଟ; ବିମାନବନ୍ଦର ବନ୍ଦ, ଯୁଦ୍ଧ ବିମାନ ମୁତୟନ କଲା ପୋଲାଣ୍ଡ

ନୂଆଦିଲ୍ଲୀ,୧୪।୯: ଋଷ-ୟୁକ୍ରେନ ଯୁଦ୍ଧ ମଧ୍ୟରେ ପୋଲାଣ୍ଡରେ ଡ୍ରୋନ୍ ଆକ୍ରମଣର  ଆତଙ୍କ ଖେଳିଯାଇଛି। ଏନେଇ ଲୁବଲିନ୍ ବିମାନବନ୍ଦରକୁ ବନ୍ଦ କରିଦିଆଯିବା ସହ ସାମରିକ ସତର୍କତା ବୃଦ୍ଧି କରାଯାଇଛି। ରିପୋର୍ଟ ଅନୁଯାୟୀ,ସନ୍ଦିଗ୍ଧ ଡ୍ରୋନ୍ କାର୍ଯ୍ୟକଳାପ ଦେଖି ପୋଲାଣ୍ଡ ତା'ର ଲଢ଼ୁଆ ବିମାନଗୁଡ଼ିକୁ ମୁତୟନ କରିଛି। ସେହିପରି ସ୍ଥଳଭାଗରେ ଥିବା ବାୟୁ ପ୍ରତିରକ୍ଷା ୟୁନିଟଗୁଡ଼ିକୁ ହାଇ ଆଲର୍ଟରେ ରଖାଯାଇଛି। 
ଗତ କିଛି ମାସ ମଧ୍ୟରେ ୟୁକ୍ରେନ ଯୁଦ୍ଧ ମଧ୍ୟରେ ପୋଲାଣ୍ଡ ସୀମାରେ ଡ୍ରୋନ୍ ଗତିବିଧିକୁ ନେଇ ଅନେକ ଥର ଚିନ୍ତା ପ୍ରକାଶ କରିଛି। ଏପରି ପରିସ୍ଥିତିରେ ଏହି ଘଟଣାକୁ ସୁରକ୍ଷା ଏଜେନ୍ସି ଗୁଡ଼ିକ ପାଇଁ ଏକ ବଡ଼ ଚ୍ୟାଲେଞ୍ଜ ଭାବରେ ବିବେଚନା କରାଯାଉଛି। ଏକ ରୁଷିଆନ୍ ଡ୍ରୋନ୍ ପୋଲାଣ୍ଡରେ ପ୍ରବେଶ କରିବା ପରେ ଉତ୍ତେଜନା ପୂର୍ବରୁ ଅଧିକ ଥିଲା। ଏବେ ଏହି ନୂତନ ଘଟଣା ସୁରକ୍ଷା ଏଜେନ୍ସିଗୁଡ଼ିକୁ ଆହୁରି ସତର୍କ କରିଦେଇଛି। ପୋଲାଣ୍ଡ ସ୍ପଷ୍ଟ ଭାବରେ କହିଛି ଯେ ଏହାର ସେନା ଏବଂ ସହଯୋଗୀ ଦେଶର ବିମାନରେ ନଜର ରଖୁଛନ୍ତି। ସେହିପରି ବାୟୁ ପ୍ରତିରକ୍ଷା ବ୍ୟବସ୍ଥାକୁ ହାଇ ଆଲର୍ଟରେ ରଖାଯାଇଛି।
ୟୁକ୍ରେନ ରାଷ୍ଟ୍ରପତି  ଜେଲେନସ୍କି ଏକ ବଡ଼ ବୟାନ ଦେଇ କହିଛନ୍ତି ଯେ,ରୁଷ ରାଷ୍ଟ୍ରପତି ଭ୍ଲାଦିମିର୍ ପୁଟିନ୍ ପୋଲାଣ୍ଡ ସହିତ ଯୁଦ୍ଧ କରିଛନ୍ତି। ସେ ୟୁରୋପୀୟ ଦେଶମାନଙ୍କୁ ଚେତାବନୀ ଦେଇଛନ୍ତି ଯେ ରୁଷ ଡ୍ରୋନ୍ ବହୁତ ଦୂରତା ଅତିକ୍ରମ କରିପାରିବ, ତେଣୁ ଏବେ ବାହାନା କରିବା ବନ୍ଦ କରନ୍ତୁ ଏବଂ ରୁଷ ଉପରେ କଠୋର କଟକଣା ଲାଗୁ କରନ୍ତୁ। ପୋଲାଣ୍ଡ ସଶସ୍ତ୍ର ବାହିନୀ ଏକ ବିବୃତ୍ତି ଜାରି କରି କହିଛି ଯେ,ୟୁକ୍ରେନ ସୀମାବର୍ତ୍ତୀ ଅଞ୍ଚଳରେ ସମ୍ଭାବ୍ୟ ଡ୍ରୋନ୍ ଆକ୍ରମଣକୁ ରୋକିବା ପାଇଁ ଏହି ଅପରେସନ୍ କରାଯାଉଛି । ସେନା ଅନୁଯାୟୀ, "ନାଗରିକ  ଏବଂ ଆକାଶପଥକୁ ସୁରକ୍ଷା ଦେବା ପାଇଁ ସମସ୍ତ ଆବଶ୍ୟକୀୟ ପ୍ରକ୍ରିୟା ସକ୍ରିୟ କରାଯାଇଛି। ପୋଲାଣ୍ଡ କହିଛି ଯେ ସୀମାବର୍ତ୍ତୀ ଅଞ୍ଚଳରେ ଯେକୌଣସି ଅପ୍ରୀତିକର ପରିସ୍ଥିତିକୁ ରୋକାଯାଇପାରିବ । ସେଥିପାଇଁ ଏହି ପଦକ୍ଷେପ ସମ୍ପୂର୍ଣ୍ଣ ପ୍ରତିରୋଧକ ପଦକ୍ଷେପ ଭାବରେ ନିଆଯାଇଛି।