ସୁବର୍ଣ୍ଣପୁର ୭।୧୧: ଅଚାନକ ବିନିକା ତହସିଲ କାର୍ଯ୍ୟାଳୟରେ ପହଞ୍ଚିଗଲେ ସୁବର୍ଣ୍ଣପୁର ଜିଲ୍ଲାପାଳ ଡ଼.ନୃପରାଜ ସାହୁ । ସରକାରୀ କାର୍ଯ୍ୟାଳୟଟି ଅବ୍ୟବସ୍ଥା ମଧ୍ୟରେ ରହିଥିବା ସେ ଦେଖିବାକୁ ପାଇଥିଲେ । କାର୍ଯ୍ୟରେ ଅବହେଳା କରିଛନ୍ତି କିଛି କର୍ମଚାରୀ । ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯିବ । କାମରେ ଅବହେଳା ପାଇଁ କନିଷ୍ଠ କିରାଣୀଙ୍କୁ ନିଲମ୍ବନ କଲେ ଜିଲ୍ଲାପାଳ ।

ସୂଚନାଯୋଗ୍ୟ ଯେ, ଶୁକ୍ରବାର ସକାଳୁ ସକାଳୁ ସୁବର୍ଣ୍ଣପୁର ଜିଲ୍ଲା ବିନିକା ତହସିଲ କାର୍ଯ୍ୟାଳୟକୁ ଜିଲ୍ଲାପାଳ ଡ଼.ନୃପରାଜ ସାହୁ ଅଚାନକ ପରିଦର୍ଶନ କରିଥିଲେ। ଏହି ସମୟରେ କାର୍ଯ୍ୟରେ ଅବହେଳା କରିଥିବା କନିଷ୍ଠ  କିରାଣୀ କୃଷ୍ଣଚନ୍ଦ୍ର ପଣ୍ଡାଙ୍କୁ ନିଲମ୍ବନ କରିଛନ୍ତି । ଜିଲ୍ଲାପାଳ ହଠାତ ତହସିଲ କାର୍ଯ୍ୟାଳୟରେ ପହଞ୍ଚି ସମସ୍ତ ବିଭାଗ ଗୁଡିକୁ ବୁଲି ଦେଖିଥିଲେ । ସମସ୍ତ ବିଭାଗ ଗୁଡିକର କୋଠା ଅପରିଷ୍କାର ସହ ମଇଳାରେ ଭର୍ତ୍ତି ରହିଥିଲା । ଏହାକୁ ଦେଖି ଜିଲ୍ଲପାଳ କର୍ମଚାରୀ ମାନଙ୍କ ଉପରେ ଅସନ୍ତୋଷ ବ୍ୟକ୍ତ କରିବା ସହ ତାଗିଦ ମଧ୍ୟ କରିଥିଲେ । କାର୍ଯ୍ୟାଳୟର ଜଣେ କିରାଣୀଙ୍କୁ ଆରଟିଆଇର ରେଜିଷ୍ଟର ଦେଖାଇବାକୁ କହିଥିଲେ । ହେଲେ ସେ ଦେଖାଇ ପାରିନଥିଲେ ।

ଏହାସହ ରେକର୍ଡ ଗୃହରେ ସାର୍ଟିଫାୟ କପି ଦେବାରେ ବହୁ ବିଳମ୍ବ ହେଉଥିବା ନେଇ ବରିଷ୍ଠ ଆଇନଜୀବୀ ସୁଧାଂଶୁ ଶେଖର ଦାଶ ଜିଲ୍ଲାପାଳଙ୍କୁ ଅଭିଯୋଗ କରିଥିଲେ । ଜିଲ୍ଲାପାଳ କର୍ମଚାରୀ ମାନଙ୍କୁ ଶୀଘ୍ର ପ୍ରଦାନ କରିବାକୁ ନିର୍ଦ୍ଦେଶ ଦେବା ସହିତ ଯେକୌଣସି ସରକାରୀ ସାର୍ଟିଫିକେଟ୍ ସରକାରୀ ହିସାବରେ ଯେତେଦିନ ମଧ୍ୟରେ ପ୍ରଦାନ କରାଯିବ ତାହାର ତାଲିକା ବାହାରେ ଛାପିବାକୁ ନିର୍ଦ୍ଦେଶ ଦେଇଛନ୍ତି । ତେବେ ଜିଲ୍ଲାପାଳ ଅଚାନକ ପରିଦର୍ଶନ କରୁଥିବାରୁ ବିଭିନ୍ନ କାର୍ଯ୍ୟାଳୟ ଗୁଡିକର କର୍ମଚାରୀ ସଜାଗ ରହୁଥିବା ଦେଖିବାକୁ ମିଳିଛି ।