ରାଜଧାନୀରେ ସେକ୍ସ ରାକେଟ୍ ଠାବ : ବିଲଡିଂରେ ସାଇଣ୍ଟିଫିକ୍ ଟିମ୍‌ର ଖୋଳତାଡ଼, ଅନୁଧ୍ୟାନ କଲା ମହିଳା କମିଶନ

ଭୁବନେଶ୍ବର ୧୯।୧୦: ରାଜଧାନୀରେ ସେକ୍ସ ରାକେଟ୍ ଠାବ ହେବା ଘଟଣାରେ ୪ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି ।  ଇଣ୍ଟରଷ୍ଟେଟ୍ ଲିଙ୍କ ଯାଞ୍ଚ କରୁଛି ପୋଲିସ ।  ଅଭିଯୁକ୍ତ ମାନଙ୍କୁ ୫ଦିନ ପାଇଁ ରିମାଣ୍ଡରେ ନେବା ପାଇଁ ଆବେଦନ କରିବ କମିଶନରେଟ ପୋଲିସ । ରବିବାର ସଂପୃକ୍ତ ବିଲଡିଂରେ ସାଇଣ୍ଟିଫିକ ଟିମ୍ ପହଞ୍ଚି ଯାଞ୍ଚ କରିଛି । ଘରର ସବୁ ଥାକ, ଖଟ ଆଉ ଆଲମାରୀ ଯାଞ୍ଚ କରିଛି।  ଏଠାରୁ ବହୁ ଆପତ୍ତିଜନକ ସାମଗ୍ରୀ ମିଳିଛି, ଏଠାରୁ ସାମ୍ପଲ ସଂଗ୍ରହ କରିଛି ଟିମ୍ । ସେହିପରି କିଛି ରକ୍ତନମୁନା ମଧ୍ୟ ମିଳିଛି ।  ନାବାଳିକା ଦୁଷ୍କର୍ମ ଅଭିଯୋଗର ସୁରାକ ଖୋଜି ଏହି ଘରେ ପହଞ୍ଚିଥିଲା ପୋଲିସ । ମୋବାଇଲ୍ ନମ୍ବର୍ ଓ ସିସିଟିଭିରେ ମିଳିଥିବା ଭିଜୁଆଲକୁ ଯାଞ୍ଚ କରିବାରୁ ଏହି ଘରର ଠିକଣା ମିଳିଥିଲା ।  ରୁମ୍ ଭିତରେ ରୁମ୍ । ଘରେ ପଶି ଅବାକ ହୋଇଯାଇଥିଲା ପୋଲିସ । ଏଠାରୁ କିଛି ଝାଡ଼ଖଣ୍ଡର ଯୁବତୀଙ୍କୁ  ଉଦ୍ଧାର କରାଯାଇଥିଲା । ଅଭିଯୋଗ ହେଉଛି ଯେ ଏଠାରେ ଏକ ରାକେଟ ଚଳାଉଥିଲା ମଞ୍ଜୁ ସେଠୀ । ମଞ୍ଜୁ ସେଠୀ, ଅବିନାଶ ମୁଦୁଲି, ମମତା ଦାସ ଓ ଘର ମାଲିକ ବାପି ଦାସକୁ ପୋଲିସ ଧରିଥିବା ବେଳେ ରବିବାର ସେମାନଙ୍କୁ କୋର୍ଟ ଚାଲାଣ କରାଯାଇଛି । କିଙ୍ଗ୍‌ପିନ୍‌କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଚାଲିଛି । ଝାଡ଼ଖଣ୍ଡ ଏବଂ ପଶ୍ଚିମବଙ୍ଗକୁ ଦୁଇଟି ଟିମ୍‌ ଯାଇଛନ୍ତି ।  

ସ୍ଥାନୀୟ ଲୋକେ ବହୁ ପୂର୍ବରୁ ଅଭିଯୋଗ କରିଆସୁଥିଲେ । ଏହି ଘରକୁ ପ୍ରତ୍ୟେକ ଦିନ ଦାମୀ ଗାଡ଼ି ଆସୁଥିଲା ଓ ରହସ୍ୟମୟ ଲୋକଙ୍କର ଆତଯାତ ରହୁଥିଲା । ବାରମ୍ବାର ଅଭିଯୋଗ କରାଯାଉଥିଲେ ମଧ୍ୟ ଲୋକଙ୍କୁ ଧମକ ଚମକ ଦେଇ ରଖିଥିଲେ ଘର ମାଲିକ । ଏହି ଘରକୁ ପୂରା ସିଲ୍‌ କରିବାକୁ ଲୋକେ ଦାବି କରିଛନ୍ତି।

ସେହିପରି ମହିଳା କମିଶନ ଅଧ୍ୟକ୍ଷା ଶୋଭନା ମହାନ୍ତି ମଧ୍ୟ ଲକ୍ଷ୍ମୀ ସାଗରରେ ପହଞ୍ଚି ସେହି ଘରର ଅନୁଧ୍ୟାନ କରିଛନ୍ତି । ଘଟଣାରେ ଆଉ ଜଣେ ପାର୍ଟନର ବାରିକ ବାବୁ ଆଉ ମଞ୍ଜୁ ସେଠୀଙ୍କ ଜ୍ବାଇଁ ଫେରାର ଅଛନ୍ତି । କିଏ ସେ ବାରିକ ବାବୁ ।  ଯିଏ ବିଭିନ୍ନ ରାଜ୍ୟରୁ ଝିଅଙ୍କୁ ଆଣି ଏଠାରେ ଅନୈତିକ କାର୍ଯ୍ୟରେ ଲଗାଉଥିଲା । ରାଜଧାନୀରେ ବଡ଼ ବଡ଼ିଆଙ୍କୁ ଟ୍ରାପ କରିବା ପାଇଁ ଏହି ମହୁମାଛିଙ୍କୁ ବ୍ୟବହାର କରାଯାଉଥିବା ସନ୍ଦେହ ହେଉଛି । ଏହି ରାକେଟରେ ବାଂଲାଦେଶୀ ସଂପୃକ୍ତ ଥିବା ମଧ୍ୟ ସନ୍ଦେହ କରାଯାଉଛି ।