ବ୍ରିଟେନରେ ମିଳିଲା ୮୦ ଫୁଟ୍ ଲମ୍ୱ ସାମୁଦ୍ରିକ ଜୀବର ଜୀବାଶ୍ମ...ନିଜ ସମୟରେ ଥିଲେ ସବୁଠୁ ବଡ଼ ଶିକାରୀ

ନୂଆଦିଲ୍ଲୀ: ହଜାର ହଜାର ବର୍ଷ ପୂର୍ବେ ଦୁନିଆରେ କ'ଣ କ'ଣ ଘଟିଥିଲା ? କେଉଁମାନେ ସେହି ସମୟରେ ଦୁନିଆରେ ବାସ କରୁଥିଲେ ? ଆଜି ବି ତାହା ମଣିଷ ପାଇଁ ଗବେଷଣର ବିଷୟ । ଏହାରି ଭିତରେ ବୈଜ୍ଞାନିକମାନେ ଇତିହାସର ଏପରି ଏକ ଜୀବର ସନ୍ଧାନ ପାଇଛନ୍ତି, ଯାହାର ଆକାର ଆଜିର ସମୟରେ ଔର୍କା ତିମିଠାରୁ ମଧ୍ୟ ବଡ଼ ଥିଲା। ୨୦୦ ନିୟୁତ ବର୍ଷ ପୂର୍ବେ, ସମୁଦ୍ରରେ ଏକ ବିଶାଳକାୟ ପ୍ରାଣୀ ଥିଲା । ଯାହା ସେହି ସମୟର ଔର୍କା ତିମି ପରି ବଡ଼ ଶିକାରୀ ଥିଲା । ବୈଜ୍ଞାନିକମାନେ କହିଛନ୍ତି ଯେ ଇଚଥିଓଟାଇଟାନ୍ ସେଭେରେନ୍ସିସ୍ ନାମକ ଏହି ପ୍ରାଣୀ ପ୍ରାୟ ୮୦ ଫୁଟ ଲମ୍ବା ଥିଲା । ଏହା ଆଜି ପର୍ଯ୍ୟନ୍ତ ଆବିଷ୍କୃତ ହୋଇଥିବା ସବୁଠାରୁ ବଡ଼ ଇଚଥିଓସର ବୋଲି ବିଶ୍ୱାସ କରାଯାଏ ।

ବ୍ରିଟେନରେ ମିଳିଥିବା ପାଟିର ଜୀବାଶ୍ମ ବୈଜ୍ଞାନିକମାନଙ୍କୁ ସେହି ସମୟର ସାମୁଦ୍ରିକ ଜଗତକୁ ନେଇ ନୂଆ ଦୃଷ୍ଟିକୋଣ ଦେଇଛି । ଉଲ୍ଲେଖଯୋଗ୍ୟ, ଇଚଥିଓସର ହେଉଛନ୍ତି ବିଲୁପ୍ତ ସାମୁଦ୍ରିକ ସରୀସୃପ । ଏହା ପ୍ରାୟ ୨୫୦ ନିୟୁତ ବର୍ଷ ପୂର୍ବେ ଟ୍ରାଇସିକ୍ ଯୁଗରୁ ୯୦ ନିୟୁତ ବର୍ଷ ପୂର୍ବେ କ୍ରେଟାସିୟସ୍ ଯୁଗ ପର୍ଯ୍ୟନ୍ତ ଅସ୍ତିତ୍ୱରେ ଥିଲେ । ଇଚଥିଓସରମାନେ ସମୁଦ୍ରର ପ୍ରାଚୀନ ତିମି ପରି ସରୀସୃପ ଥିଲେ । ନିଜ ସମୟରେ ସେମାନଙ୍କ ସବୁଠାରୁ ଦ୍ରୁତ ଏବଂ ଶକ୍ତିଶାଳୀ ଶିକାରୀ ଥିଲେ । ଲଣ୍ଡନର ପ୍ରାକୃତିକ ଇତିହାସ ସଂଗ୍ରହାଳୟ ଅନୁଯାୟୀ, ୨୦୧୮ରେ ବ୍ରିଟିଶ ଜୀବାଶ୍ମ ବିଜ୍ଞାନୀ ଡକ୍ଟର ଡିନ୍ ଲୋମାକ୍ସ ଏବଂ ତାଙ୍କ ଦଳ ପ୍ରଥମ ଥର ପାଇଁ ପାଟି ହାଡର ଏକ ଖଣ୍ଡ ପାଇଥିଲେ ।

ଇଚଥିଓଟାଇଟାନର ଆକାର ଆଜିର ଫିନ୍ ତିମି ସହିତ ସମାନ ଏବଂ ଔର୍କା ତିମି ଅପେକ୍ଷା ବହୁତ ବଡ଼ । ଔର୍କା ସର୍ବାଧିକ 30 ଫୁଟ ପର୍ଯ୍ୟନ୍ତ ବଢ଼ିଥାଏ ଏବଂ ଫିନ୍ ତିମି ପ୍ରାୟ ୮୫ ଫୁଟର ହୋଇଥାଏ । ଏହା ସ୍ପଷ୍ଟ କରୁଛି ଯେ ସ୍ତନ୍ୟପାୟୀ ପ୍ରାଣୀଙ୍କ ପୂର୍ବରୁ ମଧ୍ୟ ଟ୍ରାଇସିକ୍ ଯୁଗର ସମୁଦ୍ରରେ ବିଶାଳ ପ୍ରାଣୀ ଉପସ୍ଥିତ ଥିଲେ । ବୈଜ୍ଞାନିକଙ୍କ ମତରେ ଇଚଥିଓଟାଇଟାନ୍ ସେଭେରେନ୍ସିସର ଆବିଷ୍କାର ଦର୍ଶାଉଛି ଯେ ଟ୍ରାଇସିକ୍ ଯୁଗରେ ସମୁଦ୍ରରେ ଏପରି ଶିକାରୀ ଥିଲେ ଯେଉଁମାନେ ସେହି ସମୟର ଖାଦ୍ୟ ଶୃଙ୍ଖଳାର ସବୁଠୁ ଉପରେ ରହୁଥିଲେ । 

ବୈଜ୍ଞାନିକମାନେ ଏହାର ବିଶାଳତା ଦେଖି ପ୍ରଥମେ ଏକ ଡାଇନୋସର ହାଡ଼ ବୋଲି ଭାବିଥିଲେ । କିନ୍ତୁ ଅଧିକ ଗବେଷଣା ପରେ ଏହା ଇଚଥିଓସରର ଏକ ଅଂଶ ବୋଲି ଜଣାପଡ଼ିଥିଲା । ୨୦୨୦ରେ ବୈଜ୍ଞାନିକମାନେ ସମରସେଟର ଉପକୂଳରେ ଦ୍ୱିତୀୟ ପାଟି ଖଣ୍ଡ ଆବିଷ୍କାର କରିଥିଲେ । ନୂଆ ଆବିଷ୍କାର ପୂର୍ବ ଅପେକ୍ଷା ଅଧିକ ସଂରକ୍ଷିତ ଥିଲା । ଅଧ୍ୟୟନ ପରେ ଉଭୟ ଜୀବାଶ୍ମକୁ ସମାନ ପ୍ରଜାତିର ବୋଲି ବିବେଚନା କରାଯାଇଥିଲା । ୨୦୨୪ରେ ଇଚଥିଓଟାଇଟାନ୍ ସେଭେରେନ୍ସିସ୍ ନାଁରେ ନୂଆ ନାମକରଣ କରାଯାଇଥିଲା । ପାଟିର ଲମ୍ବ ଛଅ ଫୁଟରୁ ଅଧିକ ଥିଲା, ଯାହାକୁ ନେଇ ପ୍ରାଣୀର ମୋଟ ଲମ୍ବ ୮୦ ଫୁଟ ପର୍ଯ୍ୟନ୍ତ ହୋଇଥାଇପାରେ ବୋଲି ବୈଜ୍ଞାନିକମାନେ ଆକଳନ କରିଥିଲେ ।