ସାବରୀମାଲା ମନ୍ଦିରରୁ ୭ କୋଟି ଟଙ୍କାର ସୁନା ଚୋରି ! ଭିଜିଲାନ୍ସ ତଦନ୍ତ ନିର୍ଦ୍ଦେଶ ଦେଲେ ହାଇକୋର୍ଟ

ନୂଆଦିଲ୍ଲୀ: ସାବରୀମାଳା ଆୟାପନ ମନ୍ଦିରରେ ଥିବା 'ଦ୍ୱାରପାଳକ' ମୂର୍ତ୍ତିଗୁଡ଼ିକରୁ ଗାଏବ ସୁନା ଖୋଜିବା ପାଇଁ କେରଳ ହାଇକୋର୍ଟ ଭିଜିଲାନ୍ସ ତଦନ୍ତ ନିର୍ଦ୍ଦେଶ ଦେଇଛନ୍ତି । ହାଇକୋର୍ଟ ଏହି ମାମଲାର ସ୍ୱତଃ ହସ୍ତକ୍ଷେପ କରି ପ୍ରାୟ ୪.୫୪ କିଲୋଗ୍ରାମ ସୁନା ଗାଏବ ହେବା ଉପରେ ଚିନ୍ତା ପ୍ରକାଶ କରିଛନ୍ତି । ରିପୋର୍ଟ ଅନୁଯାୟୀ ୨୦୧୯ ମସିହାରେ ମୂର୍ତ୍ତିଗୁଡ଼ିକୁ ପୁନର୍ବାର ପ୍ଲେଟିଂ କରାଯିବା ପରଠାରୁ ଏହି ସୁନା ଗାଏବ ହୋଇଛି ।  ଗାଏବ ସୁନାର ମୂଲ୍ୟ ପ୍ରାୟ ୭ କୋଟି ଥିବା ଅନୁମାନ କରାଯାଉଛି ।

ଜଷ୍ଟିସ୍ ରାଜା ବିଜୟରାଘବନ ଭି ଏବଂ କେଭି ଜୟକୁମାରଙ୍କ ଖଣ୍ଡପୀଠ ଲକ୍ଷ୍ୟ କରିଥିଲେ ଯେ ଦ୍ୱାରପାଳଙ୍କୁ ୨୦୧୯ରେ ନୂତନ ସୁନା ପ୍ଲେଟିଂ କରିବା ପାଇଁ ବାହାରକୁ ନିଆଯାଉଥିବା ସମୟରେ ସେମାନଙ୍କର ଓଜନ ୪୨.୮ କିଲୋଗ୍ରାମ ଥିଲା । କିନ୍ତୁ, ଯେତେବେଳେ ସେଗୁଡ଼ିକୁ ଚେନ୍ନାଇର ଏକ ଫାର୍ମକୁ କାମ ପାଇଁ ଦିଆଯାଇଥିଲା, ସେତେବେଳେ ସେମାନଙ୍କର ଓଜନ ୩୮.୨୫୮ କିଲୋଗ୍ରାମ ଥିବା ଜଣାପଡ଼ିଥିଲା ।

କୋର୍ଟ ୪.୫୪ କିଲୋଗ୍ରାମର ଓଜନ ହ୍ରାସକୁ "ଚିନ୍ତାଜନକ" ବୋଲି କହିଛନ୍ତି । ତା'ପରେ କୋର୍ଟ ଏକ ବିସ୍ତୃତ ଏବଂ ବ୍ୟାପକ ତଦନ୍ତ କଥା କହିଥିଲେ। ହାଇକୋର୍ଟ ଏହା ମଧ୍ୟ ପ୍ରଶ୍ନ କରିଥିଲେ ଯେ ମନ୍ଦିର ପରିଚାଳନା କରୁଥିବା ଟ୍ରାଭାଙ୍କୋର ଦେବସ୍ୱମ ବୋର୍ଡ (TDB) ସେତେବେଳେ ଏହି ସୂଚନା ଦେବାରେ କାହିଁକି ବିଫଳ ହୋଇଥିଲା । ମାମଲାଟି ମନ୍ଦିରରେ ସ୍ଥାପିତ "ଦ୍ୱାରପାଳ" ମୂର୍ତ୍ତି ସହିତ ଜଡିତ, ଯାହା ହିନ୍ଦୁ ମନ୍ଦିର ସ୍ଥାପତ୍ୟର ଏକ ସାଧାରଣ ବୈଶିଷ୍ଟ୍ୟ ।

ମନ୍ଦିରର ଗର୍ଭଗୃହ କିମ୍ବା ଅନ୍ୟାନ୍ୟ ପବିତ୍ର ସ୍ଥାନର ପ୍ରବେଶ ଦ୍ୱାର ପାଖରେ ଯୋଦ୍ଧା କିମ୍ବା ଦିବ୍ୟ ଜୀବମାନଙ୍କର ପ୍ରତିମା ଶୋଭା ପାଇଥାଏ । ଏହି ପ୍ରତିମାଗୁଡ଼ିକ ମନ୍ଦିରର ଦ୍ୱାରପାଳ ଭାବରେ କାର୍ଯ୍ୟ କରନ୍ତି । ଏଗୁଡ଼ିକୁ ନକାରାତ୍ମକ ପ୍ରଭାବରୁ ଗର୍ଭଗୃହକୁ ରକ୍ଷା କରିବା ଏବଂ ଭିତରେ ଥିବା ଦେବତାଙ୍କ ପବିତ୍ରତା ସୁନିଶ୍ଚିତ କରିବା ପାଇଁ ସ୍ଥାପନ କରାଯାଇଥାଏ । ସାବରୀମାଳା ମନ୍ଦିରରେ ସୁନା ଖଚିତ ଦ୍ୱାରପାଳ ପ୍ରତିମାଗୁଡ଼ିକ ମନ୍ଦିରର ଐତିହ୍ୟ ଏବଂ ସ୍ଥାପତ୍ୟ ପରମ୍ପରାର ଏକ ଗୁରୁତ୍ୱପୂର୍ଣ୍ଣ ବୈଶ୍ୟଷ୍ଟ ଅଟନ୍ତି ।

ମରାମତି ପାଇଁ ଦ୍ୱାରପାଳ ମୂର୍ତ୍ତିଗୁଡ଼ିକରୁ ସୁନା ପ୍ଲେଟେଡ୍ ପ୍ୟାନେଲ୍ ହଠାତ୍ ଏବଂ ବେଆଇନ ଭାବେ ହଟାଯିବା ଉପରେ ଏକ ଆବେଦନର ଶୁଣାଣି କରି ହାଇକୋର୍ଟର ତଦନ୍ତ ଆରମ୍ଭ ହୋଇଥିଲା । କୋର୍ଟ ପୂର୍ବରୁ ଚେନ୍ନାଇରୁ ପ୍ୟାନେଲଗୁଡ଼ିକୁ ପୁନଃରୁଦ୍ଧାର କରିବା ପାଇଁ ଟିଡିବିକୁ ନିର୍ଦ୍ଦେଶ ଦେଇଥିଲେ । ନୂଆ ଆଦେଶରେ, କୋର୍ଟ କେବଳ ନିଖୋଜ ସୁନା ବିଷୟରେ ଉଲ୍ଲେଖ କରିନଥିଲେ ବରଂ ଅନେକ ପ୍ରଶାସନିକ ତ୍ରୁଟିକୁ ମଧ୍ୟ ଉଲ୍ଲେଖ କରିଥିଲେ। ଯେଉଁଥିରେ ଉପଯୁକ୍ତ ପ୍ରୋଟୋକଲ୍ ଅନୁସରଣ ନକରି ଏହି ମୂଲ୍ୟବାନ ଜିନିଷଗୁଡ଼ିକୁ ଏକ ଘରୋଇ ସଂସ୍ଥାକୁ ହସ୍ତାନ୍ତର କରାଯାଇଥିଲା । କୋର୍ଟ ଟିଡିବିର ମୁଖ୍ୟ ସତର୍କତା ଏବଂ ସୁରକ୍ଷା ଅଧିକାରୀଙ୍କୁ ତିନି ସପ୍ତାହ ମଧ୍ୟରେ ଏକ ବିସ୍ତୃତ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି । ଟିଡିବିକୁ ଭିଜିଲାନ୍ସ ତଦନ୍ତରେ ପୂର୍ଣ୍ଣ ସହଯୋଗ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି ।