ବାଂଲାଦେଶ ନିର୍ବାଚନ : ପରାଜୟକୁ ଗ୍ରହଣ କରୁନି ଜମାତ, ନିର୍ବାଚନ ପୂର୍ବରୁ ଭାରତକୁ ଦେଇଥିଲା ଧମକ

ଢାକା, ୧୩|୦୨: ବାଂଲାଦେଶରେ ସରିଛି ନିର୍ବାଚନ । ସରକାର ଗଠନ କରିବାକୁ ଯାଉଛି ବିଏନପି । ନିର୍ବାଚନରେ ଶୋଚନୀୟ ଭାବେ ପରାସ୍ତ ହୋଇଛି ଜମାତ-ଏ-ଇସଲାମି । ତେବେ ବିଏନପିକୁ ମିଳିଥିବା ବହୁମତକୁ ଗ୍ରହଣ କରିନି ଜମାତ । ନିର୍ବାଚନର ଫଳାଫଳ ସ୍ୱଚ୍ଛ ନୁହେଁ ବୋଲି ଜମାତ ଅଭିଯୋଗ କରିଛି ।

ଜମାତ ନିଜ ବୟାନରେ କହିଛି ଯେ, ସେମାନେ ୧୧ ସହଯୋଗୀ ଦଳ ସହ ମେଣ୍ଟ କରିଥିଲେ। ଅନେକ ଜାଗାରେ କମ୍ ଭୋଟ୍ ବ୍ୟବଧାନରେ ଜମାତ ପ୍ରାର୍ଥୀ ପରାସ୍ତ ହୋଇଛନ୍ତି । ନିର୍ବାଚନରେ ସ୍ୱଚ୍ଛତାକୁ ନେଇ ସନ୍ଦେହ ହେଉଛି । ନିର୍ବାଚନ ପରିଚାଳନାକୁ ନେଇ ମଧ୍ୟ ପ୍ରଶ୍ନବାଚୀ ଉଠୁଛି । ନିର୍ବାଚନ ଆୟୋଗ ସଠିକ ସମୟରେ ମତଦାନର ପ୍ରତିଶତ ଘୋଷଣା କରି ନାହାଁନ୍ତି । ପ୍ରଶାସନର ଗୋଟିଏ ଗୋଷ୍ଠୀ ବିଏନପି ପ୍ରତି ଅତ୍ୟଧିକ ଅନୁକମ୍ପା ଦେଖାଇଥିବା ସମସ୍ତେ ସନ୍ଦେହ କରୁଛନ୍ତି । ଏହାସହ ଜମାତ ନିଜ ସମର୍ଥକଙ୍କୁ ଧୈର୍ଯ୍ୟ ଧରିବାକୁ କହିଛି ।

ନିର୍ବାଚନ ପୂର୍ବରୁ ଦଳର ମୁଖ୍ୟ ସଫିକୁର୍ ରହମାନ ଢାକା ଟ୍ରିବ୍ୟୁନକୁ ସାକ୍ଷାତକାର ଦେଇଥିଲେ । ଏଥିରେ ସେ ଜନତା ଭୋଟରେ ଅନ୍ୟ ଦେଶ ପାଇଁ ଗୋଲାମ କରୁଥିବା ନେତା ଏବଂ ଦଳକୁ ଜବାବ ଦେବେ ବୋଲି ସେ କହିଥିଲେ । ଏହାଦ୍ୱାରା ସେ ଭାରତକୁ ପରୋକ୍ଷରେ ଟାର୍ଗେଟ୍ କରିଥିଲେ ।

ବାଂଲାଦେଶରେ ସେଖ ହସିନାଙ୍କ ସରକାରକୁ ହଟାଇଥିବା ନ୍ୟାଶନାଲ ସିଟିଜେନ୍ ପାର୍ଟିକୁ ଜମାତ ପ୍ରତିଷ୍ଠା କରିଥିଲା । ଏହା ଏବେ ଜମାତର ସହଯୋଗୀ ଦଳ । ଗତ କିଛି ଦିନ ହେଲା ନ୍ୟାଶନାଲ ସିଟିଜେନ୍ସ ପାର୍ଟିର ନେତା ଭାରତ ବିରୋଧରେ ବୟାନ ବାଜି କରି ଆସୁଛନ୍ତି । ଯଦି ବାଂଲାଦେଶ ଅସ୍ଥିର ହେବ ତାହାଲେ ସୀମା ଅତିକ୍ରମ କରି ଏହାକୁ ବିରୋଧ କରାଯିବ । ଭାରତର ଉତ୍ତରପୂର୍ବ ରାଜ୍ୟରେ ଅସ୍ଥିରତା ସୃଷ୍ଟି କରାଯିବ ବୋଲି ଦଳର ମୁଖ୍ୟ ହସନତ ଅବ୍ଦୁଲା ଧମକ ଦେଇଥିଲେ ।

ବିଏନପିର ବିଜୟରେ ମୋଦୀଙ୍କ ଶୁଭେଚ୍ଛା

ବାଂଲାଦେଶ ନିର୍ବାଚନରେ ବିଏନପି ବାଜିମାତ କରିଛି । ଦଳ ସରକାର ଗଠନର ଦ୍ୱାରଦେଶରେ ପହଁଚିଛି । ମୋଟ୍ ୩୦୦ ଆସନରୁ ବିଏନପି ୨୦୦ରୁ ଅଧିକ ଆସନ ଜିତିଛି । ଦଳର ସୁପ୍ରିମ୍ ନେତା ତାରିକ ରେହମାନ ଦୁଇଟି ଆସନରୁ ବିଜୟୀ ହୋଇ ପ୍ରଧାନମନ୍ତ୍ରୀ ହେବାକୁ ଯାଉଛନ୍ତି। ତେବେ ବିଏନପିର ବିଜୟରେ ଶୁଭେଚ୍ଛା ଜଣାଛନ୍ତି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ।

ପ୍ରଧାନମନ୍ତ୍ରୀ ମୋଦୀ ବିଏନପି ତଥା ଦଳର ନେତା ତାରିକଙ୍କୁ ଶୁଭେଚ୍ଛା ଜଣାଇଛନ୍ତି । ସେ ନିଜ ଏକ୍ସରେ ଲେଖିଛନ୍ତି ଯେ, ତାରିକଙ୍କୁ ଅନେକ ଅନେକ ଶୁଭେଚ୍ଛା ଏବଂ ଅଭିନନ୍ଦନ । ବିଏନପି ନିର୍ବାଚନରେ ବଡ ବିଜୟପ୍ରାପ୍ତ କରିଛି । ଏହା ଜନତାଙ୍କ ବିଶ୍ୱାସର ପ୍ରତୀକ । ଭାରତ ସଦାବେଲେ ବାଂଲାଦେଶ ସହ ଉତ୍ତମ ସମ୍ପର୍କ ପାଇଁ ପ୍ରୟାସ କରିଥାଏ । ଏବେ ଦୁଇ ଦେଶର ସମ୍ପର୍କ ଏବଂ ସହଯୋଗୀତା ସୁଦୃଢ ହେବ ବୋଲି ମୋଦୀ ପ୍ରକାଶ କରିଛନ୍ତି ।