ବଲାଙ୍ଗିର ୧୮।୯: ନାଟକରେ ଅଭିନୟ କରିବାକୁ ଯାଇଥିଲେ । ମଞ୍ଚରୁ ଓହ୍ଲାଇ ଅସୁସ୍ଥ ହୋଇଗଲେ । ଏକାସଙ୍ଗେ ୧୦ ମହିଳା କଳାକାର ଅଚେତ୍ ହୋଇଛନ୍ତି । ବଲାଙ୍ଗିର ଜିଲ୍ଲା ଦେଓଗାଁ ଥାନା ଉପରଝର ଗାଁରେ ଘଟିଛି ଏଭଳି ଘଟଣା । ସୁବର୍ଣ୍ଣପୁର ଜିଲ୍ଲା ତରଭା ଥାନା ଖଇରଭାଡ଼ି ଗାଁରୁ ନାଟକ ସାରି ଫେରିବା ପରେ ଅସୁସ୍ଥ ହୋଇଛନ୍ତି କଳାକାର । ଗାଁରେ ଝଡ଼ାଫୁଙ୍ଖା କରିବା ପରେ ଭୀମଭୋଇ ମେଡିକାଲ କଲେଜ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି ହୋଇଛନ୍ତି ।

ସୂଚନାଯୋଗ୍ୟ ଯେ, ବଲାଙ୍ଗିର ଜିଲ୍ଲା ଦେଓଗାଁ ଥାନା ଉପରଝର ଗାଁର ତଳିପଡ଼ାରେ ଥିବା ମହିଳା ରାମଲୀଳା ନାଟକ ପାର୍ଟି ବୁଧବାର ରାତିରେ ସୁବର୍ଣ୍ଣପୁର ଜିଲ୍ଲାର ଗାଁରେ ନାଟକ ପରିବେଷଣ କରୁଥିଲେ । ଏହି ସମୟରେ ହଠାତ ରାମାୟଣର ବିଭିନ୍ନ ଭୂମିକାରେ ଅଭିନୟ କରିବା ପାଇଁ ସଜ୍ଜିତ ହୋଇଥିବା ଝିଅ ମାନେ ଅସୁସ୍ଥ ଅନୁଭବ କରିଥିଲେ । ମଞ୍ଚ ତଳକୁ ଓହ୍ଲାଇବା ବେଳେ ତଳେ ଅଚେତ ହୋଇ ପଡ଼ିଯାଇଥିଲେ । ନାଟକକୁ ବନ୍ଦ କରି ଗାଁକୁ ପଳାଇ ଆସିଥିଲେ କଳାକାର । ହେଲେ ଗାଁରେ ମଧ୍ୟ ଅବସ୍ଥାରେ ସୁଧାର ଆସିନଥିଲା । ଫଳରେ ଗୁରୁବାର ସକାଳୁ ଗୁଣି ଗାରେଡ଼ି ହୋଇଥିବା ସନ୍ଦେହ କରି ଝଡାଫୁଙ୍କା କରିବା ଅସୁସ୍ଥ କଳାକାର ମାନଙ୍କୁ ପରିବାର ଲୋକେ ଭୀମଭୋଇ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରିଥିବା ଜଣାପଡିଛି । ତେବେ ଏନେଇ ଖବର ପାଇବା ପରେ ଦେଓଗାଁ ପୋଲିସ ଉପରଝର ଗାଁରେ ପହଞ୍ଚି ପ୍ରାଥମିକ ତଦନ୍ତ କରୁଥିବା ସୂଚନା ମିଳିଛି ।
​​​