ବାଜିଲାଣି ସତର୍କ ଘଣ୍ଟି; ୩ ଦିନ ଧରି ଅନ୍ଧାରରେ ୟୁରୋପର ସର୍ବବୃହତ ନ୍ୟୁକ୍ଲିୟର ପ୍ଲାଣ୍ଟ  

​​​​​​​ନୂଆଦିଲ୍ଲୀ ୨୭।୦୯:  ​​​​​​​ୟୁକ୍ରେନ ଏବଂ ରୁଷ ଯୁଦ୍ଧ ମଧ୍ୟରେ ୟୁରୋପର ସର୍ବବୃହତ ପରମାଣୁ ଶକ୍ତି କେନ୍ଦ୍ର ଜାପୋରିଝିଆ ପରମାଣୁ କେନ୍ଦ୍ର ପୁଣି ଆସିଛି ଚର୍ଚ୍ଚାକୁ । ଗତ ୩ ଦିନ ଧରି ବାହାରରୁ ଆସୁଥିବା ବିଦ୍ୟୁତ୍ ସମ୍ପୂର୍ଣ୍ଣ ଭାବରେ ବନ୍ଦ ହୋଇଛି । ଏହା ଏପର୍ଯ୍ୟନ୍ତ ସବୁଠାରୁ ଲମ୍ବା ବିଦ୍ୟୁତ ବିଭ୍ରାଟ । ଯାହାପରେ ସୃଷ୍ଟି ହୋଇଛି ଗମ୍ଭୀର ସୁରକ୍ଷା ଚିନ୍ତା ।

ପରମାଣୁ କେନ୍ଦ୍ରରେ ଗଚ୍ଛିତ ଇନ୍ଧନକୁ ଅଧିକ ଗରମ ଏବଂ ତରଳିବାରୁ ରୋକିବା ପାଇଁ ନିରନ୍ତର ଶୀତଳୀକରଣ ଆବଶ୍ୟକ । ଏଥିପାଇଁ ବାହାର ବିଦ୍ୟୁତ ଆବଶ୍ୟକ ହୋଇଥାଏ । ଯେତେବେଳେ ବାହାର ବିଦ୍ୟୁତ ବନ୍ଦ ହୋଇଯାଏ ସେତେବେଳେ ବ୍ୟାକଅପ୍ ପାଇଁ ଡିଜେଲ୍ ଜେନେରେଟର ବ୍ୟବହାର କରାଯାଏ। ବର୍ତ୍ତମାନ ପ୍ଲାଣ୍ଟଟି କେବଳ ଜେନେରେଟର ଦ୍ବାରା ଶୀତଳୀକରଣ କରାଯାଉଛି । ରିପୋର୍ଟ ଅନୁଯାୟୀ ଯଦି ଡିଜେଲ ସରିଯାଏ ଏବଂ ନୂତନ ଯୋଗାଣ ନ ମିଳେ, ତେବେ ରିଆକ୍ଟରଗୁଡ଼ିକ ଅଧିକ ଗରମ ହୋଇପାରେ ଏବଂ ସପ୍ତାହେ ମଧ୍ୟରେ ବିପଜ୍ଜନକ ସ୍ଥିତିରେ ପହଞ୍ଚିପାରେ।

ଏବେ ପ୍ରଶ୍ନ ଆସୁଛି ବିଦ୍ୟୁତ୍ ବିଭ୍ରାଟ କାହିଁକି ହେଲା ? ମଙ୍ଗଳବାର ଦିନ ପ୍ଲାଣ୍ଟରୁ ବାହାରିଥିବା ଶେଷ ହାଇ-ଭୋଲଟେଜ୍ ଲାଇନ ରୁଷ ଦ୍ୱାରା କ୍ଷତିଗ୍ରସ୍ତ ହୋଇଥିଲା। ଆନ୍ତର୍ଜାତୀୟ ପରମାଣୁ ଶକ୍ତି ଏଜେନ୍ସି (IAEA)ର ମୁଖ୍ୟ ରାଫେଲ ଗ୍ରୋସି କହିଛନ୍ତି ଯେ ପରିସ୍ଥିତି ଅତ୍ୟନ୍ତ ଚିନ୍ତାଜନକ । ସେ ରୁଷ ରାଷ୍ଟ୍ରପତି ପୁଟିନଙ୍କୁ ମଧ୍ୟ ଭେଟିଥିଲେ । କିନ୍ତୁ ଏପର୍ଯ୍ୟନ୍ତ କୌଣସି ସଠିକ୍‌ ସମାଧାନ ମିଳିନାହିଁ । ଗ୍ରୀନପିସ୍ ଏବଂ ୟୁକ୍ରେନିଆର ଅଧିକାରୀମାନେ ଚେତାବନୀ ଦେଇଛନ୍ତି ଯେ ଏହା ପରମାଣୁ ସୁରକ୍ଷା ପାଇଁ ବିପଦ।

ୟୁକ୍ରେନିଆନ ଏବଂ ଅନ୍ତର୍ଜାତୀୟ ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ରୁଷ ଜାଣିଶୁଣି ସଙ୍କଟ ସୃଷ୍ଟି କରୁଛି । ଏହା ବିଶ୍ୱକୁ ଏବଂ ବିଶେଷକରି ୟୁକ୍ରେନକୁ ଦେଖାଇବାକୁ ଚାହୁଁଛି ଯେ ପ୍ଲାଣ୍ଟର ସୁରକ୍ଷା ଏବଂ ଏହାର ସଂଚାଳନ କେବଳ ରୁଷର ନିୟନ୍ତ୍ରଣରେ ରହିଛି ।

ଗ୍ରୀନପିସ୍ ବିଶେଷଜ୍ଞମାନେ ସାଟେଲାଇଟ୍ ଚିତ୍ର ଦେଖି ଦର୍ଶାଇଛନ୍ତି ଯେ ରୁଷ ମାରିଉପୋଲରୁ ୧୨୫ ମାଇଲ ଲମ୍ବା ବିଦ୍ୟୁତ୍ ଲାଇନ ନିର୍ମାଣ କରିଛି । ଯାହାକୁ ଏହା ପ୍ଲାଣ୍ଟ ସହିତ ସଂଯୋଗ କରିବାକୁ ଯୋଜନା କରୁଛି।

୨୦୧୧ରେ ଜାପାନର ଫୁକୁସିମା ବିପର୍ଯ୍ୟୟ ପରେ ୟୁରୋପୀୟ ନିୟାମକମାନେ ପରୀକ୍ଷା କରିଥିଲେ ଯେ ଏକ ପ୍ଲାଣ୍ଟ ବାହାର ବିଦ୍ୟୁତ ବିନା ମାତ୍ର ୭୨ ଘଣ୍ଟା ଚାଲିପାରିବ । ଆଉ ବର୍ତ୍ତମାନ ଜାପୋରିଝିଆ ପ୍ଲାଣ୍ଟ ସେହି ସୀମା ଅତିକ୍ରମ କରିସାରିଛି । ସେଥିପାଇଁ ଆଗକୁ ବିପଦ ମାଡି ଆସିପାରେ ବୋଲି ଆକଳନ କରିଛନ୍ତି ବିଶେଷଜ୍ଞ ।