ରୁଷରେ ଆଉ ଏକ ହାଇପ୍ରୋଫାଇଲ୍ ହତ୍ୟା ଉଦ୍ୟମ ! ମିଲିଟାରୀ ଜେନେରାଲଙ୍କୁ ଆଖିବୁଜା ଗୁଳିମାଡ଼

ନୂଆଦିଲ୍ଲୀ: ରୁଷର ସେନା ଅଧିକାରୀଙ୍କୁ କରାଯାଉଛି ଟାର୍ଗେଟ । ଲଗାତାର ରୁଷର ଶୀର୍ଷ ସେନା ଅଧିକାରୀଙ୍କୁ ହତ୍ୟା କରିବାକୁ ଉଦ୍ୟମ କରାଯାଉଛି। ରୁଷୀୟ ସେନାର ଆଉ ଜଣେ ଜେନେରାଲଙ୍କୁ ମସ୍କୋରେ ଗୁଳିମାଡ଼ ହୋଇଛି । ଗୁରୁତର ଅବସ୍ଥାରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । କିଏ ଓ କାହିଁକି ସେନା ଅଧିକାରୀଙ୍କୁ ଟାର୍ଗେଟ କରୁଛି, ତାକୁ ନେଇ ତଦନ୍ତ ଆରମ୍ଭ କରିଛି ମସ୍କୋ ।

ରିପୋର୍ଟ ଅନୁଯାୟୀ, ରୁଷ ରାଜଧାନୀର ଉତ୍ତର-ପଶ୍ଚିମ ଉପକଣ୍ଠରେ ଏକ ଆବାସିକ କୋଠାରେ ଆକ୍ରମଣ ପରେ ରୁଷର ସାମରିକ ଗୁପ୍ତଚର ସଂସ୍ଥା, ଜିଆରୟୁର ଉପମୁଖ୍ୟ ଭ୍ଲାଦିମିର ଆଲେକ୍ସେଭ ଗୁରୁତର ହୋଇଛନ୍ତି । ଜିଆରୟୁ ହେଉଛି ରୁଷର ସବୁଠାରୁ ବଡ଼ ବିଦେଶୀ ସାମରିକ ଗୁପ୍ତଚର ସଂସ୍ଥା ଏବଂ ଏହାର ଉପମୁଖ୍ୟଙ୍କ ଉପରେ ଆକ୍ରମଣ କରାଯାଇଛି । ତାଙ୍କ ଅବସ୍ଥା ବିଷୟରେ ସୂଚନା ଏପର୍ଯ୍ୟନ୍ତ ଉପଲବ୍ଧ ନାହିଁ।

ଫେବୃଆରୀ ୨୦୨୨ରେ ମସ୍କୋ ୟୁକ୍ରେନ ଉପରେ ଆକ୍ରମଣ କରିବା ପରଠାରୁ, ରୁଷ ସେନାର ଅନେକ ଉଚ୍ଚପଦସ୍ଥ ଅଧିକାରୀଙ୍କୁ ହତ୍ୟା କରାଯାଇଛି। କେତେକ ହତ୍ୟାକାଣ୍ଡ ପାଇଁ ୟୁକ୍ରେନ ଦାୟୀ ବୋଲି ଦାବି କରିଛି। ଆଲେକ୍ସେଭ ହେଉଛନ୍ତି ରୁଷର ଜେନେରାଲ ଷ୍ଟାଫ୍ର ପ୍ରଥମ ଉପମୁଖ୍ୟ। ପୂର୍ବରୁ, ସେ ପଦଚ୍ୟୁତ ନେତା ବଶର ଅଲ-ଆସାଦଙ୍କୁ ସମର୍ଥନ କରିବା ପାଇଁ ସିରିଆରେ ରୁଷର ହସ୍ତକ୍ଷେପ ସମୟରେ ଗୁପ୍ତଚର କାର୍ଯ୍ୟର ତଦାରଖ କରିଥିଲେ।

୨୦୨୩ ମସିହାରେ ବିଦ୍ରୋହୀ ୱାଗନର ମୁଖ୍ୟ ୟେଭଗେନି ପ୍ରିଗୋଜିନଙ୍କ ସହ ଆଲୋଚନା କରିବା ପାଇଁ କ୍ରେମଲିନ ତାଙ୍କୁ ମଧ୍ୟ ପଠାଇଥିଲା । ସେପଟେ ରୁଷର ବରିଷ୍ଠ ସାମରିକ ଅଧିକାରୀଙ୍କ ପ୍ରତି ବିପଦ ବଢ଼ୁଥିବା ବେଳେ ଏଭଳି ଘଟଣା ଘଟିଛି । ଶୀର୍ଷସ୍ତରୀୟ ସେନା ଅଧିକାରୀଙ୍କୁ ହତ୍ୟା କରିବାକୁ ଉଦ୍ୟମ କରାଯାଉଛି । ଗତ ମାସରେ, ରୁଷର ଏକ କୋର୍ଟ ୨୦୨୪ ମସିହାରେ ରୁଷର ରେଡିଓଲୋଜିକାଲ୍, ରାସାୟନିକ ଏବଂ ଜୈବିକ ପ୍ରତିରକ୍ଷା ବାହିନୀର ମୁଖ୍ୟ ଇଗୋର କିରିଲୋଭଙ୍କ ହତ୍ୟା କରିଥିବା ଜଣେ ଉଜବେକିସ୍ତାନ ନାଗରିକଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ।

କିରିଲୋଭ ମସ୍କୋର ଏକ ଆପାର୍ଟମେଣ୍ଟ ପରିସରରୁ ବାହାରକୁ ବାହାରିବା ସମୟରେ ଏକ ଜୋରଦାର ବିସ୍ଫୋରଣ ହୋଇଥିଲା । ଫଳରେ ତାଙ୍କର ମୃତ୍ୟୁ ହୋଇଥିଲା। ପରେ ଏହି ବିସ୍ଫୋରଣ କରିଥିବା ନେଇ ଦାବି କରିଥିଲା ୟୁକ୍ରେନ । ସେପଟେ ଭ୍ଲାଦିମିର ଆଲେକ୍ସେଭଙ୍କୁ ଉପରେ ହୋଇଥିବା ଆକ୍ରମଣ ସଂପର୍କରେ ୟୁକ୍ରେନ ପକ୍ଷରୁ କୌଣସି ସୂଚନା ଦିଆଯାଇ ନାହିଁ ।