ଆମେ କ୍ଷମା ମାଗିବୁନି : ଏସିଆ କପ୍ ଫାଇନାଲକୁ ନେଇ କହିଲେ ହାରିସ

ନୂଆଦିଲ୍ଲୀ, ୧୨|୧୧:ଖେଳାଳିଙ୍କ ପାଇଁ କିଛି କ୍ଷମା ମାଗିବା ଭଳି ଜିନିଷ ନଥାଏ । ବେଳେବେଳେ ଖରାପ ଦିନ ଆସେ ବୋଲି କହିଛନ୍ତି ପାକିସ୍ତାନର ଦ୍ରୁତ ବୋଲର ହାରିସ ରଉଫ୍ । ଏସିଆ କପ୍ ଫାଇନାଲରେ ଭାରତ ବିପକ୍ଷ ମୁକାବିଲାରେ ଅତି ଖରାପ ପ୍ରଦର୍ଶନ କରିବା ନେଇ ଏକ ପ୍ରଶ୍ନରେ ଏପରି କିଛି କହିଛନ୍ତି ହାରିସ ।

ମଙ୍ଗଳବାର ପାକିସ୍ତାନ ଏବଂ ଶ୍ରୀଲଙ୍କା ମଧ୍ୟରେ ଦିନିକିଆ ସିରିଜର ପ୍ରଥମ ମୁକାବିଲା ଖେଳାଯାଇଥିଲା । ଏଥିରେ ଦମଦାର ପ୍ରଦର୍ଶନ କରିଥିଲେ ହାରିସ । ୩ ଓ୍ୱିକେଟ୍ ନେଇ ପାକିସ୍ତାନ ବିଜୟରେ ପ୍ରମୁଖ ଭୁମିକା ଗ୍ରହଣ କରିଥିଲେ । ତେବେ ମ୍ୟାଚ୍ ପରେ ସାମ୍ବାଦିକ ସମ୍ମିଳନୀରେ ତାଙ୍କୁ ଭାପତ ବିପକ୍ଷ ମୁକାବିଲା ବାବଦରେ ପ୍ରଶ୍ନ କରାଯାଇଥିଲା ।

ସେ କହିଥିଲେ ଯେ, ତାଙ୍କ ପାଇଁ କ୍ଷମା ମାଗିବା ଭଳି କିଛି ନାହିଁ । ସେ ଜଣେ ମଣିଷ । ରୋବଟ୍ ନୁହେଁ । ସମସ୍ତେ ଭାବୁଛନ୍ତି ଯେ ସେ ରୋବଟ୍ ଭଳି ପ୍ରଦର୍ଶନ କରିବେ । କିନ୍ତୁ ବାସ୍ତବରେ ଏମିତି ହୁଏ ନାହିଁ । ଖେଳାଳିଙ୍କ ପାଇଁ ଭଲ ଏବଂ ଖରାପ ଦିନ ଆସିଥାଏ ।

ସୂଚନାଯୋଗ୍ୟ, ଏସିଆ କପ୍-୨୦୨୫ରେ ହାରିସ ଭାରତ ବିପକ୍ଷରେ ଶୋଚନୀୟ ପ୍ରଦର୍ଶନ କରିଥିଲେ । ଫାଇନାଲରେ ସେ ବ୍ୟୟବହୁଳ ସାବ୍ୟସ୍ତ ହୋଇଥିଲେ । ୩.୪ ଓଭର ବୋଲିଂ କରି ସେ ୫୦ ରନ୍ ବ୍ୟୟ କରିଥିଲେ । ଯାହା ଭାରତର ବିଜୟ ରାସ୍ତାକୁ ସହଜ କରିଦେଇଥିଲା ।

ହାରିବା ସତ୍ତ୍ୱେ ଭାରତୀୟ ଫ୍ୟାନଙ୍କୁ ଅପରେସନ ସିନ୍ଦୂରକୁ ନେଇ କଟାକ୍ଷ କରିଥିଲେ ହାରିସ। ହାତରେ ରାଫେଲ ବିମାନ ଖସାଇଦେଇଥିବା ଇଙ୍ଗିତ କରିଥିଲେ। ଯାହାକୁ ନେଇ ଆଇସିସି ତାଙ୍କୁ ଦୁଇଟି ମ୍ୟାଚରୁ ବାସନ୍ଦ କରିଥିଲା ।