ନୂଆଦିଲ୍ଲୀ:ମୃତ ବ୍ୟକ୍ତିଙ୍କ ଆଧାର ଆଇଡି ଡିଆକ୍ଟିଭେଟ୍ କଲେ ଭାରତ ସରକାର। ଏନେଇ ବୁଧବାର କେନ୍ଦ୍ର ସରକାର ସୂଚନା ଦେଇଛନ୍ତି।ଭାରତୀୟ ସ୍ୱତନ୍ତ୍ର ପରିଚୟ ପ୍ରାଧିକରଣ (UIDAI)ଦେଶବ୍ୟାପୀ ଚଳାଉଥିବା ଆଧାର ସ୍ୱଚ୍ଛ ଅଭିଯାନରେ ମୃତ୍ୟୁବରଣ କରିଥିବା୨କୋଟିରୁ ଅଧିକଲୋକଙ୍କର ଆଧାର ନମ୍ବରକୁ ନିଷ୍କ୍ରିୟ କରିଛି। ଆଧାର ଡାଟାବେସର ଅଖଣ୍ଡତାକୁ ସୁରକ୍ଷିତ ରଖିବା ଏବଂ ପରିଚୟ ପ୍ରମାଣପତ୍ରର ଅପବ୍ୟବହାରକୁ ରୋକିବା ପାଇଁ ଏହି ପଦକ୍ଷେପର ନିଆଯାଇଛି ବୋଲି ସରକାର ସୂଚନା ଦେଇଛନ୍ତି।

ୟୁଆଇଡିଏଆଇ ଭାରତର ରେଜିଷ୍ଟ୍ରାର ଜେନେରାଲ,ରାଜ୍ୟ ସରକାର ଏବଂ ଅନେକ କେନ୍ଦ୍ରୀୟ ମନ୍ତ୍ରଣାଳୟ ଏବଂ ବିଭାଗରୁ ପ୍ରାପ୍ତ ମୃତ୍ୟୁ ପଞ୍ଜିକରଣ ଏବଂ ଅନ୍ୟାନ୍ୟ ତଥ୍ୟ ସହିତ ଆଧାର ରେକର୍ଡଗୁଡ଼ିକୁ ମେଳ କରିବା ପରେ ଏହାକୁ ନିଷ୍କ୍ରିୟ କରିଥିଲା। ଏନେଇ ପ୍ରାଧିକରଣ କହିଛି ଯେ ଏହା ନିଷ୍କ୍ରିୟ କରିବା ପୂର୍ବରୁ ରେକର୍ଡଗୁଡ଼ିକର ବୈଧତା ଯାଞ୍ଚ କରାଯାଏ, ଏବଂ ସରକାରୀ ମୃତ୍ୟୁ-ପଞ୍ଜିକରଣ ଫିଡକୁ ନିୟମିତ ଭାବା ନେଇ ଡାଟାବେସ୍କୁ ଅପଡେଟ୍ ରଖିବା ପାଇଁ କାମ କରୁଛି।

ଏତିସହିତ ପରିବାର ସଦସ୍ୟମାନେ ଚାହିଁଲେ myAadhaar ପୋର୍ଟାଲ ବ୍ୟବହାର କରି ସମ୍ପର୍କୀୟଙ୍କ ମୃତ୍ୟୁ ରିପୋର୍ଟ କରିପାରିବେ। ମୃତ୍ୟୁ ରିପୋର୍ଟ କରିବା ପାଇଁ, ପରିବାରର ସଦସ୍ୟଙ୍କୁ ପୋର୍ଟାଲରେ ପ୍ରମାଣୀକରଣ କରିବାକୁ ପଡିବ ଏବଂ ସରକାରୀ ମୃତ୍ୟୁ ପଞ୍ଜିକରଣ ନମ୍ବର ଏବଂ ମୌଳିକ ବିବରଣୀ ସହିତ ଆଧାର ନମ୍ବର ଦାଖଲ କରିବାକୁ ପଡିବ। UIDAI ଦାଖଲ ସମୀକ୍ଷା କରେ ଏବଂ ଯାଞ୍ଚ ପରେ ନିଷ୍କ୍ରିୟ କରିବା ଦିଗରେ କାମ କରେ। ପରିଚୟ ଜାଲିଆତି ରୋକିବାରେ ସାହାଯ୍ୟ କରିବା ପାଇଁ ମୃତ୍ୟୁ ପ୍ରମାଣପତ୍ର ପାଇବା ପରେ ପୋର୍ଟାଲ ବ୍ୟବହାର କରିବାକୁ କର୍ତ୍ତୃପକ୍ଷ ପରିବାରଗୁଡ଼ିକୁ ଅନୁରୋଧ କରିଛନ୍ତି।

ତେବେ UIDAI କହିଛି ଯେ ଡିଆକ୍ଠିଭ୍ ପରେ ଏଥିରେ ସୁରକ୍ଷା ବ୍ୟବସ୍ଥା ରହିଛି। ଆଧାର ନମ୍ବରଗୁଡ଼ିକୁ ନିଷ୍କ୍ରିୟ କରିବା ପୂର୍ବରୁ କର୍ତ୍ତୃପକ୍ଷ ପ୍ରଥମେ ମୃତ୍ୟୁ ରେକର୍ଡର ବୈଧତା ଯାଞ୍ଚ କରନ୍ତି। ଯଦି ବି ଭୁଲ୍ରେ କୌଣସି ବ୍ୟକ୍ତିଙ୍କ କାର୍ଡ ନିଷ୍କ୍ରିୟ ହୋଇଯାଇଛି। ତେବେ ୟୁଜରମାନେ ଏହାକୁ ପୁନଃ ଆକ୍ଟିଭେଟ୍ କରିପାରିବେ। ତେବେ ଏଥିପାଇଁ ଆବଶ୍ୟକୀୟ ପ୍ରମାଣପତ୍ର ମଧ୍ୟ ଦେବାକୁ ପଡ଼ିବ ବୋଲି UIDAI କହିଛି।