ବଙ୍ଗୋପସାଗରରେ ସୃଷ୍ଟି ଲଘୁଚାପ ଆନ୍ଧ୍ରପ୍ରଦେଶ ମୁହାଁ, ଆସନ୍ତା ୨୬ ଓ ୨୯ ବେଳକୁ ସୃଷ୍ଟି ହୋଇପାରେ ଆଉ ଦୁଇଟି ଲଘୁଚାପ

ଭୁବନେଶ୍ବର ୨୧।୧୦: ପଛକୁ ପଛ ଆସୁଛି ତିନୋଟି ଲଘୁଚାପ । ଗୋଟିଏ ଲଘୁଚାପ ସୃଷ୍ଟି ହୋଇସାରିଥିବା ବେଳେ ଆଉ ଦୁଇଟି ନେଇ ଆକଳନ କରିଛନ୍ତି ପାଣିପାଗ ବିଜ୍ଞାନୀ ଶରତ ସାହୁ । ମଙ୍ଗଳବାର ଗୋଟିଏ ଲଘୁଚାପ ସୃଷ୍ଟି ହୋଇସାରିଛି । ଏହା ୨୨ ତାରିଖ କିମ୍ବା ୨୩ ତାରିଖ ରାତି ବେଳକୁ ତାମିଲନାଡୁ ଏବଂ ଦକ୍ଷିଣ ଆନ୍ଧ୍ରପ୍ରଦେଶ ଉପକୂଳ ଅତିକ୍ରମ କରିବ । ଏହା ପ୍ରଭାବରେ ଓଡ଼ିଶାରେ ଅଳ୍ପ ବହୁତ ବର୍ଷା ହୋଇପାରେ । ସ୍ବଳ୍ପରୁ ଓ ମଧ୍ୟମ ବର୍ଷା ହେବାର ସମ୍ଭାବନା ରହିଛି । ଆଭ୍ୟନ୍ତରୀଣ ଓଡ଼ିଶାର ଅଳ୍ପ କିଛି ସ୍ଥାନରେ ଆସନ୍ତା ୨୪ରୁ ୨୬ ମଧ୍ୟରେ ପ୍ରବଳ ବର୍ଷା ହେବାର ସମ୍ଭାବନା ରହିଛି ।

ସେହିଭଳି ଆସନ୍ତା ୨୬ କିମ୍ବା ୨୭ ତାରିଖ ବେଳକୁ ଦକ୍ଷିଣ ବଙ୍ଗୋପସାଗରରେ ଆଉ ଏକ ଲଘୁଚାପର ଆକଳନ କରିଛନ୍ତି ଶରତ ସାହୁ । ସେହିଭଳି ଆସନ୍ତା ୨୯ କିମ୍ବା ୩୦ ତାରିଖ ବେଳକୁ ତୃତୀୟ ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି । ଏହି ସିଷ୍ଟମ ସେହିଠାରେ ସୃଷ୍ଟି ହେବାକୁ ଯାଉଛି ଯେଉଁଠାରେ ୧୯୯୯ ଏବଂ ୨୦୧୩ ସିଷ୍ଟମ ସୃଷ୍ଟି ହୋଇଥିଲା । ଯଦି ଏହା ଭାରତର କୌଣସି ସ୍ଥାନରେ ହିଟ୍ କରେ ତେବେ ନଭେମ୍ବର ପ୍ରଥମ ସପ୍ତାହ ହୋଇଯିବ ।

ତେବେ ବର୍ତ୍ତମାନ ସୃଷ୍ଟି ହୋଇଥିବା ଲଘୁଚାପ ବେଶୀ ଘନୀଭୂତ ହୋଇନପାରେ । ଏପର୍ଯ୍ୟନ୍ତ ବାତ୍ୟା ନେଇ କୌଣସି ସମ୍ଭାବନା ନଥିବା ଶରତ ସାହୁ କହିଛନ୍ତି । ତଥାପି ଦକ୍ଷିଣ ଓଡ଼ିଶା ଜିଲ୍ଲା ଗୁଡ଼ିକରେ ଅଧିକ ବର୍ଷା ହେବା ନେଇ ଆକଳନ କରିଛନ୍ତି । ତେବେ ପ୍ରଥମ ଲଘୁଚାପଟିର ପ୍ରଭାବ ବେଶୀ ପଡିନପାରେ । କିନ୍ତୁ ଦ୍ବିତୀୟଟିର ପ୍ରଭାବ ବେଶୀ ରହିବ ବୋଲି ସେ ଆକଳନ କରିଛନ୍ତି । ତେବେ ଏହି ଲଘୁଚାପ ନେଇ ଭାରତୀୟ ପାଣିପାଗ ବିଭାଗ ପକ୍ଷରୁ ସ୍ପଷ୍ଟ କରାଯାଇନାହିଁ । ​​​​​​​