ଦକ୍ଷିଣ କାଶ୍ମୀରରେ ଭାରତୀୟ ସେନାର ଦୁଇ ଯବାନ ନିଖୋଜ, କମ୍ୱିଂ ଅପରେସନ ଥିଲେ ସଦସ୍ୟ

ନୂଆଦିଲ୍ଲୀ: ଦକ୍ଷିଣ କାଶ୍ମୀରରେ ସର୍ଚ୍ଚ ଅପରେସନରେ ଥିବା ଦୁଇ ଯବାନଙ୍କ ସହ ସେନାର ସମ୍ପର୍କ ବିଚ୍ଛିନ୍ନ ହୋଇଛି । ଦୁଇ ଯବାନଙ୍କୁ ଖୋଜିବା ପାଇଁ ଏକ ସର୍ଚ୍ଚ ଅପରେସନ ଆରମ୍ଭ ହୋଇଛି । ରିପୋର୍ଟ ଅନୁସାରେ ଉଭୟ ସୈନିକ ସେନାର ସ୍ୱତନ୍ତ୍ର ପାରା ୟୁନିଟର ସଦସ୍ୟ ଥିଲେ ଏବଂ ମଙ୍ଗଳବାର ରାତିରେ ଦକ୍ଷିଣ କାଶ୍ମୀରରୁ ନିଖୋଜ ହୋଇଯାଇଥିଲେ । 

ରିପୋର୍ଟ ଅନୁସାରେ, ପାରାଟ୍ରୁପରମାନେ ଅନନ୍ତନାଗ ଜିଲ୍ଲାର କୋକେରନାଗର ଗାଦୁଲ ଜଙ୍ଗଲରେ ଏକ ସର୍ଚ୍ଚ ଅଭିଯାନର ଅଂଶ ଥିଲେ । ଏହି ଅଞ୍ଚଳ ଗଭୀର ଘାଟି ଏବଂ ଏକ ଘନ ଜଙ୍ଗଲ । ସୋମବାର ସନ୍ଧ୍ୟାରେ ଏହି ଅଞ୍ଚଳରେ ପ୍ରବଳ ତୁଷାରପାତ ମଧ୍ୟ ହୋଇଥିଲା । ଗାଦୁଲ୍ ଜଙ୍ଗଲରେ ପୂର୍ବରୁ ଆତଙ୍କବାଦୀଙ୍କ ଉପସ୍ଥିତିର ରିପୋର୍ଟ ମିଳିଥିଲା । ୨୦୨୩ ମସିହାରେ, ସେନା କର୍ଣ୍ଣେଲ ମନପ୍ରୀତ ସିଂହ, ମେଜର ଆଶିଷ ଡୋନଚାକ୍ ଏବଂ ଜଣେ ଡେପୁଟି ସୁପରିଣ୍ଟେଣ୍ଡେଣ୍ଟ ଅଫ୍ ପୋଲିସ (ଡିଏସଫଇ) ହୁମାୟୁନ୍ ମୁଜାମିଲ୍ ଏହି ଜଙ୍ଗଲରେ ଏକ ଏନକାଉଣ୍ଟରରେ ନିହତ ହୋଇଥିଲେ ।

ପୋଲିସ ସୂତ୍ର ଅନୁସାରେ ଜୈଶ-ଏ-ମହମ୍ମଦ ଏବଂ ଲସ୍କର-ଏ-ତୈବା ଆତଙ୍କବାଦୀମାନେ ମଧ୍ୟ ପୂର୍ବରୁ ଏହି ଜଙ୍ଗଲରେ ନିଜର ଆଡ୍ଡା କରିଥିଲେ । ତଥାପି, ଦୁଇ ଜଣଙ୍କ ନିଖୋଜ ହେବାର ପରିସ୍ଥିତି ଏପର୍ଯ୍ୟନ୍ତ ସ୍ପଷ୍ଟ ନୁହେଁ । ସୂତ୍ର ଅନୁଯାୟୀ, ଅଞ୍ଚଳରେ ବଡ଼ ସେନା ୟୁନିଟ୍ ମୁତୟନ କରାଯାଇଛି ଏବଂ ଜଙ୍ଗଲର ପ୍ରତ୍ୟେକ ସ୍ଥାନର ସନ୍ଧାନ କରୁଛନ୍ତି ।