ନୂଆଦିଲ୍ଲୀ: ଆମେରିକା ଏବଂ ଚୀନ୍ ମଧ୍ୟରେ ଶୁଳ୍କ ଯୁଦ୍ଧ ବନ୍ଦ ହେବାର କୌଣସି ସଙ୍କେତ ଦେଖାଯାଉନାହିଁ। ୨ ଏପ୍ରିଲରେ ଯେତେବେଳେ ଆମେରିକା ରାଷ୍ଟ୍ରପତି ଟ୍ରମ୍ପ ଚୀନ୍ ଉପରେ ୩୪ ପ୍ରତିଶତ ଶୁଳ୍କ ଲାଗୁ କଲେ, ଜବାବରେ ଚୀନ୍ ମଧ୍ୟ ଆମେରିକା ଉପରେ ସମାନ ଶୁଳ୍କ ଲାଗୁ କରି ଦେଲା। ଏହାପରେ ଟ୍ରମ୍ପ ପୁଣି ଶୁଳ୍କ ବଢ଼ାଇ ୮୪ ପ୍ରତିଶତ ଏବଂ ପରେ ୧୨୫ ପ୍ରତିଶତକୁ ବୃଦ୍ଧି କରିଦେଲେ।
ପୁଣି ଆମେରିକାକୁ ଜବାବ ଦେଇ ଚୀନ ମଧ୍ୟ ଆମେରିକା ଉପରେ ସେତିକି ଶୁଳ୍କ ବଢ଼ାଇ ଦେଲା। ଆଉ ଚୀନ୍ରେ ଏଭଳି ପ୍ରତି ଜବାବରେ ଆମେରିକା ମଙ୍ଗଳବାର ବିଳମ୍ବିତ ରାତିରେ ଚୀନ ଉପରେ ଶୁଳ୍କ ବୃଦ୍ଧିକୁ ଆକାଶ ଛୁଆଁ କରିଛି। ଚୀନ ଉପରେ ୨୪୫ ପ୍ରତିଶତ ଶୁଳ୍କ ଲଗାଇଛନ୍ତି ଟ୍ରମ୍ପ ସରକାର।
ସେପଟେ ଟ୍ରମ୍ପଙ୍କ ଶୁଳ୍କକୁ ନେଇ ଚୀନ ପ୍ରତିକ୍ରିୟା ରଖିଛି। ଚୀନର ବୈଦେଶିକ ମନ୍ତ୍ରଣାଳୟର ମୁଖପାତ୍ର ଲିନ୍ ଜିଆନ୍ କହିଛନ୍ତି ଯେ ଚୀନ ବାଣିଜ୍ୟ ଯୁଦ୍ଧ ଲଢ଼ିବାକୁ ଭୟ କରେ ନାହିଁ। ଅନ୍ୟପଟେ ଶୁଳ୍କ ବୃଦ୍ଧି କରିବା ପୂର୍ବରୁ ଟ୍ରମ୍ପ କହିଥିଲେ ଆଲୋଚନା ମାଧ୍ୟମରେ ସମାଧାନ ଏବେ ଚୀନ ଉପରେ ନିର୍ଭର କରେ।
ଟ୍ରମ୍ପଙ୍କ ଏଭଳି ବୟାନକୁ ନେଇ ଚୀନ ଚୀନ୍ ବୈଦେଶିକ ମନ୍ତ୍ରଣାଳୟର ମୁଖପାତ୍ର ଲିନ୍ ଜିଆନ୍ କହିଛନ୍ତି ଯେ ଯଦି ଆମେରିକା ପ୍ରକୃତରେ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାକୁ ଚାହୁଁଛି, ତେବେ ଅତ୍ୟଧିକ ଚାପ ପ୍ରୟୋଗ କରିବା ବନ୍ଦ କରୁ। ସେ ଏହା ମଧ୍ୟ କହିଛନ୍ତି ଯେ ଟ୍ରମ୍ପଙ୍କୁ ଧମକ ଦେବା ଏବଂ ବ୍ଲାକମେଲିଂ ବନ୍ଦ କରିବା ଉଚିତ ଏବଂ ସମାନତା, ସମ୍ମାନ ଏବଂ ପାରସ୍ପରିକ ଲାଭ ଭିତ୍ତିରେ ଚୀନ୍ ସହିତ କଥାବାର୍ତ୍ତା କରିବା ଉଚିତ।
ତେବେ ଚୀନ ଉପରେ ଲଗାଯାଇଥିବା ଏହି ଶୁଳ୍କ ସମସ୍ତ ସାମଗ୍ରୀରେ ଲାଗୁ ହେବ ନାହିଁ। ପୂର୍ବରୁ ଟ୍ରମ୍ପ ସରକାର ସମସ୍ତ ପ୍ରକାର ଇଲେକ୍ଟ୍ରୋନିକ୍ସ ସାମଗ୍ରୀ ପାଇଁ ଶୁଳ୍କ ଛାଡ଼ କରିଥିଲେ। ତେଣୁ ଏହା ସେ କ୍ଷେତ୍ରରେ ଲାଗୁ ହେବ ନାହିଁ। ତେବେ ଅନ୍ୟ କିଛି ସାମଗ୍ରୀ ଉପରେ ଆମେରିକାର ଏହି ଶୁଳ୍କ ଅଲଗା ଅଲଗା ଭାବେ ଲାଗୁ ହେବ।
ଆମେରିକା ଶୁଳ୍କ ବୃଦ୍ଧି ପରେ ଚୀନ ଜବାବରେ କେବଳ ଶୁଳ୍କ ବୃଦ୍ଧି କରୁ ନାହିଁ, ତା ସହିତ ବହୁତ ବିରଳ ଓ ଖୁବ୍ ଦରକାରୀ ଧାତୁ ଓ ମ୍ୟାଗ୍ନେଟ୍ ରପ୍ତାନୀ ବନ୍ଦ କରିଦେଇଥିଲା, ଯାହା ଅଟୋ, ମହାକାଶ ଏବଂ ପ୍ରତିରକ୍ଷା ଭଳି କ୍ଷେତ୍ର ପାଇଁ ଗୁରୁତ୍ୱପୂର୍ଣ୍ଣ। କେବଳ ସେତିକି ନୁହେଁ, ଆମେରିକା ଠାରୁ, ଗୋମାଂସ, କୁକଡ଼ା ଏବଂ ପ୍ରାକୃତିକ ଗ୍ୟାସ୍ ଭଳି ସାମଗ୍ରୀ କିଣିବା ହ୍ରାସ କରିଛି।
ପଢନ୍ତୁ- ଶେୟାର ବଜାରର ହାଇ ଜମ୍ପ:ଏକା ଥରକେ ଅସୁଲ ହେଲା ସବୁ କ୍ଷତି, ମାର୍କେଟ୍ ବୃଦ୍ଧିର ୫ ବଡ଼ କାରଣ
ଚୀନ୍ ମଧ୍ୟ ଏହାର ବିମାନ କମ୍ପାନୀଗୁଡ଼ିକୁ ବୋଇଂ ଜେଟ୍ର ଆଉ କୌଣସି ବିତରଣ ନ ନେବାକୁ ନିର୍ଦ୍ଦେଶ ଦେଇଛି। ବ୍ଲୁମବର୍ଗର ଏକ ରିପୋର୍ଟ ଅନୁଯାୟୀ, ସି ଜିନପିଙ୍ଗ ପ୍ରଶାସନ ବିମାନ କମ୍ପାନୀଗୁଡ଼ିକୁ ଆମେରିକୀୟ କମ୍ପାନୀଗୁଡ଼ିକଠାରୁ ବିମାନ ସମ୍ବନ୍ଧୀୟ ଉପକରଣ କ୍ରୟ ବନ୍ଦ କରିବାକୁ ମଧ୍ୟ କହିଛି। ଏବେ ନୂଆ ଅପ୍ଡେଟ୍ ଖବର ହେଲା ଚୀନ ଆମେରିକା ବିମାନ ନିର୍ମାଣକାରୀ କମ୍ପାନୀ ବୋଇଂଠାରୁ ବିମାନ କିଣିବାକୁ ଡିଲ୍ ରଦ୍ଦ କରି ଦେଇଛି। ବୋଇଂ ଜେଟ୍ର ଆଉ କୌଣସି ଡେଲିଭରି ନ ନେବାକୁ ଚୀନ ନିଜ ବିମାନ କମ୍ପାନୀଗୁଡ଼ିକୁ ନିର୍ଦ୍ଦେଶ ଦେଇଛି। ବ୍ଲୁମବର୍ଗର ଏକ ରିପୋର୍ଟ ଅନୁଯାୟୀ, ସି ଜିନପିଙ୍ଗ ପ୍ରଶାସନ ବିମାନ କମ୍ପାନୀଗୁଡ଼ିକୁ ଆମେରିକୀୟ କମ୍ପାନୀଗୁଡ଼ିକଠାରୁ ବିମାନ-ସମ୍ବନ୍ଧୀୟ ଉପକରଣ କ୍ରୟ ବନ୍ଦ କରିବାକୁ ମଧ୍ୟ କହିଛି।
