ଲିଙ୍ଗରାଜ ମନ୍ଦିର ଇଣ୍ଟରପ୍ରିଟେସନ୍ ସେଣ୍ଟରକୁ ନେଇ ଶାସକ-ବିରୋଧୀ ଟଣାଓଟରା : ମନ୍ତ୍ରୀ କହିଲେ ନୂଆକରି ହେବ, ବିଜେଡି କହିଲା ପୂର୍ବ ସରକାରରେ ଅର୍ଥ ମଞ୍ଜୁର ହୋଇଥିଲା

ଭୁବନେଶ୍ବର ୧୫।୨: ଆର୍ଥିକ ବର୍ଷ ଶେଷ ସୁଦ୍ଧା ସରିବ ଏକାମ୍ର ହେରିଟେଜ ପ୍ରକଳ୍ପ । ନୂଆ କରି ଏକ ଇଣ୍ଟରପ୍ରିଟେସନ ସେଣ୍ଟର କରାଯିବାର ପ୍ରସ୍ତାବ ଅଛି । ଯାହା ପାର୍କିଂ ସେଣ୍ଟରର ଶେଷ ଆଡକୁ ହେବ । ସେଠାରେ ମହାପ୍ରଭୁ ଶ୍ରୀଲିଙ୍ଗରାଜଙ୍କ ଏକ ବିରାଟ ପ୍ରତିମୂର୍ତ୍ତି ନିର୍ମାଣ କରାଯିବ । ସେହିପରି ବିନ୍ଦୁ ସାଗରର ଏକ ସୁନ୍ଦର ହେରିଟେଜ ହ୍ରଦ କରାଯିବ । ଯେହେତୁ ଏହି ଦୁଇଟି ନୂଆ ପ୍ରକଳ୍ପ ମିଶିଛି, ବଜେଟ୍ ଆହୁରି ବଢିବ । ଅତିରିକ୍ତ କାମ ପାଇଁ ବଜେଟ୍ର କିଛି ଅସୁବିଧା ହେବନି । ପୁରୁଣା ଏଜେନ୍ସୀ କାମ କରିବାକୁ ଚାହୁଁନାହିଁ । ତେଣୁ ନୂଆ ଏଜେନ୍ସୀ ଏହି କାମ କରିବ ବୋଲି ଆଇନ ମନ୍ତ୍ରୀ ତଥା ପୂର୍ତ୍ତ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି ।

ଏ ଖବର ବି ପଢ଼ନ୍ତୁ:- ସୁରୁଖୁରୁରେ ଚାଲଛି ପ୍ରଭୁ ଶ୍ରୀଲିଙ୍ଗରାଜଙ୍କ ନୀତିକାନ୍ତି, ପାସ୍ ବିଭ୍ରାଟ ଆଦୌ ହୋଇନି

ସେପଟେ ପୂର୍ତ୍ତ ମନ୍ତ୍ରୀଙ୍କୁ ଟାର୍ଗେଟ୍ କରିଛନ୍ତି ବିଜେଡି ନେତା ଅଶୋକ ପଣ୍ଡା । ନଥି ପତ୍ର ଦେଖନ୍ତୁ ବୋଲି କହିଛନ୍ତି । ନବୀନ ବାବୁଙ୍କ ସରକାର ବେଳେ ଶ୍ରୀକ୍ଷେତ୍ରରେ ଓ ଲିଙ୍ଗରାଜ ମନ୍ଦିରରେ ବ୍ୟାଖ୍ୟାନ କେନ୍ଦ୍ର ପାଇଁ ଅର୍ଥ ମଞ୍ଜୁର ହୋଇଥିଲା । ଏକାମ୍ର ପ୍ରକଳ୍ପ ବେଳେ ସେହି ପ୍ରକଳ୍ପରେ ବ୍ୟାଖ୍ୟାନ କେନ୍ଦ୍ରକୁ ଯୋଡ଼ା ଯାଇଥିଲା । ଫଟୋ ଦେଖାଇ ବିନ୍ଦୁ ସାଗରର ଉନ୍ନତିକରଣକୁ ବି ପୁରୁଣା ପ୍ରକଳ୍ପ କହିଲେ ଅଶୋକ । ଆଇନ ମନ୍ତ୍ରୀଙ୍କ ବୟାନ ତଥ୍ୟ ସମ୍ବଳିତ ନୁହେଁ, ଅବାସ୍ତବ ବୋଲି ଅଶୋକ ପଣ୍ଡା କହିଛନ୍ତି ।