WW-3 ଆଶଙ୍କା କମ କଲେ ପୁଟିନ, କହିଲେ-ୟୁରୋପ ଲାଗି ନାହିଁ ତାଙ୍କର ଆକ୍ରମକ ଯୋଜନା

ମସ୍କୋ ୨୭।୧୧: ଋଷିଆ ରାଷ୍ଟ୍ରପତି ଭ୍ଲାଦିମୀର ପୁଟିନ ୟୁରୋପକୁ ଡରିବାର ଆବଶ୍ୟକତା ନାହିଁ ବୋଲି ଗୁରୁବାର କହିଛନ୍ତି। କାରଣ ୟୁରୋପ ଲାଗି ଋଷିଆର କୌଣସି ଆକ୍ରମକ ଯୋଜନା ନଥିବା ସେ କହିଛନ୍ତି। ଗଣମାଧ୍ୟମ ପ୍ରଶ୍ନର ଉତ୍ତର ଦେଇ ପୁଟିନ ୟୁରୋପ ଉପରେ ଆକ୍ରମଣ ଏପରି କୌଣସି କଥା ହାସ୍ୟସ୍ପଦ ବୋଲି କହିଛନ୍ତି। ଋଷିଆ ରାଷ୍ଟ୍ରପତି ଗୁରୁବାର କିର୍ଗିଜସ୍ତାନରେ ସୁରକ୍ଷା ସନ୍ଧି ସଙ୍ଗଠନର ସୁରକ୍ଷା ପରିଷଦକୁ ସମ୍ବୋଧିତ କରିଛନ୍ତି। ଏଥିରେ ପୁଟିନଙ୍କୁ ଆମେରିକା ଦ୍ୱାରା ପ୍ରସ୍ତାବିତ ଶାନ୍ତି ବୁଝାମଣାରେ ୟୁକ୍ରେନ ଓ ୟୁରୋପ ରାଷ୍ଟ୍ରୀୟ ସୁରକ୍ଷା ଉପରେ ଅନେକ ପ୍ରଶ୍ନ କରାଯାଇଥିଲା।

ଏଥିରେ ପୁଟିନ କହିଛନ୍ତି ଯେ ୟୁକ୍ରେନ ଯୁଦ୍ଧକୁ ନେଇ ଆଗାମୀ ସପ୍ତାହରେ ଆମେରିକୀୟ ପ୍ରତିନିଧିମଣ୍ଡଳ ମସ୍କୋ ପହଞ୍ଚିବା ପରେ ଋଷିଆ ଏ ନେଇ ଗମ୍ଭୀର ବାର୍ତ୍ତା ନିମନ୍ତେ ପ୍ରସ୍ତୁତି କରିବ। ପୁଟିନ କହିଛନ୍ତି ଯେ ଟ୍ରମ୍ପଙ୍କ ଯୋଜନାକୁ ଭବିଷ୍ୟତର ବୁଝାମଣାର ଆଧାର ରୂପେ ଉପଯୋଗ କରାଯାଇ ପାରେ। ତେବେ ଏହାର କୌଣସି ‘ଅନ୍ତିମ ସଂସ୍କରଣ’ ନଥିବା ସେ ସ୍ପଷ୍ଟ କରିଛନ୍ତି। ପୁଟିନଙ୍କୁ ୟୁକ୍ରେନ ନେତୃତ୍ୱ ସମ୍ପର୍କରେ ମଧ୍ୟ ପ୍ରଶ୍ନ କରାଯାଇଛି। ଏଥିରେ ସେ କଥିତ ଭ୍ରଷ୍ଟାଚାରର ପ୍ରସଙ୍ଗ ଉଠାଇଛନ୍ତି ଓ ସଂକେତ ଦେଇଛନ୍ତି ଯେ ବର୍ତ୍ତମାନର ପ୍ରଶାସନ ସହ କୌଣସି ପ୍ରସ୍ତାବ ଉପରେ ସ୍ୱାକ୍ଷର ବ୍ୟର୍ଥ ହେବ।

ପୁଟିନ କହିଛନ୍ତି ଭୋଲଦେମୀର ଜେଲେନସ୍କି ରଣନୀତିକ ଭୁଲ କରିଛନ୍ତି ଓ ଏହା ପରେ ସେ ନିର୍ବାଚନ ପାଇଁ ଡରୁଥିବାର ଆରୋପ ଲଗାଇଛନ୍ତି। ଋଷିଆ ଦ୍ୱାରା ଦେଶ ଉପରେ ଲାଗୁ ମାର୍ଶଲ ଲ କାରଣରୁ ୟୁକ୍ରେନ ବର୍ତ୍ତମାନ ନିର୍ବାଚନ କରିବା ପରିସ୍ଥିତିରେ ନାହିଁ, ଏ ନେଇ ଜେଲେନସ୍କି କହିଛନ୍ତି ଯେ ଯୁଦ୍ଧ ସମାପ୍ତ ପରେ ଦେଶରେ ନିର୍ବାଚନ ହୋଇପାରେ। ତେବେ ଏହା ପୂର୍ବରୁ କ୍ରେମଲିନର ଜନୈକ ବରିଷ୍ଠ ଅଧିକାରୀ ୨୬ ନଭେମ୍ବର ବୁଧବାର ପୁଷ୍ଟି କରିଛନ୍ତି ଯେ ଆମେରିକାର ବିଶେଷ ଦୂତ ଷ୍ଟିଭ ବିଟକଫ ଆଗାମୀ ସପ୍ତାହରେ ମସ୍କୋ ଗସ୍ତରେ ପହଞ୍ଚିବେ। ତେବେ ଋଷିଆ ରାଷ୍ଟ୍ରପତି ଭ୍ଲାଦିମୀର ପୁଟିନଙ୍କ ବିଦେଶ ବ୍ୟାପାର ପରାମର୍ଶଦାତା ୟୁରୀ ଉସାକୋଭ କହିଛନ୍ତି ଯେ କ୍ରେମଲିନ ଅଧିକାରୀଙ୍କୁ ଏ ପର୍ଯ୍ୟନ୍ତ ଅଧିକାରୀକ ଭାବେ ଆମେରିକା ଶାନ୍ତି ପ୍ରସ୍ତାବ ପ୍ରାପ୍ତ ହୋଇ ନାହିଁ। ତେବେ ସେମାନେ ଗୁପ୍ତ ମାଧ୍ୟମରୁ ଏହି ପ୍ରସ୍ତାବର କପି ପ୍ରାପ୍ତ ହୋଇଥିବା ସେ ସ୍ୱୀକାର କରିଛନ୍ତି।

ୟୁକ୍ରେନ ଯୁଦ୍ଧକୁ ନେଇ ଯୁକ୍ତରାଷ୍ଟ୍ର, ଋଷିଆ ଓ ୟୁକ୍ରେନୀୟ ପ୍ରତିନିଧିଙ୍କ ମଧ୍ୟରେ ଚଳିତ ସପ୍ତାହ ପ୍ରାରମ୍ଭରେ ୟୁଏଇରେ ବାର୍ତ୍ତା ହୋଇଛି। ତେବେ ଉସାକୋଭ କହିଛନ୍ତି ଯେ ସମ୍ପର୍କ ଜାରି ରହିଛି, ଯେପରିକି ଟେଲିଫୋନ ମାଧ୍ୟମରେ ମଧ୍ୟ ସମ୍ପର୍କ ହେଉଛି। ହେଲେ ଏ ପର୍ଯ୍ୟନ୍ତ ପ୍ରସଙ୍ଗକୁ ନେଇ କୌଣସି ଗୋଲଟେବୁଲ ବୈଠକରେ ସବୁ ବିନ୍ଦୁ ଉପରେ ଚର୍ଚ୍ଚା ହୋଇନାହିଁ।