ବଙ୍ଗୋପସାଗରରେ ଲଘୁଚାପ ସକ୍ରିୟ, ୧୫ ଜିଲ୍ଲାକୁ ଘଡ଼ଘଡ଼ି ସହ ବର୍ଷା ଆଲର୍ଟ

ଭୁବନେଶ୍ୱର ୨୩।୦୨ : ଦକ୍ଷିଣ-ପଶ୍ଚିମ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଏବେ ସ୍ପଷ୍ଟ ଚିହ୍ନିତ ହୋଇଛି । ଏହା ପଶ୍ଚିମ-ଉତ୍ତର ପଶ୍ଚିମ ଦିଗରେ ମୁହାଁଇପାରେ । ସୋମବାର ରାଜ୍ୟର ୧୫ ଜିଲ୍ଲାରେ ଘଡ଼ଘଡ଼ି ସହ ବର୍ଷା ହୋଇପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ମାଲକାନଗିରି, କୋରାପୁଟ, ରାୟଗଡ଼ା, ନବରଙ୍ଗପୁର, ମୟୂରଭଞ୍ଜ, ବାଲେଶ୍ୱର, ଭଦ୍ରକ, କଟକ, ଜଗତସିଂହପୁର, କେନ୍ଦ୍ରାପଡ଼ା, ଖୋର୍ଦ୍ଧା, ପୁରୀ, କେନ୍ଦୁଝର, ଯାଜପୁର ଓ କଳାହାଣ୍ଡିରେ ସୋମବାର ଘଡ଼ଘଡ଼ି ସହ ସ୍ୱଳ୍ପ ବର୍ଷା ହୋଇପାରେ । ଉତ୍ତର ଓ ଦକ୍ଷିଣ ଓଡ଼ିଶାର ବିଭିନ୍ନ ଜିଲ୍ଲାରେ ଘଡ଼ଘଡ଼ି ଓ ବର୍ଷା ସହିତ ଜୋରରେ ପବନ ବି ବହିବ । ପବନର ଝଟ୍‌କା  ଘଣ୍ଟା ପ୍ରତି ୩୦ରୁ ୪୦ କିମି ରହିପାରେ ବୋଲି ପାଣିପାଗ ବିଭାଗ ଆକଳନ କରିଛି ।

ଏ ଖବର ବି ପଢନ୍ତୁ:- ଓସିଏର ସ୍ବତନ୍ତ୍ର ସାଧାରଣ ବୈଠକରେ ଅସନ୍ତୋଷ, ୨୫ ବର୍ଷ ଧରି ଓସିଏ ପଦରେ ମନମାନୀ ଅଭିଯୋଗ

ମଙ୍ଗଳବାର (୨୪ ତାରିଖ)ରେ ମୟୂରଭଞ୍ଜ, ଯାଜପୁର ଓ କଟକରେ ଘଡ଼ଘଡ଼ି ସହ ସ୍ୱଳ୍ପ ବର୍ଷା ଆଶଙ୍କା ଅଛି । ୩୦ରୁ ୪୦ କିମି ବେଗରେ ପବନ ବି ବହିପାରେ । ସୁନ୍ଦରଗଡ଼, କେନ୍ଦୁଝର, ଭଦ୍ରକ, ଯାଜପୁର, ଢେଙ୍କାନାଳ, କଟକ, ଜଗତସିଂହପୁର, କେନ୍ଦ୍ରାପଡ଼ା, ମୟୂରଭଞ୍ଜ, ଖୋର୍ଦ୍ଧା ଓ ପୁରୀରେ ସ୍ୱଳ୍ପ ବର୍ଷା ହେବ । ରାଜ୍ୟର ବହୁ ସ୍ଥାନରେ ଏବେ ବି ମଣ୍ଡିରେ ଧାନ ପଡ଼ି ରହିଛି । ବିଭିନ୍ନ ସମସ୍ୟା କାରଣରୁ ଧାନ ଉଠିପାରୁନି ଓ ଖୋଲାରେ ପଡ଼ିଛି । ବାଲେଶ୍ୱର ଓ ଭଦ୍ରକରେ ୫୦ ହଜାରରୁ ଅଧିକ ଚାଷୀ ଏବେସୁଦ୍ଧା ମଣ୍ଡିରେ ଧାନ ଦେଇନାହାନ୍ତି । ଅନେକ ମଣ୍ଡିରେ ଧାନ ଉଠାଣ କେବେ ହେବ, ତାକୁ ଚାଷୀମାନେ ଅପେକ୍ଷା କରି ରହିଛନ୍ତି । ଏଭଳି ସ୍ଥିତିରେ ସ୍ୱଳ୍ପ ବର୍ଷା ହେଲେ ବି ଚାଷୀମାନେ ବହୁ କ୍ଷତି ସହିବେ । ଏଥିପାଇଁ ଚାଷୀକୁଳ ଆତଙ୍କିତ ହୋଇ ରହିଛନ୍ତି ।

ସେପଟେ ବିଭିନ୍ନ ସ୍ଥାନର ଦିନ ତାପମାତ୍ରା ଉପରମୁହାଁ ହେଉଛି । ଦିନରେ ପ୍ରବଳ ଖରା ଓ ତାତି ଅନୁଭୂତ ହେଉଛି । ଝାରସୁଗୁଡ଼ାରେ ଦିନ ତାପମାତ୍ରା ସର୍ବାଧିକ ୩୬.୬ ଡିଗ୍ରୀ ସେଲସିୟସ୍ ରହିଥିଲା । ପାରଳାଖେମୁଣ୍ଡିରେ ୩୬.୫, ଭୁବନେଶ୍ୱରରେ ୩୫.୭, ଟିଟିଲାଗଡ଼, ଭଦ୍ରକ, ତାଳଚେର, ବାରିପଦା ଓ ଭବାନୀପାଟଣାରେ ୩୫ ଡିଗ୍ରୀ ରେକର୍ଡ ହୋଇଥିଲା । ରାଜ୍ୟର ଅଧିକାଂଶ ସ୍ଥାନରେ ତାପମାତ୍ରା ୩୨ରୁ ୩୪ ଡିଗ୍ରୀ ପାଖାପାଖି ରହିଥିଲା ।

ଏ ଖବର ବି ପଢନ୍ତୁ:- ବେଙ୍ଗଲର ଦିଗ୍ଗଜ ନେତା ମୁକୁଲ ରାୟଙ୍କ ୭୧ ବର୍ଷରେ ନିଧନ, ଦୀର୍ଘଦିନ ଧରି ଥିଲେ ଅସୁସ୍ଥ