କଟକ: ପ୍ରଚାରରେ କମ୍ପୁଛି ଐତିହାସିକ କଟକ ସହର। କିଏ ହାତେଇବ ଏହି ଗଡ଼ ? ତାକୁ ନେଇ ବିଜେଡି, ବିଜେପି ଓ କଂଗ୍ରେସ ମଧ୍ୟରେ ଚାଲିଛି ତ୍ରିମୁଖୀ ଲଢେଇ। ଷ୍ଟାର କ୍ୟାମ୍ପେନରଙ୍କ ରାଲି ଓ ରୋଡ ସୋରେ ଉଠୁଛି ପଡ଼ୁଛି କଟକ। ବିଧାନସଭା ସିଟ୍ଠୁ ନେଇ ଲୋକସଭା ଆସନ ହାତେଇବା ପାଇଁ ତିନି ଦଳ ମଧ୍ୟରେ ଚାଲିଛି ବଳ କଷାକଷି। ଗତକାଲି କଟକ ସହରରେ ବିଜେଡି ନେତା ଭିକେ ପାଣ୍ଡିଆନ ରୋଡ୍ ସୋ କରିଥିବା ବେଳେ ପଛରେ ପଡ଼ି ନ ଥିଲେ କଂଗ୍ରେସର କଟକ ବାରବାଟୀ ବିଧାୟିକା ପ୍ରାର୍ଥୀ ସୋଫିଆ ଫିର୍ଦ୍ଦୋସ। ଆଉ ଆଜି ନିର୍ବାଚନ ତାତିକୁ ଆହୁରି ବଢାଇଥିଲା ଗୃହମନ୍ତ୍ରୀ ଅମିତ ଶାହଙ୍କ ରୋଡ୍ ଶୋ।
ନିର୍ବାଚନୀ ମୈଦାନକୁ ଖୁବ ରୋଚକ କରିଛି ନେତାଙ୍କ ରୋଡ଼ ସୋ। ଗତ ୨୪ ଘଣ୍ଟା ଭିତରେ କଟକିଆ ମାନେ ୨ ଦୁଇଟି ମେଗା ରୋଡ଼ ସୋ ଦେଖିଲେଣି। ବିଜେଡି ପାଇଁ ବିଶାଳ ରୋଡ଼ ସୋ ଜରିଆରେ କଟକି ଭୋଟର ମାନଙ୍କ ସମର୍ଥନ ଲୋଡିଛନ୍ତି ୫ ଟି ଅଧ୍ୟକ୍ଷ ଭି କେ ପାଣ୍ଡିଆନ। ତେଣେ ବାରବାଟୀ କଟକ ପାଇଁ କଂଗ୍ରେସ ପ୍ରାର୍ଥୀ ବିଶାଳ ରୋଡ଼ ସୋ ର ଆୟୋଜନ କରି ନିଜ ସାଙ୍ଗଠନିକ ଶକ୍ତିକୁ ପ୍ରଦର୍ଶିତ କରିଛନ୍ତି।
Also read: ନିର୍ବାଚନ ସମୟରେ ବିଜେପିକୁ ଝଟକା, ଦଳ ଛାଡ଼ି ବିଜେଡିରେ ମିଶିଲେ ରାଧାରାଣୀ ପଣ୍ଡା
ଏହି ବିଶାଳ ଜନସଭାରେ ସମ୍ମିଳିତ ହୋଇଥିବା ଅଗଣିତ ଲୋକଙ୍କ ପାଇଁ ଖୁବ ପ୍ରତିକ୍ଷିତ ଚେହେରା ଥିଲେ 5 ଟି ଅଧ୍ୟକ୍ଷ ଭି କେ ପାଣ୍ଡିଆନ। ମଙ୍ଗଳବାର କଟକ ପୋତାପୋଖରୀ ଜନ ସଭାକୁ ସମ୍ବୋଧିତ କଲାପରେ, ସେ ବାରବାଟୀ କଟକରେ କରିଥିଲେ ରୋଡ଼ ସୋ। ପ୍ରାୟ ୪ ଘଣ୍ଟା ଧରି ଚାଲିଥିବା ଏହି ରୋଡ଼ ସୋ ରେ ସାମିଲ ହୋଇଥିଲେ ହଜାର ହଜାର ସଂଖ୍ୟାର ସ୍ଥାନୀୟ ଲୋକ। ତେଣୁ ଏଭଳି ଏକ ଧାରଣା ସୃଷ୍ଟି ହେବା ସ୍ୱାଭାବିକ, ଯେ ବିରାଟ ସଭା ଏବଂ ବିଶାଳ ରୋଡ଼ ସୋ ଦ୍ୱାରା ଭୋଟରଙ୍କ ସମର୍ଥନ ଜୁଟାଇ ହେବ।
କିନ୍ତୁ ପଲିଟିକାଲ ରା଼ଲି କରିବାରେ କଂଗ୍ରେସ ମଧ୍ୟ ପଛରେ ପଡ଼ିନାହିଁ। କାର୍ତ୍ତିକ ପାଣ୍ଡିଆନଙ୍କ ପରି, ବାରବାଟୀ କଟକର କଂଗ୍ରେସ ପ୍ରାର୍ଥୀ ସୋଫିଆ ଫିର୍ଦୋସ ମଧ୍ୟ ମଙ୍ଗଳବାର ଅପରାହ୍ନରେ ବିଶାଳ ଶୋଭାଯାତ୍ରା ବାହାର କରିଥିଲେ। ପ୍ରାୟ ୭ କିଲୋମିଟର ରୋଡ଼ ସୋ କରି କଟକିଆଙ୍କ ସମର୍ଥନ ଲୋଡ଼ିଥିଲେ, ଆଉ ଆଜି ସକାଳୁ କଂଗ୍ରସର ସାଂସଦ ପ୍ରାର୍ଥୀ ବିଶାଳ ପଦଯାତ୍ରା ଆରମ୍ଭ କରିଛନ୍ତି। ଭୋଟରଙ୍କ ଘରେ ଘରେ ପହଞ୍ଚି କଂଗ୍ରେସର ଗ୍ୟାରେଣ୍ଟି କାର୍ଡ ବାଣ୍ଟିବା ଆରମ୍ଭ କରିଛନ୍ତି କଂଗ୍ରସ ନେତା ତଥା ସାଂସଦ ପ୍ରାର୍ଥୀ ସୁରେଶ ମହାପାତ୍ର।
ଆଜି ସ୍ଵରାଷ୍ଟ୍ର ମନ୍ତ୍ରୀ ଅମିତ ଶାହ କଟକରେ ବିଶାଳ ରୋଡ଼ ସୋ କରିଛନ୍ତି। ବୁଧବାର ବିରାଟ ରୋଡ୍ ସୋରେ ବାରବାଟୀ-କଟକ ବିଧାୟକ ପ୍ରାର୍ଥୀ ଡାକ୍ତର ପୂର୍ଣ୍ଣଚନ୍ଦ୍ର ମହାପାତ୍ର ଓ ସାଂସଦ ପ୍ରାର୍ଥୀ ଭର୍ତ୍ତୃହରି ମହତାବଙ୍କ ପାଇଁ ପ୍ରଚାର କରିଛନ୍ତି ଅମିତ ଶାହ। ଏହି ରୋଡ୍ ସୋ ସମାଜ ଅଫିସ ନିକଟ ଗୋପବନ୍ଧୁ ବାଗରୁ ଆରମ୍ଭ ହୋଇଥିଲା । ରୋଡ ସୋରେ କଟକ ଜିଲ୍ଲାର ସମସ୍ତ ବିଧାୟକ ପ୍ରାର୍ଥୀ ଓ ରାଜ୍ୟର ତୁଙ୍ଗ ନେତା ମଧ୍ୟ ସାମିଲ ହୋଇଥିଲେ। ଏହା ପରେ ଆସନ୍ତା ୨୦ ତାରିଖରେ କଟକ ଆସୁଛନ୍ତି ମୋଦୀ। କିନ୍ତୁ ବିଷୟ ହେଲା, ଏଭଳି ମେଗା ଆୟୋଜନ ଭୋଟର ମନକୁ ପ୍ରଭାବିତ କରି ପାରୁଛି, ନାଁ ନାହିଁ।
