ନୂଆଦିଲ୍ଲୀ : ଯଦି ଆପଣ ପ୍ରତିଦିନ ହାଇୱେରେ କାର ଚଳାଉଛନ୍ତି, ତ ଏହି ଖବର ଆପଣଙ୍କ ପାଇଁ ଖୁବ୍ ଗୁରୁତ୍ତ୍ୱପୂର୍ଣ୍ଣ। କାରଣ ସୁପ୍ରିମକୋର୍ଟ ନିଜର ଏକ ରାୟରେ କହିଛନ୍ତି ଯେ, ଯଦି କୌଣସି କାର ଡ୍ରାଇଭର କୌଣସି ସତର୍କତା ବିନା (ୱାର୍ଣ୍ଣିଂ)ରେ ରାଜପଥରେ ନିଜର ଗାଡ଼ିରେ ହଠାତ୍ ବ୍ରେକ୍ ଲଗାନ୍ତି ତ, ଏହାକୁ ସଡ଼କ ଦୁର୍ଘଟଣା ସ୍ଥିତିରେ ‘ ଅବହେଳାକାରୀ ‘ ( negligence) ବୋଲି ମନେ କରାଯାଇ ପାରିବ।
ସୁପ୍ରିମକୋର୍ଟ ମଙ୍ଗଳବାର ( ୨୯ ଜୁଲାଇ)ରେ କହିଥିଲେ ଯେ ,ଜାତୀୟ ରାଜପଥରେ ଗାଡ଼ି ଚାଳକ ଯଦି ରାସ୍ତା ମଝିରେ ଗାଡ଼ିକୁ ଅଟକାଇବାକୁ ଚାହାନ୍ତି ,ତ ତାଙ୍କୁ ନିଜ ପଛରୁ ଆସୁଥିବା ଗାଡ଼ି ଗୁଡ଼ିକୁ ୱାର୍ଣ୍ଣିଂ ଇଣ୍ଡିକେଟର ନିଶ୍ଚୟ ଦେବା ଉଚିତ୍। କୋର୍ଟ ଏମିତି ହିଁ ଏକ ମାମଲାରେ ରାୟ ଶୁଣାଇ ଅଭିଯୁକ୍ତ କାର ଚାଳକଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଯେଉଁଥିରେ ହାଇୱେରେ ଡ୍ରାଇଭିଂ ବେଳେ କୌଣସି ପୂର୍ବ ସଙ୍କେତ ବିନା ( ଇଣ୍ଡିକେଟର) ସେ ଗାଡ଼ି ଅଟକାଇ ଦେଇଥିଲେ। ଯେଉଁଥି ପାଇଁ ୨୦୧୭ରେ ତାମିଲନାଡୁରେ ଏକ ସଡ଼କ ଦୁର୍ଘଟଣାରେ ଜଣେ ମୋଟରସାଇକେଲ ଚାଳକଙ୍କୁ ତାଙ୍କର ବାମ ଗୋଡ଼ ହରାଇବାକୁ ପଡ଼ି ଥିଲା।
ଜଷ୍ଟିସ୍ ସୁଧାଂଶୁ ଧୂଲିଆ ଓ ଅରବିନ୍ଦ କୁମାରଙ୍କ ଖଣ୍ଡପୀଠ ମଙ୍ଗଳବାର କହିଥିଲେ, କୌଣସି ଗାଡ଼ି ଚାଳକ ଜାତୀୟ ରାଜପଥ ମଝିରେ ହଠାତ୍ ଗାଡ଼ି ଅଟକାଇବାକୁ (ତାହା ବ୍ୟକ୍ତିଗତ ଜରୁରୀ ସ୍ଥିତି ହେଉ ନା କାହିଁକି) ସଠିକ୍ କୁହାଯାଇ ପାରିବ ନାହିଁ । ବିଚାରପତି ସୁଧାଂଶୁ ଧୂଲିଆ କହି ଥିଲେ , ହାଇୱେରେ ଦ୍ରୁତ ଗତିରେ ଯାଉଥିବା ଗାଡ଼ି ଚାଳକ ଯଦି ଗାଡ଼ି ରୋକିବାକୁ ଚାହାନ୍ତି , ତ ତାଙ୍କର ଏହା ଦାୟିତ୍ୱ ଯେ ସେ ସଡ଼କରେ ପଛରୁ ଆସୁଥିବା ଅନ୍ୟ ଗାଡ଼ି ଗୁଡ଼ିକୁ ସତର୍କ ବା ସଙ୍କେତ ଦେବେ।
ଉଲ୍ଲେଖନୀୟ ଯେ, କୋର୍ଟ ଏହି ରାୟ ଇଞ୍ଜିନିୟରିଂର ଛାତ୍ର ଏସ୍ ମହମ୍ମଦ ହାକିମ୍ଙ୍କ ଆବେଦନ ଉପରେ ଦେଇଛନ୍ତି । ୭ ଜାନୁଆରୀ , ୨୦୧୭ରେ କୋଏମ୍ୱାଟୁରରେ ହକିମ ତାଙ୍କ ବନ୍ଧୁଙ୍କ ସହ ମୋଟର ସାଇକେଲ୍ରେ କୁଆଡ଼େ ଯାଉଥିଲେ। ରାସ୍ତାରେ ହଠାତ୍ ସାମ୍ନାରେ ଯାଉଥିବା କାରଟି ରହି ଯାଇଥିଲା ଏବଂ ତାଙ୍କର ବାଇକ୍ କାର୍ରେ ମାଡ଼ ହୋଇ ଡାହାଣ ପଟକୁ ଖସି ପଡ଼ିଲା। ଏହି ସଡ଼କରେ ଯାଉଥିବା ଏକ ବସ୍ ତାଙ୍କ ଗୋଡ଼ ଉପରେ ଚଢି ଗଲା । ଉକ୍ତ ମର୍ମନ୍ତୁଦ ସଡ଼କ ଦୁର୍ଘଟଣାରେ ଚିକିତ୍ସା ବେଳେ ହାକିମଙ୍କ ବାମ ଗୋଡ଼କୁ କାଟିବାକୁ ପଡ଼ିଥିଲା।
ମାମଲାର ଶୁଣାଣି ବେଳେ ଖଣ୍ଡପୀଠ କହିଥିଲେ, ଏହା ସଠିକ୍ ଯେ, ଆବେଦନକାରୀ ଆଗରେ ଯାଉଥିବା ଗାଡ଼ି ଠାରୁ ପର୍ଯ୍ୟାପ୍ତ ଦୂରତାରେ ରହିବାରେ ଅବହେଳା ପ୍ରଦର୍ଶନ କରିଛନ୍ତି ଏବଂ ବୈଧ ଲାଇସେନ୍ସ ବିନା ବାଇକ୍ ଚଲାଉ ଥିଲେ। ହେଲେ ବେଞ୍ଚ୍ ସ୍ପଷ୍ଟ କରିଥିଲେ ଯେ , ଏହି କଥାକୁ ଅଣଦେଖା କରାଯାଇ ପାରିବ ନାହିଁ ଯେ, ଦୁର୍ଘଟଣାର ମୂଳ କାରଣ କାର ଚାଳକଙ୍କ ଦ୍ୱାରା ହଠାତ୍ ବ୍ରେକ୍ ଲଗାଇବା ଥିଲା। ଖଣ୍ଡପୀଠ କହିଥିଲେ, ହାଇୱେ ମଝିରେ ହଠାତ୍ କାର ଅଟକାଇବା ପାଇଁ କାର ଡ୍ରାଇଭର ଯେଉଁ ସ୍ପଷ୍ଟୀକରଣ ଦେଇଛନ୍ତି , ତାହା କୌଣସି ଦୃଷ୍ଟିକୋଣରୁ ଯଥାର୍ଥ ନୁହେଁ।
ଏହି ମାମଲାରେ ଯେଉଁ କାର ଡ୍ରାଇଭର ହାଇୱେରେ ହଠାତ୍ ବ୍ରେକ୍ ଲଗାଇ ଥିଲେ, ସେ ଯୁକ୍ତି ଦେଇ ଥିଲେ ଯେ, ସେ ତାଙ୍କର ପତ୍ନୀଙ୍କ ସହ କାରରେ ଯାତ୍ରା କରୁଥିଲେ । କାରଣ ତାଙ୍କ ପତ୍ନୀ ସେତେବେଳେ ଗର୍ଭବତୀ ଥିଲେ ଏବଂ ତାଙ୍କୁ ବାନ୍ତି ଲାଗୁଥିଲା , ଏଥିପାଇଁ ସେ ହଠାତ୍ କାର ଅଟକାଇ ଥିଲେ । କିନ୍ତୁ କୋର୍ଟ ଏହି ଯୁକ୍ତିରେ ସହମତି ହୋଇ ନଥିଲେ ଏବଂ କାର୍ ଚାଳକ ଦୁର୍ଘଟଣା ପାଇଁ ୫୦ ପ୍ରତିଶତ ଦୋଷୀ ବୋଲି କହିଥିଲେ।
