ମୋ ଇଚ୍ଛା ମୁଁ ଯେତେ କୁକୁଡା ଖାଇବି ...ଡାକ୍ତର ବତାଇଦେଲେ ଖାଇବା ପରେ ଫେରିବାର ବାଟ ...

ନୂଆଦିଲ୍ଲୀ : ଗତ କିଛି ବର୍ଷ ହେବ, ଲୋକମାନେ ନିଜ ସ୍ୱାସ୍ଥ୍ୟ ପ୍ରତି ଅଧିକ ସଚେତନ ହୋଇଛନ୍ତି। ଫିଟ୍ ରହିବାକୁ ଡାଏଟ୍ ,ଏକ୍ସରସାଇଜ୍ ଓ ସଠିକ୍ ଲାଇଫଷ୍ଟାଇଲ୍ ଉପରେ ଗୁରୁତ୍ୱ ଦେଉଛନ୍ତି। ସବୁଠାରୁ ବଡ଼ ପରିବର୍ତ୍ତନ ମଧ୍ୟରୁ ଗୋଟିଏ ହେଉଛି ଲୋକମାନେ ସେମାନଙ୍କର ପ୍ରୋଟିନ୍ ଉପରେ ଧ୍ୟାନ ଦେବା ଆରମ୍ଭ କରିଛନ୍ତି। ଫଳସ୍ୱରୂପ, ଫିଟନେସକୁ ଫୋକସ ଦେଉଥିବା ଲୋକମାନେ ଅଧିକ ଅଣ୍ଡା ଏବଂ ଚିକେନ୍ ଖାଉଛନ୍ତି। ଯଦି ଆପଣ ଜିମ୍ ଯାଉଛନ୍ତି, ତାହେଲେ ଚିକେନ୍ ଆପଣଙ୍କ ଡାଏଟ୍ ରେ ଖୁବ୍ ଗୁରୁତ୍ୱ ବହନ କରେ। କିନ୍ତୁ ଏହି ଖବର ଆପଣଙ୍କ ପାଇଁ ଏକ ଚେତାବନୀ ହୋଇପାରେ। ସମସ୍ତେ ନିଜ ନିଜ ପ୍ରୋଟିନ୍ ଆବଶ୍ୟକତା ଅନୁସାରେ ଚିକେନ୍ ଖାଉଛନ୍ତି, ତାହା 200 ଗ୍ରାମ, 300 ଗ୍ରାମ, କିମ୍ବା 500 ଗ୍ରାମ ହୋଇପାରେ। ତଥାପି, ଗବେଷଣା ଦାବି କରୁଛି ଯେ ଅତ୍ୟଧିକ ଚିକେନ୍ ଖାଇବା ଗମ୍ଭୀର ସମସ୍ୟା ସୃଷ୍ଟି କରିପାରେ, ଏବଂ ପ୍ରୋଟିନର ଏହି ଭଲ ଉତ୍ସ ଆପଣଙ୍କୁ ଅସୁସ୍ଥ କରିପାରେ।

ଅଧ୍ୟୟନ କ’ଣ କହୁଛି?

ନ୍ୟୁଟ୍ରିଏଣ୍ଟସ୍ ପତ୍ରିକାରେ ପ୍ରକାଶିତ ଇଟାଲୀରୁ ୨୦୨୫ ମସିହାରେ ହୋଇଥିବା ଏକ ପର୍ଯ୍ୟବେକ୍ଷଣ ଅଧ୍ୟୟନ ଦାବି କରିଛି ଯେ ପ୍ରତି ସପ୍ତାହରେ ୩୦୦ ଗ୍ରାମରୁ ଅଧିକ ଧଳା ମାଂସ ଯେମିତି କି କୁକୁଡ଼ା, ଠେକୁଆ ମାଂସ ଖାଇବା ଆପଣଙ୍କ ସ୍ୱାସ୍ଥ୍ୟ ପାଇଁ ବିପଦପୂର୍ଣ୍ଣ ହୋଇପାରେ। ସାଧାରଣତଃ ଧଳା ମାଂସକୁ ଦେହ ପାଇଁ ସ୍ୱାସ୍ଥ୍ୟକର ବୋଲି ବିବେଚନା କରାଯାଏ, କିନ୍ତୁ ଏକ ଅଧ୍ୟୟନରୁ ଜଣାପଡିଛି ଯେ ଯେଉଁ ଲୋକମାନଙ୍କ ଧଳା ମାଂସ ଅଧିକ ଖାଉଥିଲେ, ସେମାନେ ପାଚନ ତନ୍ତ୍ରରେ କ୍ୟାନସର ଭଳି ସମସ୍ୟା ଭୋଗିଛନ୍ତି। ସେମାନେ ଖାଉଥିବା ଧଳା ମାଂସର ୩୩ ପ୍ରତିଶତ କୁକୁଡ଼ା ଥିଲା।

ପ୍ରକୃତରେ, ବୈଜ୍ଞାନିକମାନେ ଦେଖିବାକୁ ଚେଷ୍ଟା କରୁଥିଲେ ଯେ କୁକୁଡ଼ା, ଠେକୁଆ ଓ ବତକ ପରି ପକ୍ଷୀଙ୍କ ମାଂସ ଖାଇବା ଦ୍ୱାରା ପାଚନ ତନ୍ତ୍ରରେ କର୍କଟ ହେବା ସହ କୌଣସି ସମ୍ପର୍କ ଅଛି କି ନାହିଁ। ଏଥିପାଇଁ, ସେମାନେ ପ୍ରାୟ ୪,୮୬୯ ଇଟାଲୀୟ ବୟସ୍କଙ୍କୁ ୧୯ ବର୍ଷ ଧରି ନିରୀକ୍ଷଣ କରିଥିଲେ। ଆଉ ଜାଣିବାକୁ ପାଇଲେ ଯେ ଷ୍ଟୋମାକ କ୍ୟାନସରରେ ମୃତ୍ୟୁବରଣ କରିଥିବା ଲୋକଙ୍କ ପାଇଁ ଧଳା ମାଂସ ଖାଇବା ସବୁଠାରୁ ବିପଦ। ଗବେଷଣାରୁ ଜଣାପଡିଛି ଯେ ଯେଉଁମାନେ ପ୍ରତି ସପ୍ତାହରେ 300 ଗ୍ରାମରୁ ଅଧିକ ଧଳା ମାଂସ ଖାଉଛନ୍ତି ସେମାନଙ୍କ ମୃତ୍ୟୁର ଆଶଙ୍କା ପ୍ରତି ସପ୍ତାହରେ 100 ଗ୍ରାମରୁ କମ୍ ଚିକେନ୍ ଖାଉଥିବା ଲୋକଙ୍କ ତୁଳନାରେ 27 ପ୍ରତିଶତ ଅଧିକ ।

ପୁରୁଷମାନଙ୍କ କ୍ଷେତ୍ରରେ ଏହି ବିପଦ ଆହୁରି 61 ପ୍ରତିଶତକୁ ବୃଦ୍ଧି ପାଇଛି। ଅର୍ଥାତ୍ ଯେଉଁମାନେ 100 ଗ୍ରାମରୁ ଅଧିକ ଚିକେନ୍ ଖାଉଛନ୍ତି ସେମାନଙ୍କର ଅକାଳ ମୃତ୍ୟୁର ବିପଦ ପ୍ରାୟ ଦେଢ଼ ଗୁଣା ବୃଦ୍ଧି ପାଇଛି। ଯେଉଁମାନେ ପ୍ରତି ସପ୍ତାହରେ 100-200 ଗ୍ରାମ ଚିକେନ୍ ଖାଉଛନ୍ତି ଷ୍ଟୋମାକ୍ କର୍କଟରୁ ମୃତ୍ୟୁର ବିପଦ 65 ପ୍ରତିଶତ ଅଧିକ । ଯେତେବେଳେ କି ଯେଉଁମାନେ 300 ଗ୍ରାମରୁ ଅଧିକ କୁକୁଡ଼ା ଖାଉଛନ୍ତି ସେମାନଙ୍କ କ୍ଷେତ୍ରରେ ମୃତ୍ୟୁର ବିପଦ 127 ପ୍ରତିଶତ ଅଧିକ । ଗବେଷଣା ଟିମ୍ କହିଛନ୍ତି, ଆପଣ ଯେତେ କମ୍ କୁକୁଡ଼ା ଖାଉଛନ୍ତି, ସେତେ ଭଲ।

ବିଶେଷଜ୍ଞମାନେ କ’ଣ କୁହନ୍ତି?

ହେଲ୍ଥଲାଇନ୍ ସହିତ କଥାବାର୍ତ୍ତା କରି, ଅଙ୍କୋଲୋଜିଷ୍ଟ ଡକ୍ଟର ଆଣ୍ଟନ୍ ବିଲଚିକ୍ ଏହି ଅଧ୍ୟୟନକୁ "ଆଲାରାମିଂ" ବୋଲି କହିଛନ୍ତି । ତେଣୁ କର୍କଟରୁ ବଞ୍ଚିବାକୁ ହେଲେ ଧଳା ମାଂସର ପରିମାଣକୁ କମାଇଦେବା ଭଲ। ସେପଟେ ଦିଲ୍ଲୀର ଆପୋଲୋ ସ୍ପେକ୍ଟ୍ରା ହସ୍ପିଟାଲର ବରିଷ୍ଠ ଡାଏଟିସିଆନ୍ ଏବଂ ପୁଷ୍ଟିସାର ବିଶେଷଜ୍ଞ ଡକ୍ଟର ଦିବ୍ୟା ମଲିକ କହିଛନ୍ତି, "ଲୋକମାନେ ପ୍ରାୟତଃ ଭାବନ୍ତି ଯେ ଚିକେନ୍ ସୁସ୍ଥ , ସେଥିପାଇଁ ଏହାକୁ ଅଧିକ ଖାଇଥାନ୍ତି, ଏହା କିନ୍ତୁ ଠିକ୍ ନୁହେଁ।" ସାମ୍ପ୍ରତିକ ବୈଜ୍ଞାନିକ ଅଧ୍ୟୟନ ସ୍ପଷ୍ଟ ଭାବରେ ଦର୍ଶାଇଛି ଯେ, ଅତ୍ୟଧିକ ଚିକେନ୍ ଖାଇବାର ନକାରାତ୍ମକ ସ୍ୱାସ୍ଥ୍ୟ ପ୍ରଭାବ ପଡ଼ିପାରେ। ଚିକେନ୍ କୁ ଏକ ସନ୍ତୁଳିତ ଖାଦ୍ୟର ଏକ ଅଂଶ ଭାବରେ ବିବେଚନା କରାଯିବା ଉଚିତ, ଦୈନିକ ଖାଦ୍ୟ ସହ ସାମିଲ୍ କରିବା ଉଚିତ୍ ନୁହେଁ। "ଜଣେ ସୁସ୍ଥ ବ୍ୟକ୍ତି ପ୍ରତିଦିନ 50-60 ଗ୍ରାମରୁ ଅଧିକ ଚିକେନ୍ ଖାଇବା ଉଚିତ୍ ନୁହେଁ, ବରଂ ପ୍ରତି ସପ୍ତାହରେ 300 ଗ୍ରାମରୁ କମ୍ ଖାଇବାକୁ ଏକ ସୁରକ୍ଷିତ ସୀମା ଭାବରେ ବିବେଚନା କରାଯାଏ। ଅତ୍ୟଧିକ ଚିକେନ୍ ଖାଇବା ପ୍ରୋଟିନ୍ ଅସନ୍ତୁଳନ ସୃଷ୍ଟି କରିପାରେ ଏବଂ ଅନ୍ତନଳୀ ସମସ୍ୟା ବୃଦ୍ଧି କରିପାରେ। "