ମୁମ୍ବାଇ ୭।୩: ଚର୍ଚିତ ଭାରତୀୟ ରାଜସ୍ୱ ସେବା (ଆଇଆରଏସ୍) ଅଧିକାରୀ ସମୀର ୱାଂଖଡେ ଖୁବ୍ ଶୀଘ୍ର ମୁମ୍ବାଇକୁ ତାଙ୍କ ପୂର୍ବ ଡ୍ୟୁଟିରେ ଫେରିବେ। କେନ୍ଦ୍ରୀୟ ପ୍ରଶାସନିକ ନ୍ୟାୟାଧିକରଣ (ସିଏଟି) ସମୀର ୱାଂଖଡେଙ୍କ ଟ୍ରାନ୍ସଫର ଆଦେଶକୁ ବାତିଲ କରିଦେଇଛନ୍ତି। ୱାଂଖଡେଙ୍କୁ ମୁମ୍ବାଇରୁ ଚେନ୍ନାଇ ଟ୍ରାନ୍ସଫର କରାଯାଇଥିଲା, ଯାହାକୁ ସେ ପକ୍ଷପାତପୂର୍ଣ୍ଣ ଅଭିଯୋଗକରି ସିଏଟିରେ ଚ୍ୟାଲେଞ୍ଜ କରିଥିଲେ। ୱାଂଖଡେ ନାରକୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି)ରେ କାର୍ଯ୍ୟକରୁଥିବା ବେଳେ ଶାହରୁଖ ଖାନଙ୍କ ପୁଅଙ୍କୁ ଗିରଫ କରିଥିଲେ।
ୱାଂଖଡେ ଅକ୍ଟୋବର ୨୦୨୧ରେ ଏକ କ୍ରୁଜ ଶିପ ଉପରେ ଚଢଉ କରିବା ବେଳେ ଆର୍ୟନ ଖାନଙ୍କୁ ଗିରଫ କରିଥିଲେ। ଏହି ମାମଲା ସେତେବେଳେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଥିଲା। ମେ ୨୦୨୨ରେ ୱାଂଖଡେଙ୍କୁ ମୁମ୍ବାଇସ୍ଥିତ ଡାଇରେକ୍ଟରେଟ ଜେନେରାଲ ଅଫ ଆନାଲିଟିକାଲ ରିସ୍କ ମ୍ୟାନେଜମେଣ୍ଟ (ଡିଜିଏଆରଏମ)ରୁ ଚେନ୍ନାଇସ୍ଥିତ ଡାଇରେକ୍ଟରେଟ ଜେନେରାଲ ଅଫ ଟ୍ୟାକ୍ସ ପେୟର୍ସ ସର୍ଭିସେସ (ଡିଜିଟିଏସ)କୁ ବଦଳି କରାଯାଇଥିଲା। ଏହି ବଦଳି ନିର୍ଦ୍ଦେଶକୁ ୱାଂଖଡେ ସିଏଟିରେ ଚ୍ୟାଲେଞ୍ଜ କରିଥିଲେ।
ୱାଂଖଡେ ତାଙ୍କ ଆବେଦନରେ ଦାବି କରିଥିଲେ ଯେ ଏନସିବିରେ ତାଙ୍କ ସର୍ଭିସ କାଳରେ କେତେକ ରାଜନୈତିକ ବ୍ୟକ୍ତିତ୍ୱଙ୍କ ବିରୋଧରେ କରାଯାଇଥିବା କାର୍ଯ୍ୟାନୁଷ୍ଠାନ କାରଣରୁ ତାଙ୍କୁ ଟାର୍ଗେଟ୍ କରାଯାଇଥିଲା ଓ ତାଙ୍କର ଟ୍ରାନ୍ସଫର ଏହାର ପରିଣାମ ଥିଲା। ସେ କହିଛନ୍ତି ଯେ ଏନସିବି ଦ୍ୱାରା ଗଠିତ ବିଶେଷ ଜାଞ୍ଚ୍ ଦଳ (ଏସଆଇଟି) ତାଙ୍କୁ ତାଙ୍କ ପକ୍ଷ ରଖିବାକୁ ସୁଯୋଗ ଦେଇନଥିଲେ, ଯାହାକୁ ଉଚ୍ଚ ନ୍ୟାୟାଳୟ ମଧ୍ୟ ସ୍ୱୀକାର କରିଥିଲେ।
ତେବେ ସରକାର ତାଙ୍କ ପକ୍ଷ ରଖି ୨୦୦୮ ବ୍ୟାଚ୍ ର ଆଇଆରଏସ୍ ଅଧିକାରୀ ୱାଂଖଡେ ତାଙ୍କ ସର୍ଭିସ କାଳରେ କେବଳ ମୁମ୍ବାଇରେ ହିଁ କାମ କରିଥିବା ଓ ତାଙ୍କ ବିରୋଧରେ କିଛି ଅଭିଯୋଗ ରହିଥିବା ତର୍କ ରଖିଥିଲେ। ତେବେ ସିଏଟିଙ୍କ ପୀଠ ଏହା ଜାଣିବାକୁ ପାଇଥିଲେ ଯେ ୱାଂଖଡେଙ୍କୁ ତାଙ୍କ ସର୍ଭିସ କାଳରେ ଅନ୍ୟ ଏଜେନ୍ସୀଙ୍କୁ ମଧ୍ୟ ପଠାଯାଇଥିଲା ଓ ତାଙ୍କ ସର୍ଭିସ ରେକର୍ଡ ସ୍ୱଚ୍ଛ ରହିଛି। ଏହି ପୀଠରେ ସିଏଟି ଅଧ୍ୟକ୍ଷ ରଞ୍ଜିତ ମୋରେ ଓ ସଦସ୍ୟ ରାଜିନ୍ଦର କଶ୍ୟପ ଥିଲେ।
ପୀଠ ଟ୍ରାନ୍ସଫର ଆଦେଶକୁ ରଦ୍ଦ କରି କହିଛନ୍ତି ଯେ ଅର୍ଥମନ୍ତ୍ରାଳୟ ଓ କେନ୍ଦ୍ରୀୟ ପ୍ରତ୍ୟକ୍ଷ କର ବୋର୍ଡ (ସିବିଡିଟି) ୱାଂଖଡେଙ୍କ ବିରୋଧରେ ପୂର୍ବଗ୍ରହ ଗ୍ରସିତ ଥିଲେ। ଏହା ସହିତ ପୀଠ ଆଦେଶ ଦେଇଛନ୍ତି ଯେ ୱାଂଖଡେଙ୍କୁ ପୁଣି ମୁମ୍ବାଇସ୍ଥିତ ଡିଜିଏଆରଏମ କାର୍ଯ୍ୟାଳୟରେ ନିଯୁକ୍ତ କରାଯାଉ। ସିଏଟିଙ୍କ ଏହି ନିଷ୍ପତ୍ତି ପରେ ୱାଂଖଡେ ମୁମ୍ବାଇରେ ତାଙ୍କ ପୂର୍ବ ପଦବୀକୁ ଫେରିବେ। ସିଏଟିଙ୍କ ଏହି ରାୟକୁ ୱାଂଖଡେଙ୍କ ଲାଗି ବଡ଼ ଆଶ୍ୱସ୍ତି ମନେ କରାଯାଉଛି, ଖାସ କରି ସେତେବେଳେ ଏହି ଆଦେଶ ଆସିଛି ଯେତେବେଳେ ତାଙ୍କ ବିରୋଧରେ ସିବିଆଇ ଓ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପକ୍ଷରୁ ତାଙ୍କ ବିରୋଧରେ ଭ୍ରଷ୍ଟାଚାର ଓ ମନିଲଣ୍ଡ୍ରିଂର ମାମଲାର ଯାଞ୍ଚ ହେଉଛି।
