ନୂଆଦିଲ୍ଲୀ: ପହଲଗାମ ଆତଙ୍କୀ ହମଲାର ବଦଲା ନେଇଛି ଭାରତ । ମଙ୍ଗଳବାର ଅଧ ରାତିରେ ଭାରତୀୟ ସେନା ପାକିସ୍ତାନ ଓ ପାକିସ୍ତାନ ଅଧିକୃତ କାଶ୍ମୀର(ପିଓକେ)ରେ ୯ଟି ଆତଙ୍କୀ ଶିବିର ଉପରେ ଏୟାର ଷ୍ଟ୍ରାଇକ କରିଛନ୍ତି । ଅପରେସନ ସିନ୍ଦୂର ଆଧାରରେ ହୋଇଥିବା ଏହି ଅପରେସନରେ ଭାରତର ସବୁଠୁ ଘାତକ ଯୁଦ୍ଧ ବିମାନ ରାଫେଲକୁ ବ୍ୟବହାର କରାଯାଇଛି । ସ୍କାଲପ କ୍ରୁଜ ମିସାଇଲ ଓ ହାମର ଅସ୍ତ୍ର ଶସ୍ତ୍ରରେ ସଜ୍ଜିତ ରାଫେଲ ବିମାନ ଜରିଆରେ ଭାରତ ୯ ଆତଙ୍କୀ ଶିବିରକୁ ଧ୍ୱଂସ କରି ମାଟିରେ ମିଶାଇଛି ।
ଭାରତୀୟ ନୌସେନାର ସହାୟତାରେ ଭାରତ ଏୟାରସ୍ପେସ ଭିତରୁ ଆତଙ୍କୀ ଶିବିରକୁ ଟାର୍ଗେଟ୍ କରାଯାଇଛି । ଏହା ଏକ ସମନ୍ୱିତ ସମୁଦ୍ରୀ ଓ ଏୟାରସ୍ପେସରୁ ହମଲା ଥିଲା । ସୂତ୍ର ଅନୁଯାୟୀ, ପାକିସ୍ତାନୀ ମାଟିରେ ଆତଙ୍କୀ ଶିବିରକୁ ଟାର୍ଗେଟ୍ କରିବା ପାଇଁ ସ୍ୱତନ୍ତ୍ର ଗୋଳା ବାରୁଦର ବ୍ୟବହାର କରାଯାଇଥିଲା । ଏଥିରେ କୌଣସି ଭାରତୀୟ ବିମାନର ହାନୀ ଘଟିନାହିଁ । ଏହି ଅପରେସନରେ ସେନା, ନୌସେନା ଓ ବାୟୁସେନା ଅନେକ ଟାର୍ଗେଟକୁ ଲକ୍ଷ୍ୟଭେଦ କରିଥିଲେ ।
Also read: ଆତଙ୍କବାଦୀଙ୍କୁ ଦଣ୍ଡ ଦେଲେ ଭାରତୀୟ ସେନା, ପ୍ରତିରକ୍ଷା ମନ୍ତ୍ରୀ କହିଲେ- ଭାରତ ମାତା କି ଜୟ
ଅପରେସନ ସିନ୍ଦୂର ଆଧାରରେ ଭାରତ ବହାବଲପୁର, ମୁରିଦକେ, ଗୁଲପୁର, ଭୀମବର, ଚକ ଅମରୁ, ବାଗ, କୋଟଲି, ସିୟାଲକୋଟ ଓ ମୁଜଫରାବାଦରେ ସ୍ଥିତ ୯ଟି ଆତଙ୍କୀ ଶିବିରକୁ ଟାର୍ଗେଟ୍ କରିଛନ୍ତି । ଏହି ଅପରେସନର ମୁଖ୍ୟ ଉଦ୍ଦେଶ୍ୟ ବହାବଲପୁରରେ ଜୈଶ ଏ ମହମ୍ମଦ ଓ ମୁରିଦକେରେ ସ୍ଥିତ ଲସ୍କର ଏ ତୋଇବାର ଶୀର୍ଷ ଆତଙ୍କବାଦୀ ଲିଡରଙ୍କ ଅନ୍ତ କରିବା ଥିଲା ।
RAW ଦ୍ୱାରା ମିଳିଥିବା ଗୁଇନ୍ଦା ସୂଚନା ଆଧାରରେ ଏହି ୯ଟି ଲକ୍ଷ୍ୟକୁ ଚିହ୍ନଟ କରାଯାଇଥିଲା । ଏନଏସଏ ଅଜିତ ଡୋଭାଲ ଅପରେସନର ପ୍ରସ୍ତୁତି ପାଇଁ ସୁରକ୍ଷା ଓ ପ୍ରତିରକ୍ଷା ଏଜେନ୍ସି ସହ ୧୫ରୁ ଅଧିକ ବୈଠକ କରିଥିଲେ ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲଗାତାର ୭ ଲୋକକଲ୍ୟାଣ ମାର୍ଗ ସ୍ଥିତ ବାସଭବନରୁ ଏହି ଅପରେସନ ଉପରେ ଟିକିନିଖି ନଜର ରଖିଥିଲେ । ଏନଏସଏ ଅଜିତ ଡୋଭାଲ ପ୍ରତିଟି ଖବର ବିଷୟରେ ପ୍ରଧାନମନ୍ତ୍ରୀଙ୍କୁ ଅବଗତ କରାଉଥିଲେ । ଭାରତ ଆଜି ସକାଳ ୧୦ଟା ୩୦ରେ ସାମ୍ବାଦିକ ସମ୍ମିଳନୀ କରି ଏହାର ଆନୁଷ୍ଠାନିକ ଘୋଷଣା କରିବ ।
