ଅପରେସନ ସିନ୍ଦୂରରେ ଭୋଲାରୀ ଏୟାର ବେସ୍ କୁ ଟାର୍ଗେଟ କରିଥିଲା IAF, ଏବେବି ଭରିନି ପାକିସ୍ତାନର କ୍ଷତ

ନୂଆଦିଲ୍ଲୀ ୮।୨: ଗତ ବର୍ଷ ଭାରତୀୟ ବାୟୁସେନା (ଆଇଏଏଫ) ଅପରେସନ ସିନ୍ଦୂରରେ ପାକିସ୍ତାନର ବ୍ୟାପକ କ୍ଷୟକ୍ଷତି କରିଥିଲା। ଏହି କ୍ଷୟକ୍ଷତିକୁ ଏବେବି ଭରଣା କରିପାରିନାହିଁ ପାକିସ୍ତାନ। ନୂଆ ଉପଗ୍ରହ ଚିତ୍ରରୁ ଦେଖାଯାଇଛି ଯେ ପାକିସ୍ତାନ ଏବେ ଭୋଲାରୀ ଏୟାରବେସ୍ ରେ ହୋଇଥିବା କ୍ଷତିର ମରାମତି କରିବାକୁ ଚେଷ୍ଟା କରୁଛି। ୧୦ ମେ ୨୦୨୫ରେ ଭାରତୀୟ ବାୟୁସେନା ଭୋଲାରୀ ଏୟାରବେସ୍ ର ମୁଖ୍ୟ ହ୍ୟାଙ୍ଗରକୁ ଟାର୍ଗେଟ କରିଥିଲା।

ବାୟୁସେନା ଆକ୍ରମଣରେ ଏୟାରବେସ୍ ର ହ୍ୟାଙ୍ଗର ସମ୍ପୂର୍ଣ୍ଣ ଧ୍ୱଂସ୍ତ ହୋଇଥିଲା। ଏହି ଆକ୍ରମଣ ସେତେବେଳେ କରାଯାଇଥିଲା ଯେତେବେଳେ ଦୁଇ ଦେଶଙ୍କ ମଧ୍ୟରେ ୮୮ ଘଣ୍ଟା ପର୍ଯ୍ୟନ୍ତ ଜାରି ସୈନ୍ୟ ମୁକାବିଲା ତାର ଚରମରେ ଥିଲା। ତାଜା ଉପଗ୍ରହ ଚିତ୍ରରେ ଏହା ସ୍ପଷ୍ଟ ଦେଖାଯାଉଛି ଭୋଲାରୀ ଏୟାର ବେସ୍ ର ସେହି ହ୍ୟାଙ୍ଗରରେ ମରାମତି କାମ ଚାଲିଛି ଯାହାକୁ ଭାରତ ଟାର୍ଗେଟ୍ କରିଥିଲା। ମରାମତିରେ ହ୍ୟାଙ୍ଗର ନେଳି ରଙ୍ଗର ବଡ଼ ଛାତକୁ ଏବେ ସମ୍ପୂର୍ଣ୍ଣ ହଟାଇ ଦିଆଯାଇଛି। ଫଳରେ ମିଜାଇଲ ଆକ୍ରମଣରେ ଧ୍ୱଂସ୍ତ ହ୍ୟାଙ୍ଗର ସ୍ପଷ୍ଟ ଦେଖା ଯାଉଛି।

ଭାରତୀୟ ବାୟୁସେନା ଏକ୍ସପର୍ଟଙ୍କ ଅନୁସାରେ ବିମାନରୁ ମିଜାଇଲ ଆକ୍ରମଣ କାଳରେ ଏୟାରବେସ୍ ରେ ପାକିସ୍ତାନର ସବୁଠୁ ଗୁରୁତ୍ୱପୂର୍ଣ୍ଣ ‘ସାହେବ ୨୦୦୦ ଏରିଆଇ’ ସିଷ୍ଟମ ଥିବା ଗୁଇନ୍ଦା ବିମାନ ଥିଲା। ଏବେ ପାକିସ୍ତାନ ଧ୍ୱଂସସ୍ତୁପ ହଟାଇ ଛାତକୁ ନୂଆକରି ନିର୍ମାଣ କରୁଛି।୧୦ ମେ ୨୦୨୫ ପୂର୍ବାହ୍ନ ୧୦ଟା ୧୨ ମିନିଟ୍ ରେ ଭାରତୀୟ ବାୟୁସେନା ଭୋଲାରୀର ଏହି ଆଡ୍ଡା ଉପରେ ଭୀଷଣ ଚଢଉ କରିଥିଲା। ତେବେ ଏହି ବାୟୁସେନା ଘାଟି ଧ୍ୱଂସ୍ତ କରିବାକୁ କେଉଁ ମିଜାଇଲ ଉପଯୋଗ କରିଥିଲା ତାହା ଅଧିକାରୀ ଜଣାଇ ନାହାନ୍ତି।

ଏହି ଆକ୍ରମଣରେ ପାକିସ୍ତାନର ସାମରିକ ରାଡାର ସିଷ୍ଟମ ଓ ପର୍ଯ୍ୟବେକ୍ଷଣ ବିମାନର ବ୍ୟାପକ କ୍ଷତି ହୋଇଥିଲା। ଏବେ ପାକିସ୍ତାନ ଉଜୁଡା ଏୟାର ବେସକୁ ସଜାଡି ନିଜର ବିଫଳତା ଲୁଚେଇବାକୁ ଚେଷ୍ଟା କରୁଛି। ତେବେ ଭୋଲାରୀ ଏକମାତ୍ର ବାୟୁସେନା ଘାଟି ନୁହେଁ ଏହା ପୂର୍ବରୁ ମୁରିଦକେ ଏୟାର ବେସ୍ ର ଭଙ୍ଗା ଛାତକୁ ପାଲ ଢାଙ୍କି ଘୋଡେଇବାକୁ ଚେଷ୍ଟା କରିଥିଲା ପାକିସ୍ତାନ। ସେହିପରି ସୁକୁରରେ ପାକିସ୍ତାନର ଡ୍ରୋନ ହ୍ୟାଙ୍ଗର ମଧ୍ୟ ଧ୍ୱଂସ ସ୍ତୁପରେ ପରିଣତ ହୋଇଥିଲା। ନୂର ଖାନ ଏୟାରବେସର କଣ୍ଟ୍ରୋଲ ଆଣ୍ଡ କମାଣ୍ଡ ସିଷ୍ଟମକୁ ଧ୍ୱଂସ କରି ଭାରତୀୟ ବାୟୁସେନା ପାକିସ୍ତାନକୁ ପଙ୍ଗୁ କରିଦେଇଥିଲା।

ଏଥିରେ ଭୋଲାରୀରେ ଚାଲିଥିବା ରିଷ୍ଟୋରେସନ କାମ ଏହା ପ୍ରମାଣିତ କରୁଛି ଯେ ଭାରତୀୟ ବାୟୁସେନା ମାତ୍ର ଅଳ୍ପ କିଛି ଘଣ୍ଟାର ଯୁଦ୍ଧରେ ପାକିସ୍ତାନର ଅଣ୍ଟା ଭାଙ୍ଗି ଦେଇଛି। ଏ ଗୁଡିକର ମରାମତି ଓ ସଂରକ୍ଷଣ କରିବାକୁ ପାକିସ୍ତାନକୁ ଦୀର୍ଘ ସମୟ ଲାଗୁଛି । ଏଥି ପାଇଁ ପାକିସ୍ତାନର ବିପୁଳ ବ୍ୟୟ ହେଉଥିବା ବେଳେ ଆର୍ଥିକ ସଂକଟଗ୍ରସ୍ତ ଦେଶ ରାଜକୋଷରୁ ଏହି ବ୍ୟୟ କରୁଛି।

ଏହା ବି ପଢନ୍ତୁ:-ଭାରତ- ଆମେରିକାର ‘ସୁପର୍ ଡିଲ୍’ରେ ବାଂଲାଦେଶ ହେବ ବର୍ବାଦ୍ ! ଭାଙ୍ଗିବ ଅର୍ଥନୀତିର ମେରୁଦଣ୍ଡ