ନୂଆଦିଲ୍ଲୀ: ଭାରତ ଓ ପାକିସ୍ତାନ ମଧ୍ୟରେ ଅସ୍ତ୍ରବିରତି ହୋଇଛି । ଏହି ସୂଚନା ଦେଇ ବିଦେଶ ସଚିବ ବିକ୍ରମ ମିଶ୍ରି କହିଛନ୍ତି ଯେ ଅପରାହ୍ଣ ୩.୩୫ରେ ଦୁଇ ଦେଶର DGMO ମଧ୍ୟରେ ଆଲୋଚନା ହୋଇଥିଲା । ଶନିବାର ସଂଧ୍ୟା ୫ଟାରୁ ଆକାଶ, ଜଳ ଓ ସ୍ଥଳରେ ତତ୍କାଳ ପ୍ରଭାବରୁ ଆକ୍ରମଣ ରୋକାଯିବା ନେଇ ନିଷ୍ପତ୍ତି ନିଆଯାଇଛି । 

ବିକ୍ରମ ମିଶ୍ରି କହିଛନ୍ତି, 'ପାକିସ୍ତାନର ସୈନ୍ୟ ସଂଚାଳନ ମହାନିର୍ଦ୍ଦେଶକ (DGMO) ଆଜି ଅପରାହ୍ଣ ୩.୩୫ରେ ଭାରତର ଡିଜିଏମଓଙ୍କୁ ଫୋନ କରିଥିଲେ । ଉଭୟଙ୍କ ମଧ୍ୟରେ ସହମତି ହୋଇଛି । ଦୁଇ ପକ୍ଷ ଭାରତୀୟ ସମୟ ଅନୁସାରେ ସଂଧ୍ୟା ୫ଟାରୁ ସ୍ଥଳ, ଆକାଶ ଓ ସମୁଦ୍ରରେ ସମସ୍ତ ପ୍ରାକର ଆକ୍ରମଣ ଓ ସୈନ୍ୟ କାର୍ଯ୍ୟାନୁଷ୍ଠାନ ବନ୍ଦ କରିବେ । ଆଜି ଦୁଇ ପକ୍ଷକୁ ଏହି ସହମତି ଲାଗୁ କରିବା ପାଇଁ ନିର୍ଦ୍ଦେଶ ଦିଆଯାଇଛି । ସୈନ୍ୟ ସଂଚାଳନା ମହାନିର୍ଦ୍ଦେଶକ ମେ ୧୨ରେ ମଧ୍ୟାହ୍ମ ୧୨ଟାରେ ପୁଣି ଥରେ ଆଲୋଚନା କରିବେ ।

ଏହା ପୂର୍ବରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଥିଲେ ଯେ ଆମେରିକାର ମଧ୍ୟସ୍ଥତାରେ ଭାରତ ଓ ପାକିସ୍ତାନ ସଂଘର୍ଷ ବିରତି ଉପରେ ସହମତି ହୋଇଛନ୍ତି । ଟ୍ରୁଥ୍ ସୋସିଆଲ ପୋଷ୍ଟରେ ଘୋଷଣା କହିଥିଲେ, 'ଆମେରିକାର ମଧ୍ୟସ୍ଥତାରେ ପୂରା ରାତି ଆଲୋଚନା ପରେ, ମୁଁ ଏହା ଘୋଷଣା କରି ଖୁସି ଯେ ଭାରତ ଓ ପାକିସ୍ତାନ ପୂର୍ଣ୍ଣ ଅସ୍ତ୍ରବିରତି ଉପରେ ସହମତ ହୋଇଛନ୍ତି ।' ଆମେରିକା ବିଦେଶ ମନ୍ତ୍ରୀ ମାର୍କୋ ରୁବିୟୋ ଭାରତର ବିଦେଶ ମନ୍ତ୍ରୀ ଏସ୍.ଜୟଶଙ୍କର, ପାକିସ୍ତାନ ବିଦେଶ ମନ୍ତ୍ରୀ ଇଶାକ ଡାର ଓ ପାକିସ୍ତାନ ସେନା ମୁଖ୍ୟ ଅସୀମ ମନୀରଙ୍କ ସହ ଆଲୋଚନା ପରେ ଟ୍ରମ୍ପ ଏହି ଘୋଷଣା କରିଥିଲେ ।

ତେବେ ମେ’ ୭ ତାରିଖରେ ଭାରତୀୟ ସେନା ‘ଅପରେସନ ସିନ୍ଦୂର’ ଲଞ୍ଚ କରି ପହଲଗାମ ଆକ୍ରମଣର କାଉଣ୍ଟର ଆଟାକ୍ କରିଥିଲା । ପାକିସ୍ତାନ ଓ ପିଓକେରେ ଥିବା ଆତଙ୍କବାଦୀ ଆଡ୍ଡା ଉପରେ ଏୟାରଷ୍ଟ୍ରାଇକ୍ କରାଯାଇଥିଲା । ଏଥିରେ ଶହେରୁ ଅଧିକ ଆତଙ୍କବାଦୀ ନିପାତ ହୋଇଥିଲେ । ଏମାନଙ୍କ ମଧ୍ୟରେ ଜୈଶ-ଇ-ମହମ୍ମଦର ମୁଖ୍ୟ ମସୁଦ ଅଝହର ପରିବାରର ୧୦ଜଣ ସଦସ୍ୟ ପ୍ରାଣ ହରାଇଥିଲେ । ଭାରତର ଏହି ଆକ୍ସନରେ ବିଳିବିଳି ହୋଇଛି ପାକିସ୍ତାନ ଏବଂ ଜମ୍ମୁରୁ ଜୈସଲମେର ପର୍ଯ୍ୟନ୍ତ ସୀମାବର୍ତ୍ତୀ ସହରକୁ ଟାର୍ଗେଟ୍ କରି ୪ଶହରୁ ଅଧିକ ଡ୍ରୋନ୍ ହମଲା କରିଥିଲା । ମାତ୍ର ଭାରତ ବାୟୁ ପ୍ରତିରକ୍ଷା ପ୍ରଣାଳୀ ସେଗୁଡ଼ିକୁ ଆକାଶ ମାର୍ଗରେ ନଷ୍ଟ କରିଥିଲା । ସେହିପରି ଶୁକ୍ରବାର ରାତିରେ ପାକିସ୍ତାନ ସରକାର ପାକିସ୍ତାନ ନାଗରିକଙ୍କୁ ଢାଲ କରି ଯୁଦ୍ଧ ଘନଘୋଟା ଭିତରେ ବେସାମରିକ ବିମାନ ଚଳାଇ ଭାରତ ୩୨ଟି ସହରକୁ ଟାର୍ଗେଟ୍ କରିଥିଲା । ମାତ୍ର ଏୟାର ଡିଫେନ୍ସ ସିଷ୍ଟମ ସୁଦର୍ଶନ ଚକ୍ର ଏହାକୁ ପ୍ରତିହତ କରିବାରେ ସଫଳ ହୋଇଥିଲା । ଅନ୍ୟପଟେ ଏହାର ପାଲଟା ଆକ୍ରମଣ କରିଛି ଭାରତୀୟ ସେନା । ଶନିବାର ଭୋରୁ ପିନ୍ ପଏଣ୍ଟ ଟାର୍ଗେଟ୍ କରି ମିସାଇଲ୍ ଦ୍ବାରା ପାକିସ୍ତାନର ୫ଟି ଏୟାର ବେସ୍ ଉଡ଼ାଇ ଦେଇଥିଲା ।