ଆଠଗଡ଼ ୧୬।୦୩ : ମହାନଦୀରେ ବୁଡ଼ି ନିଖୋଜ ଯୁବକଙ୍କ ମିଳିଲା ମୃତଦେହ। ହୋଲି ଖେଳି ସାରି ମହାନଦୀରେ ଗାଧୋଇବାକୁ ଯାଇ ବୁଡି ଯାଇଥିଲେ ଯୁବକ । ମୃତଦେହକୁ ଜବତ କରି ବ୍ୟବଚ୍ଛେଦ ନିମନ୍ତେ ନିକଟସ୍ଥ ମେଡିକାଲକୁ ପଠାଇଛି ପୋଲିସ ।
ଶନିବାର ହୋଲି ଖେଳ ସାରି ୩ ଜଣ ସାଙ୍ଗ ଏକାଠି ହୋଇ ଗାଧୋଇବାକୁ ବଡମ୍ବା ଭଟ୍ଟାରିକା ପୀଠ ସ୍ଥିତ ମହାନଦୀକୁ ଯାଇଥିଲେ । ଗାଧୋଉଥିବା ବେଳେ ଏକ ଗଣ୍ଡରେ ୩ ଜଣ ଯୁବକ ବୁଡ଼ି ଯାଉଥିବା ଦେଖି ଜଣେ ସ୍ଥାନୀୟ ନାବିକ ହୁଲି ଡ଼ଙ୍ଗାରେ ସଙ୍ଗେ ସଙ୍ଗେ ଦୁଇ ଜଣଙ୍କୁ ଉଦ୍ଧାର କରିଥିଲେ । ଆଉ ଜଣଙ୍କୁ ଉଦ୍ଧାର ପାଇଁ ଗଲାବେଳକୁ ସେ ନିଖୋଜ ହୋଇଯାଇଥିଲେ। ବହୁ ସମୟ ଧରି ଖୋଜାଖୋଜି ପରେ ବି ତାଙ୍କର କୌଣସି ପତ୍ତା ମିଳିନଥିଲା । ଏପରିକି ରାତି ହୋଇଯିବାରୁ ଉଦ୍ଧାର କାର୍ଯ୍ୟ ବନ୍ଦ ହୋଇଥିଲା । ରବିବାର ଦିନ ସକାଳୁ ସକାଳୁ ପୁଣି ଥରେ ଆରମ୍ଭ ହୋଇଥିଲା ଉଦ୍ଧାର କାର୍ଯ୍ୟ । ବଡ଼ମ୍ବା ଥାନା ପଦ୍ମାବତୀ ଘାଟ ନିକଟରୁ ଯୁବକଙ୍କ ମୃତଦେହ ଉଦ୍ଧାର କରିଛି ଅଗ୍ନିଶମ ବାହିନୀ । ମୃତକ ହେଲେ ମଙ୍ଗରାଜପୁର ଗାଁର ପ୍ରମୋଦ ରାଉତ । ମୃତଦେହ ମିଳିବା ପରେ ବ୍ୟବଚ୍ଛେଦ ପାଇଁ ବଡ଼ମ୍ବା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ପଠାଇ ଅଧିକ ତଦନ୍ତ ଜାରି ରହିଛି ପୋଲିସ।
