ପଶ୍ଚିମବଙ୍ଗ: ରାଜଭବନ ଏବେ ଲୋକ ଭବନ, କ’ଣ କହିଲେ ରାଜ୍ୟପାଳ ବୋଷ ?

କୋଲକାତା: ପଶ୍ଚିମବଙ୍ଗ ରାଜ୍ୟପାଳ ଡକ୍ଟର ସି.ଭି. ଆନନ୍ଦ ବୋଷ ରାଜଧାନୀ କୋଲକାତାରେ ଥିବା ରାଜ୍ୟପାଳଙ୍କ ବାସଭବନର ନାମ ପରିବର୍ତ୍ତନ କରିବାକୁ ଘୋଷଣା କରିଛନ୍ତି। ରାଜଭବନର ନାମ ପରିବର୍ତ୍ତନ ହୋଇ ‘ଲୋକ ଭବନ’ ହୋଇଛି। ରାଜ୍ୟପାଳ ଶନିବାର ରାଜଭବନର ନାମ ପରିବର୍ତ୍ତନ କରି ‘ଲୋକ ଭବନ’ କରିବା ପାଇଁ କେନ୍ଦ୍ର ସରକାରଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରିଛନ୍ତି। ରାଜଭବନ ରାଜ୍ୟପାଳଙ୍କ ସରକାରୀ ବାସଭବନ ଏବଂ ଏଠାରେ ତାଙ୍କର କାର୍ଯ୍ୟାଳୟ ମଧ୍ୟ ରହିଛି।

ଏକ ସରକାରୀ ବିଜ୍ଞପ୍ତିରେ, ରାଜ୍ୟପାଳ ବୋଷ କହିଛନ୍ତି ଯେ, ୨୭ ମାର୍ଚ୍ଚ ୨୦୨୩ରେ ତାଙ୍କ ଅନୁରୋଧ କ୍ରମେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ରାଜଭବନର ପ୍ରତୀକାତ୍ମକ ଚାବି ହସ୍ତାନ୍ତର କରିଥିଲେ । ଏହା ଲୋକଙ୍କ ରାଜଭବନ - ଜନ ରାଜଭବନର ଏକ ନୂତନ ଯୁଗର ଆରମ୍ଭ । ବିଜ୍ଞପ୍ତିରେ କୁହାଯାଇଛି, ‘ସ୍ୱରାଷ୍ଟ୍ର ମନ୍ତ୍ରଣାଳୟ ଦ୍ୱାରା ଜାରି ୨୫.୧୧.୨୦୨୫ ତାରିଖର ଚିଠି ଅନୁଯାୟୀ, ରାଜଭବନ ଫ୍ଲାଗଷ୍ଟାଫ୍ ହାଉସ୍, କୋଲକାତା ଏବଂ 'ଦାର୍ଜିଲିଂର ରାଜଭବନ ନାମକୁ ଲୋକ ଭବନ କରାଯାଇଛି ।’

ସୋସିଆଲ ମିଡିଆରେ ଏକ ପୋଷ୍ଟ ସେୟାର କରି ରାଜ୍ୟପାଳ ଡକ୍ଟର ସି.ଭି. ଆନନ୍ଦ ବୋଷ କହିଛନ୍ତି, ‘ଲୋକଙ୍କୁ ରାଜବନର ନିକଟତର କରିବା ଲାଗି ଏହାର ନମା ପରିବର୍ତ୍ତନ ଜରୁରୀ ଥିଲା । ଲୋକଙ୍କ ଆଶା ଏବଂ ସ୍ୱପ୍ନ, ସେମାନଙ୍କ ସମସ୍ୟା ଏବଂ ସେମାନଙ୍କ ଆକାଂକ୍ଷାକୁ ପ୍ରାଥମିକତା ଦେଇ ଏହି କୋଠାକୁ ଜୀବନ୍ତ କରାଯିବାର ଥିଲା। ଏହା ଦ୍ବାରା ଐତିହାସିକ କୋଠା ସମସ୍ତଙ୍କ ପାଇଁ ଆଉ ଏକ ଭୟ ପ୍ରତୀକ ହୋଇ ରହିବ ନାହିଁ । ଏହା ସମସ୍ତଙ୍କ ପାଇଁ ଖୋଲା ରହିବ ।’

ସେ କହିଛନ୍ତି, ‘ଗତ ତିନି ବର୍ଷ ମଧ୍ୟରେ ଜନ ରାଜଭବନ ଜନସାଧାରଣଙ୍କ ପାଇଁ ଅନେକ ଗଠନମୂଳକ ଏବଂ କଲ୍ୟାଣକାରୀ କାର୍ଯ୍ୟକ୍ରମ କରିଛି। ଆବଶ୍ୟକତା ସମୟରେ ଜନସାଧାରଣଙ୍କ ସହିତ ଠିଆ ହେବା ଏହାର ମୁଖ୍ୟ ଉଦ୍ଦେଶ୍ୟ । ଯେତେବେଳେ ବି ରାଜ୍ୟର ଯେକୌଣସି କୋଣରେ ହିଂସା, ପ୍ରାକୃତିକ ବିପର୍ଯ୍ୟୟ କିମ୍ବା ଅତ୍ୟାଚାରର ଅଭିଯୋଗ ଆସିଛି, ଜନ ରାଜଭବନ ଲୋକଙ୍କ ଦ୍ୱାରରେ ପହଞ୍ଚି ସାହାଯ୍ୟର ହାତ ବଢାଇଛି।’