ନୂଆଦିଲ୍ଲୀ: ଅଲିମ୍ପିକ ଗୋଲ୍ଡ ମେଡାଲିଷ୍ଟ ଭାରତର ଷ୍ଟାର୍ ଜାଭେଲିନ୍ ଥ୍ରୋଓର ନୀରଜ ଚୋପ୍ରା ବିଶ୍ୱ ଚାମ୍ପିଅନଶିପରେ ଅତ୍ୟନ୍ତ ଖରାପ ପ୍ରଦର୍ଶନ କରିଛନ୍ତି । ଜାପାନର ରାଜଧାନୀ ଟକିଓରେ ନୀରଜ ଚୋପ୍ରାଙ୍କ ପ୍ରଦର୍ଶନ ଅତି ଖରାପ ରହିଥିଲା । ଫାଇନାଲରେ ସେ କେବଳ ୮୪.୦୩ ମିଟର ଦୂର ଯାଏଁ ଜାଭେଲିନ ଥ୍ରୋ କରିପାରିଥିଲେ । ନୀରଜ ଟପ୍ ୬କୁ ମଧ୍ୟ ପହଞ୍ଚିପାରି ନଥିଲେ । ଗତ ଥର ଚାମ୍ପିଅନ ନୀରଜ ଚୋପ୍ରା ଚଳିତ ଥର ୮ମ ସ୍ଥାନରେ ରହି ନିଜ ଯାତ୍ରା ଶେଷ କରିଥିଲେ ।

ଅନ୍ୟପଟେ ବିଶ୍ୱ ଚାମ୍ପିଅନଶିପରେ ପ୍ରଥମ ଥର ଅଂଶ ଗ୍ରହଣ କରିଥିବା ଭାରତୀୟ ଜାଭେଲିନ୍ ଥ୍ରୋଓର ସଚିନ ଯାଦବ ନିଜର ସର୍ବଶ୍ରେଷ୍ଠ ପ୍ରଦର୍ଶନ କରିଥିଲେ । ହେଲେ ମାତ୍ର ୪୦ ସେଣ୍ଟିମଟର ପାଇଁ ସେ ପଦକ ପାଇବାରୁ ବଞ୍ଚିତ ହୋଇଥିଲେ । ସଚିନ ଯାଦବ ନିଜର ପ୍ରଥମ ପ୍ରୟାସରେ ହିଁ ୮୬.୨୭ ମିଟିର ଥ୍ରୋ ଫିଙ୍ଗିଥିଲେ । ସଚିନ ଏକଦା ବ୍ରୋଞ୍ଜ ପଦକ ଜିତିବା ସ୍ଥିତିରେ ରହିଥିଲେ । କିନ୍ତୁ କେଶର୍ନ ୱାଲକଟ୍ ଚମତ୍କାର ଥ୍ରୋ ମାରି ସଚିନଙ୍କୁ ଚତୁର୍ଥ ସ୍ଥାନକୁ ପଠାଇ ଦେଇଥିଲେ । ଆମେରିକାର କର୍ଟିସ୍ ଥମ୍ପସନ୍ ବ୍ରଞ୍ଜ ପଦକ ଜିତିଛନ୍ତି । ଥମ୍ପସନ୍ ଭାରତୀୟ ଖେଳାଳି ସଚିନଙ୍କଠାରୁ କେବଳ ୪୦ ସେଣ୍ଟିମିଟର ଆଗରେ ରହିଥିଲେ ।

ସଚିନ ଯାଦବ ଶେଷ ପର୍ଯ୍ୟନ୍ତ ପଦକ ଦୌଡ଼ରେ ରହିଥିଲେ । ସଚିନ ମୋଟ ଛଅଟି ପ୍ରୟାସ କରିଥିଲେ । ତାଙ୍କର ପ୍ରଥମ ପ୍ରୟାସ ତାଙ୍କ କ୍ୟାରିୟରର ସର୍ବଶ୍ରେଷ୍ଠ ଥିଲା । ଦ୍ୱିତୀୟରେ ଫାଉଲ୍ କରିଥିଲେ । ସଚିନ ତା’ପରେ ଏକ ଚମତ୍କାର ତୃତୀୟ ଥ୍ରୋ ନେଇଥିଲେ, ଯାହା ଦ୍ୱାରା ସେ ୮୫.୭୧ ମିଟର ଦୂରତା ହାସଲ କରିଥିଲେ । 

ସଚିନ ଯାଦବଙ୍କ ଥ୍ରୋ: ୮୬.୨୭ ମିଟର (୧), ଫାଉଲ୍ (୨), ୮୫.୭୧ ମିଟର (୩), ୮୪.୯୦ ମିଟର (୪), ୮୫.୯୬ ମିଟର (୫), ୮୦.୯୫ ମିଟର (୬)

ନୀରଜ ଚୋପ୍ରାଙ୍କ ଥ୍ରୋ – ୮୩.୬୫ ମିଟର (୧), ୮୪.୦୩ ମିଟର (୨), ୮୩.୬୫ (୩), ୮୨.୮୬ (୪), ଫାଉଲ (୫)

ଉଲ୍ଲେଖଯୋଗ୍ୟ ଯେ ଗୁରୁବାର ବିଶ୍ୱ ଚାମ୍ପିଅନସିପରେ କୌଣସି ଜାଭେଲିନ୍ ଆଥଲେଟ୍ ୯୦ ମିଟର ଅତିକ୍ରମ କରି ପାରିନଥିଲେ । ଟ୍ରିନିଦାଦ ଏବଂ ଟୋବାଗୋର କେଶର୍ନ ୱାଲକଟ (୮୮.୧୬ ମିଟର) ସ୍ୱର୍ଣ୍ଣ ପଦକ ଜିତିଥିଲେ। ଗ୍ରେନାଡାର ଆଣ୍ଡରସନ୍ ପିଟର୍ସ ଦ୍ୱିତୀୟ ଏବଂ ଆମେରିକାର କର୍ଟସ୍ ଥମ୍ପସନ୍ (୮୬.୬୭ ମିଟର) ତୃତୀୟ ସ୍ଥାନ ଅଧିକାର କରିଥିଲେ ।