ମାଦୁରୋଙ୍କୁ ଘରୁ ଗିରଫ କରିଥିଲେ ଏହି ଆମେରିକୀୟ ସୈନ୍ୟ କମାଣ୍ଡର, ପ୍ରଥମ ଥର ପାଇଁ ଆସିଲେ ସାମ୍ନାକୁ

ନୂଆଦିଲ୍ଲୀ: ଭେନେଜୁଏଲାର ରାଷ୍ଟ୍ରପତି ନିକୋଲାସ ମାଦୁରୋଙ୍କୁ କାରାକାସରୁ ଗିରଫ କରି ନେଇଥିବା ଆମେରିକୀୟ ସୈନ୍ୟ କମାଣ୍ଡର ପ୍ରଥମ ଥର ପାଇଁ ସାମ୍ନାକୁ ଆସିଛନ୍ତି । କମାଣ୍ଡରଙ୍କ ନାଁ ଏରିକ୍ ସ୍ଲୋଭର। ତାଙ୍କୁ ଆମେରିକାର ସର୍ବୋଚ୍ଚ ସାମରିକ ସମ୍ମାନ ପ୍ରଦାନ କରାଯାଇଛି। ସ୍ଲୋଭର ସମଗ୍ର ଅପରେସନର ନେତୃତ୍ୱ ନେଇଥିଲେ। ଯାହାକୁ ଆମେରିକା ‘ଆବସୋଲ୍ୟୁଟ ରିଜଲ୍ଭ" (ସମ୍ପୂର୍ଣ୍ଣ ସମାଧାନ) ନାମ ଦେଇଥିଲା। ଏହି ଅପରେସନ ୨୦୨୬ ଜାନୁଆରୀ ଆରମ୍ଭରେ ଆମେରିକୀୟ ସୈନ୍ୟମାନଙ୍କ ଦ୍ୱାରା କରାଯାଇଥିଲା। ଆମେରିକାର ଯୁଦ୍ଧ ବିଭାଗ ଅନୁସାରେ, ଏରିକ ସ୍ଲୋଭରଙ୍କୁ ରାଷ୍ଟ୍ରପତି ଟ୍ରମ୍ପ ଷ୍ଟେଟ୍ ଅଫ୍ ଦି ୟୁନିୟନରେ ସମ୍ମାନିତ କରିଥିଲେ। ସ୍ଲୋଭରଙ୍କ ପତ୍ନୀ ମଧ୍ୟ ଉତ୍ସବରେ ଯୋଗ ଦେଇଥିଲେ।

କମାଣ୍ଡର ଏରିକ ସ୍ଲୋଭର କିଏ ?

ଏରିକ ସ୍ଲୋଭର ଜଣେ ଆମେରିକୀୟ ବାୟୁସେନା ପାଇଲଟ। ତାଙ୍କର ବିଶେଷତ୍ବ ଚିନୁକ୍ ହେଲିକପ୍ଟର ଉଡ଼ାଣର ରହିଛି। ମାଦୁରୋଙ୍କୁ ଧରିବା ପାଇଁ ଆମେରିକା ତାଙ୍କୁ ଚିନୁକ୍ ହେଲିକପ୍ଟରର କମାଣ୍ଡର ଦାୟିତ୍ୱ ଦେଇଥିଲା। ତାଙ୍କ ନେତୃତ୍ୱରେ ଆମେରିକୀୟ ସୈନ୍ୟମାନେ ସମଗ୍ର ଅପରେସନ କରିଥିଲେ। ଆମେରିକୀୟ ସେନାରେ, ଏରିକ ସ୍ଲୋଭର ମୁଖ୍ୟ ୱାରେଣ୍ଟ ଅଫିସର-୫ ପଦବୀରେ ଅଛନ୍ତି।

ଆଫଗାନିସ୍ତାନରେ ଆମେରିକାର ସେନାର ଅପରେସନରେ ମଧ୍ୟ ସ୍ଲୋଭର ଅଂଶଗ୍ରହଣ କରିଛନ୍ତି। ସେ ମୂଳତଃ ଉତ୍ତର କାରୋଲିନାର ବାସିନ୍ଦା। ସ୍ଲୋଭର ୨୦୦୯ ପୂର୍ବରୁ ସେନାରେ ଯୋଗ ଦେଇଥିଲେ।

ମାଦୁରୋଙ୍କୁ ଧରିବା ପାଇଁ କିପରି କରାଯାଇଥିଲା ଅପରେସନ୍ ?

ଆମେରିକା ଅନୁଯାୟୀ, ଏହି ଅପରେସନରେ ଚିନୁକ୍ ହେଲିକପ୍ଟର ବ୍ୟବହାର କରାଯାଇଥିଲା। ଚୀନ୍ ଏବଂ ରୁଷିଆନ୍ ଗୁପ୍ତଚର ଏଜେନ୍ସିଗୁଡ଼ିକ ପୂର୍ବରୁ ସେଠାରେ ସକ୍ରିୟ ଭାବରେ କାର୍ଯ୍ୟ କରୁଥିଲେ। ଟ୍ରମ୍ପଙ୍କ କହିବା ଅନୁସାରେ, ମାଦୁରୋଙ୍କୁ ଧରିବାକୁ ଉଦମ୍ୟ ବେଳେ ଏରିକଙ୍କୁ ଗୁଳିମାଡ଼ର ମଧ୍ୟ ସାମ୍ନା କରିବାକୁ ପଡ଼ିଥିଲା। ହେଲେ ସେ ଅଟକି ନଥିଲେ। ତାଙ୍କର ଏକମାତ୍ର ଲକ୍ଷ୍ୟ ଥିଲା ମାଦୁରୋଙ୍କୁ ଧରିବା। ଶେଷରେ ସେ ତାଙ୍କର ଲକ୍ଷ୍ୟ ପୂରଣ କଲେ। ଆମେ ସମସ୍ତେ ଏରିକ୍ ପାଇଁ ଗର୍ବିତ। ସେଥିପାଇଁ ତାଙ୍କୁ ସର୍ବୋଚ୍ଚ ସମ୍ମାନ ଦିଆଯାଇଛି।

ୱାଲ ଷ୍ଟ୍ରିଟ୍ ଜର୍ଣ୍ଣାଲ ଅନୁଯାୟୀ, ଆମେରିକା ଭେନେଜୁଏଲାର ରାଡାରକୁ ଧ୍ୱଂସ କରିବା ପାଇଁ ଏକ ସ୍ୱତନ୍ତ୍ର ଅସ୍ତ୍ର ବ୍ୟବହାର କରିଥିଲା। ଯାହା ଫଳରେ ଭେନେଜୁଏଲାର ସେନା, ଆମେରିକା ସେନା ବିରୁଦ୍ଧରେ ପ୍ରଭାବହୀନ ହୋଇପଡୁଥିଲା। ମାଦୁରୋଙ୍କୁ ଧରାଯିବା ପୂର୍ବରୁ, ଆମେରିକା ତାଙ୍କ ଉପରେ ୫୦ ନିୟୁତ ଡଲାର ପୁରସ୍କାର ରଖିଥିଲା।