ଆସିଲା ମେଡ୍ ଇନ ଇଣ୍ଡିଆ ଏମଆରଆଇ ସ୍କାନର, ବିଦେଶୀ ମେସିନ୍ ତୁଳନାରେ ୪୦% ଶସ୍ତା

ନୂଆଦିଲ୍ଲୀ: ଦୀର୍ଘ ୧୨ ବର୍ଷର କଠିନ ପରିଶ୍ରମ ପରେ ଭାରତ ନିଜର ପ୍ରଥମ ସ୍ୱଦେଶୀ MRI ସ୍କାନର ତିଆରି କରିବାରେ ସଫଳ ହୋଇଛି। ଡିଜିଟାଲ୍ ହେଲ୍ଥ ନ୍ୟୁଜ୍ ରିପୋର୍ଟ ଅନୁଯାୟୀ, ଏହି ମେଡ୍ ଇନ୍ ଇଣ୍ଡିଆ ଏମଆରଆଇ ମେସିନ୍ ଏକ ପ୍ରମୁଖ ସଫଳତା ଏବଂ ଚିକିତ୍ସା ପ୍ରଯୁକ୍ତିବିଦ୍ୟା କ୍ଷେତ୍ରରେ ଏକ ନୂତନ ଅଧ୍ୟାୟ ଯୋଡ଼ିଛି । ଭକ୍ସେଲଗ୍ରିଡ୍ସ ନାମକ ଏକ ଷ୍ଟାର୍ଟଅପର ପ୍ରତିଷ୍ଠାତା ଅର୍ଜୁନ ଅରୁଣାଚଳମ୍ ଏବଂ ତାଙ୍କ ଟିମ୍ ଏହି ମେସିନ ତିଆରି କରିଛନ୍ତି । ବିଶେଷ କଥା ହେଉଛି ଯେ, ତାଙ୍କ ଷ୍ଟାର୍ଟଅପକୁ ଶ୍ରୀଧର ଭେମ୍ବୁଙ୍କ କମ୍ପାନୀ ଜୋହୋ ସମର୍ଥନ କରିଥିଲା।

ଏହି ସ୍କାନର ବର୍ତ୍ତମାନ ନାଗପୁର ନିକଟ ଚନ୍ଦ୍ରପୁର କ୍ୟାନସର୍ କେୟାର ଫାଉଣ୍ଡେସନରେ ସ୍ଥାପନ କରାଯାଇଛି । ଏହା ବିଦେଶୀ କମ୍ପାନୀ ଦ୍ୱାରା ନିର୍ମିତ ଏମଆରଆଇ ସ୍କାନରର କପି ନୁହେଁ, ବରଂ ଏହା ନିଜସ୍ୱ ପ୍ରଯୁକ୍ତିବିଦ୍ୟାରେ ତିଆରି ହୋଇଛି । ଏପର୍ଯ୍ୟନ୍ତ ଭାରତରେ ବ୍ୟବହୃତ ସମସ୍ତ ଏମଆରଆଇ ମେସିନ୍ ସିମେନ୍ସ ଏବଂ GE ହେଲ୍ଥକେୟାର ଭଳି ବିଦେଶୀ କମ୍ପାନୀଗୁଡ଼ିକରୁ ଆମଦାନି କରାଯାଉଥିଲା। ଭାରତ ବର୍ତ୍ତମାନ ଚିକିତ୍ସା ପ୍ରଯୁକ୍ତିବିଦ୍ୟା କ୍ଷେତ୍ରରେ ନିଜକୁ ପ୍ରତିଷ୍ଠିତ କରିଛି। Voxelgrids 1.5 ଟେସ୍ଲା ଚୁମ୍ବକୀୟ କ୍ଷେତ୍ର ଶକ୍ତି ସହିତ ଏକ ସ୍କାନର୍ ବିକଶିତ କରିଛି । ଏହା ପାରମ୍ପରିକ ମେସିନ୍ ଠାରୁ ଭିନ୍ନ । ଏହି ମେସିନ୍ ତରଳ ହିଲିୟମ୍ ବ୍ୟବହାର କରେ ନାହିଁ । ଏହା ଦ୍ବାରା ପ୍ରାୟ ୪୦% ଉତ୍ପାଦନ ଖର୍ଚ୍ଚ ହ୍ରାସ ପାଇବ।

ଅର୍ଜୁନ ଅରୁଣାଚଳମଙ୍କ ଅନୁଯାୟୀ, ମେସିନର ଉପାଦାନଗୁଡ଼ିକୁ କମ୍ପାକ୍ଟ ଭାବରେ ପ୍ୟାକେଜିଂ କରାଯାଇଛି । ଏହା ଦ୍ୱାରା କମ୍ ବିଦ୍ୟୁତ୍ ବ୍ୟବହାର କରି ମେସିନ କାର୍ଯ୍ୟ କରିପାରିବ। ଏହା ହସ୍ପିଟାଲ ପରିଚାଳନା ଖର୍ଚ୍ଚକୁ ଯଥେଷ୍ଟ ହ୍ରାସ କରିବ। ଏହି ସ୍ୱଦେଶୀ MRI ମେସିନ୍ ନିର୍ମାତା କେବଳ ସୁଲଭ ଏମଆରଆଇ ମେସିନ୍ ବିକଶିତ କରିନାହିଁ ବରଂ ଏକ ଅନନ୍ୟ ପେ-ପର୍-ୟୁଜ୍ ମଡେଲ୍ ମଧ୍ୟ ପ୍ରଚଳନ କରିଛି। ଏହି ମଡେଲ୍ ଛୋଟ ହସ୍ପିଟାଲ୍ ପାଇଁ ଏକ ବରଦାନ। ଏହି ମଡେଲ୍ ଅନୁଯାୟୀ, ହସ୍ପିଟାଲଗୁଡ଼ିକ ଧୀରେ ଧୀରେ ସ୍ୱଦେଶୀ ଏମଆରଇ ମେସିନ୍ ପାଇଁ ଦେୟ ଦେଇପାରିବେ। ଭାରତରେ ବର୍ତ୍ତମାନ କେବଳ ୫୦୦୦ ଏମଆରଆଇ ମେସିନ୍ ଅଛି । ପ୍ରତି ୧ ମିଲିୟନ ଲୋକଙ୍କ ପାଇଁ କେବଳ ୩.୫ ମେସିନ୍। ଏହି ମଡେଲ୍ ଭାରତରେ ଏମଆରଆଇ ସ୍କାନରଗୁଡ଼ିକର ଉପଲବ୍ଧତାକୁ ଯଥେଷ୍ଟ ବୃଦ୍ଧି କରିବ । ଅଧିକ ଲୋକଙ୍କୁ ଉତ୍ତମ ରୋଗ ନିର୍ଣ୍ଣୟ ସୁବିଧା ପ୍ରଦାନ କରିବ ମେଡ୍ ଇନ୍ ଇଣ୍ଡିଆ ଏମଆରଆଇ ।