ବ୍ରସେଲସ୍ ୩୦।୮: ବେଲଜିୟମର ଏକ ଅପିଲୀୟ କୋର୍ଟ ପିଏନବି ଋଣ ଠକେଇ ମାମଲାରେ ଭାରତରୁ ଫେରାର ହୀରା ବ୍ୟବସାୟୀ ମେହୁଲ ଚୌକସୀର ଜାମିନ ନିବେଦନକୁ ପୁଣି ଥରେ ଖାରଜ କରିଦେଇଛି। ଅଧିକାରୀମାନେ ଶନିବାର ଏହି ସୂଚନା ଦେଇଛନ୍ତି। ସୂଚନା ଅନୁସାରେ ବେଲଜିୟମ କୋର୍ଟର ଏହି ନିଷ୍ପତ୍ତି ଚୌକସୀର ପ୍ରତ୍ୟାର୍ପଣ ମାମଲା ଶୁଣାଣିର ଠିକ୍ ପୂର୍ବରୁ ଆସିଛି।
ଅଧିକାରୀମାନେ କହିଛନ୍ତି ଯେ କୋର୍ଟ ସିବିଆଇ ଦ୍ୱାରା ବେଲଜିୟମ ପ୍ରସିକ୍ୟୁସନକୁ ଦିଆଯାଇଥିବା ମଜଭୁତ କାରଣ ଗୁଡିକ ଆଧାରରେ ଅପିଲ ଖାରଜ କରିଦିଆଯାଇଛି। ସିବିଆଇ କହିଛି ଯେ ଚୌକସୀ ଆଇନଗତ କାର୍ଯ୍ୟାନୁଷ୍ଠାନରୁ ବର୍ତ୍ତିବା ପାଇଁ ପୂର୍ବରୁ ମଧ୍ୟ କେତେକ ନ୍ୟାୟାଳୟଙ୍କ ନ୍ୟାୟାଧିକାର କ୍ଷେତ୍ରରୁ ପଳାୟନ କରିସାରିଛି। ଏଥିରେ ତାକୁ ଯଦି ଜାମିନ ଦିଆଯାଏ ସେ କୌଣସି ଅନ୍ୟ ଦେଶକୁ ପଳାୟନ କରିପାରେ। ଉଲ୍ଲେଖଯୋଗ୍ୟ ଯେ ସିବିଆଇ ଦ୍ୱାରା ପଠାଯାଇଥିବା ପ୍ରତ୍ୟାର୍ପଣ ଅନୁରୋଧ ଆଧାରରେ ଗତ ଏପ୍ରିଲରେ ଚୌକସୀକୁ ବେଲଜିୟମରୁ ଗିରଫ କରାଯାଇଥିଲା।
ଅଧିକାରୀମାନେ କହିଛନ୍ତି ଯେ ଏହା ପୂର୍ବରୁ ଚୌକସୀର ଅଗ୍ରୀମ ଜାମିନ ନିବେଦନକୁ ମଧ୍ୟ କୋର୍ଟ ଖାରଜ କରିଦେଇଥିଲେ। ଏହା ପରେ ଅଗଷ୍ଟ ୨୨ରେ ଚୌକସୀ ଆଉ ଏକ ଜାମିନ ନିବେଦନ କରିଥିଲା। ଏଥିରେ ତାକୁ ଘରେ ନଜରବନ୍ଦୀ କରିବାକୁ ନିବେଦନ କରିଥିଲା। ତେବେ ଅପିଲ କୋର୍ଟ ଚଳିତ ସପ୍ତାହ ଆରମ୍ଭରେ ଏହି ଆବେଦନକୁ ଖାରଜ କରିଦେଇଥିଲା। ଅଧିକାରୀମାନେ କହିଛନ୍ତି ଯେ ଗିତାଞ୍ଜଳି ସମୂହର ମାଲିକ ୬୬ ବର୍ଷ ବୟଷ୍କ ମେହୁଲ ଚୌକସୀର ପ୍ରତ୍ୟାର୍ପଣ ପାଇଁ ସେପ୍ଟେମ୍ବର ମଝି ସପ୍ତାହରେ ବେଲଜିୟମର ଏକ କୋର୍ଟରେ ହେବ।
ସିବିଆଇ ବେଲଜିୟମ ପ୍ରସିକ୍ୟୁସନକୁ ଚୌକସୀକୁ ପ୍ରତ୍ୟାର୍ପିତ କରିବା ପାଇଁ ମାମଲା ମଜଭୁତ କରିବାରେ ସହଯୋଗ କରିବ। ଅଧିକାରୀ କହିଛନ୍ତି ଯେ ଚୌକସୀ ଓ ତା ଭଣଜା ନିରବ ମୋଦି ପଞ୍ଜାବ ନ୍ୟାସନାଲ ବ୍ୟାଙ୍କର ୧୩,୦୦୦ କୋଟି ଟଙ୍କା ଠକେଇ ମାମଲାରେ ୱାଣ୍ଟେଡ ଅଛନ୍ତି। ଏହି ଠକେଇ ସେମାନେ ମୁମ୍ବାଇର ବ୍ରାଡି ହାଉସ୍ ଶାଖାର କିଛି ବ୍ୟାଙ୍କ ଅଧିକାରୀଙ୍କ ସହ ମିଶି କଥିତ ରୂପେ ନକଲୀ ଆଫିଡେଭିଟରେ କରିଥିଲେ।
