ନୋବେଲ ଶାନ୍ତି ପୁରସ୍କାର ଘୋଷଣା, ଆମେରିକା ରାଷ୍ଟ୍ରପତି ନୁହେଁ ଏହି ମହିଳାଙ୍କୁ ସମ୍ମାନ

ନୂଆଦିଲ୍ଲୀ ୧୦/୧୦: ଘୋଷଣା ହୋଇଛି ନୋବେଲ ଶାନ୍ତି ପୁରସ୍କାର । ୨୦୨୫ ନୋବେଲ ପୁରସ୍କାରରେ ସମ୍ମାନୀତ ହୋଇଛନ୍ତି ଭେନେଜୁଏଲାରେ ମାରିଆ କୋରିନା ମାଚାଡୋ । ମାରିଆ କୋରିନା ମାଚାଡୋ, ଯାହାଙ୍କୁ ଶାନ୍ତି ପ୍ରତିଷ୍ଠା ଓ ବିଶ୍ୱ ଦ୍ୱନ୍ଦ୍ୱ ହ୍ରାସ କରିବାରେ ତାଙ୍କର ଅବଦାନ ପାଇଁ ସମ୍ମାନିତ କରାଯାଇଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ବର୍ଷର ନୋବେଲ ଶାନ୍ତି ପୁରସ୍କାର ବିଜେତା ନୁହଁନ୍ତି। ଏହି ପୁରସ୍କାର ପ୍ରତିବର୍ଷ ବିଶ୍ୱ ଶାନ୍ତି, ମାନବାଧିକାର ଏବଂ ସଂଘର୍ଷ ସମାଧାନରେ ଗୁରୁତ୍ୱପୂର୍ଣ୍ଣ ଅବଦାନ ଦେଇଥିବା ବ୍ୟକ୍ତି କିମ୍ବା ସଂଗଠନକୁ ପ୍ରଦାନ କରାଯାଏ।​​​​​​​

ନରୱେଜିଆନ୍ ନୋବେଲ୍ କମିଟି ମାରିଆଙ୍କୁ ନୋବେଲ୍ ଶାନ୍ତି ପୁରସ୍କାର ପ୍ରଦାନ କରିବାକୁ ନିଷ୍ପତ୍ତି ନେଇଛି । ଭେନେଜୁଏଲା ଲୋକଙ୍କ ପାଇଁ ଗଣତାନ୍ତ୍ରିକ ଅଧିକାରକୁ ପ୍ରୋତ୍ସାହିତ କରିବା ଓ ଦେଶରେ ଏକଛତ୍ରବାଦୀରୁ ଗଣତନ୍ତ୍ରକୁ ନ୍ୟାୟପୂର୍ଣ୍ଣ ଏବଂ ଶାନ୍ତିପୂର୍ଣ୍ଣ ପରିବର୍ତ୍ତନ ହାସଲ କରିବାକୁ ତାଙ୍କର ସଂଘର୍ଷ ପାଇଁ ତାଙ୍କୁ ଏହି ପୁରସ୍କାର ଦିଆଯାଇଛି।

ସେପଟେ ଏହି ଘୋଷଣା ଡୋନାଲ୍ଡ ଟ୍ରମ୍ପଙ୍କ ନୋବେଲ୍ ପୁରସ୍କାର ଆଶାକୁ ମାଟିରେ ମିଶାଇଛି। ଯିଏ ଗତ କିଛି ଦିନ ଧରି ଏହି ଦୌଡ଼ ପାଇଁ ନିଜର ପକ୍ଷ ରଖିଥିଲେ। ନୋବେଲ୍ ଶାନ୍ତି ପୁରସ୍କାର ବିଜେତା ମାରିଆ କୋରିନା ମାଚାଡୋ ଗତ ବର୍ଷ ଧରି ଲୁଚି ରହିବାକୁ ବାଧ୍ୟ ହୋଇଥିଲେ ମଧ୍ୟ ତାଙ୍କ ସଂଘର୍ଷ ଜାରି ରଖିଥିଲେ। "ତାଙ୍କ ଜୀବନ ପ୍ରତି ଗମ୍ଭୀର ବିପଦ ସତ୍ତ୍ୱେ, ସେ ଦେଶରେ ରହିଥିଲେ। ତାଙ୍କ ନିର୍ବାଚନ ଲକ୍ଷ ଲକ୍ଷ ଲୋକଙ୍କୁ ପ୍ରେରଣା ଦେବ," ନୋବେଲ୍ କମିଟି କହିଛି।