ବିଦେଶରେ ଗଜରା ଲଗାଇବା ଅଭିନେତ୍ରୀଙ୍କୁ ପଡିଲା ମହଙ୍ଗା, ଭରିଲେ ୧ ଲକ୍ଷ ଟଙ୍କାର ଜରିମାନା

ନୂଆଦିଲ୍ଲୀ ୦୮।୦୯; ଭାରତୀୟ ମହିଳାମାନେ ଗଜରାକୁ ଅଳଙ୍କାର ଭାବରେ ପିନ୍ଧନ୍ତି।  କିନ୍ତୁ ଆପଣ କେବେ ଭାବିଛନ୍ତି କି ଏହାକୁ ପିନ୍ଧିଲେ ୧ ଲକ୍ଷ ଟଙ୍କା ପର୍ଯ୍ୟନ୍ତ ଜୋରିମାନା ହୋଇପାରେ। ଆଜ୍ଞା ହଁ  ଅଭିନେତ୍ରୀ ନଭ୍ୟା ନାୟାରଙ୍କ ସହିତ ମଧ୍ୟ ଏପରି କିଛି ଘଟିଛି। ଚମେଲି କିମ୍ବା ମଲ୍ଲି ଫୁଲର ଗଜରା ପିନ୍ଧିବା ତାଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଛି। ମାଲାୟଲମ ଅଭିନେତ୍ରୀଙ୍କୁ ଅଷ୍ଟ୍ରେଲିଆର ମେଲବୋର୍ଣ୍ଣରେ ୧୯୮୦ ଅଷ୍ଟ୍ରେଲୀୟ ଡଲାର ଅର୍ଥାତ୍ ପ୍ରାୟ ୧.୧୪ ଲକ୍ଷ ଟଙ୍କା ଜରିମାନା କରାଯାଇଛି।

ହ୍ୟାଣ୍ଡବ୍ୟାଗରେ ଗଜରା ରଖିଥିଲେ

ନଭ୍ୟା ଗଜରା ସହିତ ଏକ ଭିଡିଓ ସେୟାର କରିଛନ୍ତି। ଯେଉଁଥିରେ ସେ ଜରିମାନା ଦେବା ପୂର୍ବରୁ ତାହାକୁ ବ୍ୟଙ୍ଗାତ୍ମକ ଭାବରେ ଲେଖିଛନ୍ତି। ଏହି ଭିଡିଓରେ, ସେ ଗଜରା ପିନ୍ଧି ବିମାନରେ ବସିଥିବାର ଦେଖାଯାଉଛି। ସୂଚନା ଅନୁଯାୟୀ, ଅଭିନେତ୍ରୀ ଭିକ୍ଟୋରିଆର ମାଲୟାଲି ଆସୋସିଏସନ୍ ଦ୍ୱାରା ଆୟୋଜିତ ଓନମ୍ ଉତ୍ସବରେ ଅଂଶଗ୍ରହଣ କରିବାକୁ ମେଲବୋର୍ଣ୍ଣ ଯାଉଥିଲେ। ସେହି ସମୟରେ, ତାଙ୍କ ଉପରେ ଏହି ଜରିମାନା ଲାଗୁ କରାଯାଇଥିଲା। ନଭ୍ୟାଙ୍କ ଅନୁଯାୟୀ, କୋଚି ଛାଡିବା ପୂର୍ବରୁ, ତାଙ୍କ ବାପା ଦୁଇଟି ଗଜରା କିଣି ତାଙ୍କୁ ଦେଇଥିଲେ। ସେ ତାଙ୍କୁ ଗୋଟିଏ ପିନ୍ଧିବାକୁ କହିଲେ, ଅନ୍ୟଟି ହ୍ୟାଣ୍ଡବ୍ୟାଗରେ ରଖିବାକୁ କହିଲେ। ସେ ତାଙ୍କ ବ୍ୟାଗରେ ପ୍ରାୟ ୧୫ ସେଣ୍ଟିମିଟର ଲମ୍ବା ଗଜରା ରଖିଥିଲେ। ଏହା ପରେ, ଯେତେବେଳେ ସେ ମେଲବୋର୍ଣ୍ଣ ବିମାନବନ୍ଦରରେ ପହଞ୍ଚିଲେ, ତାଙ୍କୁ ଅଟକାଗଲା। ନାୟାର କହିଥିଲେ ଯେ ଏହା ଅଷ୍ଟ୍ରେଲିଆର ନିୟମ ବିରୁଦ୍ଧରେ ଥିଲା। ଏହାକୁ ଏକ ଅନିଚ୍ଛାକୃତ ଭୁଲ ବୋଲି କହି ଅଧିକାରୀମାନେ ତାଙ୍କୁ ୨୮  ଦିନ ମଧ୍ୟରେ ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି।

ଅଷ୍ଟ୍ରେଲିଆର ନିୟମ କ’ଣ?

ପ୍ରକୃତରେ, ଅଷ୍ଟ୍ରେଲିଆର କୃଷି, ବନ ଏବଂ ମତ୍ସ୍ୟ ବିଭାଗ ଅନୁଯାୟୀ, ଅନ୍ତର୍ଜାତୀୟ ଯାତ୍ରୀମାନଙ୍କୁ କଟା ଫୁଲ କିମ୍ବା ପତ୍ର ଆଣିବାକୁ ବାରଣ କରାଯାଇଛି। ଏଥିପାଇଁ, ପ୍ରଥମେ ଅଧିକାରୀମାନଙ୍କୁ ଜଣାଇବା ଆବଶ୍ୟକ। ତା’ପରେ ଅଧିକାରୀମାନେ ଏହି ଫୁଲ କିମ୍ବା ପତ୍ର ଗୁଡ଼ିକୁ ଯାଞ୍ଚ କରନ୍ତି। ଯାହା ଦ୍ୱାରା କୀଟପତଙ୍ଗ କିମ୍ବା ରୋଗର କୌଣସି ବିପଦ ନ ଥାଏ। ବିଭାଗ ଅନୁଯାୟୀ, ଯାତ୍ରୀମାନେ ସେମାନଙ୍କ କାର୍ଡରେ ଉଦ୍ଭିଦ ସମ୍ପର୍କିତ ସୂଚନା ଦେବା ଆବଶ୍ୟକ। ନଚେତ୍, ସେମାନଙ୍କ ଉପରେ ୬୬୦୦ ଅଷ୍ଟ୍ରେଲିଆନ ଡଲାର (୩.୮୧ ଲକ୍ଷ ଟଙ୍କା) ପର୍ଯ୍ୟନ୍ତ ଜରିମାନା ଲାଗୁ କରାଯାଇପାରିବ। ଏହା ସହିତ, ଏକ ମାମଲା ମଧ୍ୟ ଦାୟର କରାଯାଇପାରିବ। କେବଳ ଏତିକି ନୁହେଁ, ସେମାନଙ୍କର ଭିସା ମଧ୍ୟ ବାତିଲ କରାଯାଇପାରିବ।